Read Angguruk Yali HAKIM-HAKIM 7 Bible Online

HAKIM-HAKIM 7 - Angguruk Yali bible

HAKIM-HAKIM 7

¹O misihim sambil Gideon unuk keron Yerubaal suwalfahon ino men ap obog toho at men ambiyeg welatfahon arimano hubet in atug libareg ik Harod elerukmu o sabo wiroho welatfag. Welatfag ambeg iliko fil punu More alma tonggoma Midian inap o sabo wiroho welatfag.

²Weregma NINIKNI Allahn Gideon fam ele uruk lit, ”Anden te ap tor angge ininggikmu Midian inap umbuhuk peruk lahi angge famen ap anggolo hat men wahep. Ap anggolo hat men wahebon aruman fobik, ’Nit nenemuwen Midian inap apmayap eneptukuk,’ ulug ininggarehen enewelwel taruk lit An apmayap nabuhup tohon

³ketiya haren humalikisi unubam hiyag isaruk lit ap enekolen unuwag elek-elek angge turukon inibam lalusan hiyag isamihin,” ibagma Gideon inowen ap arimano hiyag isibagma ap teng-teng angge 20.000 inibam fil suhuloho libareg Gideon men pok atfahon we tor angge 10.000 welatfag.

⁴Weregma NINIKNI Allahn Gideon fam hiyag utuk lit, ”Ap hat men pok ahason anggolo werehen haren humalikisi aruma ikma hondog eneplug wambimihinmu Anden hat men ambiyeg lalihibon en enepmin. En eneptuk lit tu men tu men hat men ambiyeg lalihip ulug hiyag hitminon eneg hat men lalihip, tu ambiyeg lalihip fug ulug hiyag hitminon ambiyeg lalihip fug,” ulug hiyag itfag.

⁵Hiyag itfagma Gideon inowen umalikisi ikma hondog eneplug wambibagma NINIKNI Allahn at ubam ele uruk lit, ”Ik nalusan hiyag isamihinmu ap san ik meneyen naruk hag toho ambilikanggen fam milang heheg naluson enemumu palu enepmihin, enelenggen fam hur atug naluson enemumu palu enepmihin,” ulug hiyag itfag.

⁶Ari ulug hiyag itfagma ap tor angge ik milang heheg nibahon teng nanggoloben 300 arimano enemumu palu enepfagma ap winon arimano enelenggen fam hur atug nibahon anggolo welatfag.

⁷Weregma NINIKNI Allahn Gideon fam hiyag utuk lit, ”Ap tor angge ik milang heheg nenggeson eneg hat men ambiyeg lalihip. Anden let heneptukmu hiren Midian inap apmayap eneplihiben ap winon obog toho inibam wal-wal wereg ke lalusa,” ibag.

⁸Allahn ibag ane hikit toho Gideon inowen ap ik hur atug nibahon arimano unubam hinibam wal taneg aliyek ulug hiyag isibagma suburu men pinggong tog aptukmu ele uruk angge men embeselug inibam fil libagma we ap tor angge arimano Gideon men welatfag. Welatfag ambeg enepma Midian inap tonggoma o sabo wiroho welatfag.

⁹Weregman hup atfagma NINIKNI Allahn Gideon fam ele uruk lit, ”Midian inap hat hinggikmu og hirihireg in atug unusimihinen it enembeg wambimihin.

¹⁰Hakol halug hat hamingmingangge Pura men tam wambilihipteg

¹¹Midian inaben enele sahaltukmu hol isalihipteg hat hakol eleg atmisimu hambong se roho unusik oho lamihin,” ibagma Gideon amingmingangge Pura men Midian inaben o sabo wirig latfag ambeg ap kahal enesug lit unduhuk latfahon horogma wambibag.

¹²Wamburukmen Midian inap men Amalek inap men yali filen watfahon arimano obog toho helem inini winag isa fug teg hag toho mondegma wam unta iren tohon oho ik yinggi hag toho tonggoma ino mondeg latfag.

¹³Mondeg latfagma wambibareg Gideon inowen hol harukmen Midian ahun misihen nei wibag ane are fam hiyag utuk lit, ”Anden nei og harukmen suburu roti anggen pumang toho wirahowon eke punumuwen imbil-imbil waharuk lit Midian ninap welahe ambeg kik wahareg o sabo nit welaheyon fam kik tehekma tukum turuk lit fiyog toho lin-lan ehek,” ulug are hiyag itfag.

¹⁴Hiyag itfagma areyen te, ”Nei wehen ane ari saplangge wehen fug, Midian ninap nenebeyet ninibamet Allahn Israel ahun Yoas amloho Gideon inggikmu nunumbaharukmu nunusik watmisiyon fahet nei og hehen,” ulug hiyag itfag.

¹⁵Nei wehen ane ari alem tu fahet wehen ulug tintiltukmu hol hibareg Gideon inowen elenggen fam hur atfareg Nikni ulug Allah fam sembahyang uruk latfag. Sembahyang ibareg umalikisi nohorukmu libareg it unubam hiyag isaruk lit, ”NINIKNI Allahn Midian inap nit nininggikmu embehekma in amek!” ulug hiyag isibareg

¹⁶umalikisi welatfahon teng nanggoloben 300 arimano palu hinahan luhal enepfareg pinggong tog aptukmu ele uruk angge men, iral leko larukmu aben yet hahup tohon ulug kubag elma kilaboho walug larukon men ap wal taneg ininggikmu og isibag.

¹⁷Og isibareg hiyag isaruk lit, ”An o sabo Midian inaben tohon ambiyangma laminteg timin ane yet niyalihipteg hiren oho anden timin ane hikit toho tilihip.

¹⁸An men ambiyeg lulon menen pinggong ele watukmu hol halug hiren oho o sabo arimano walinggoho unduhuk lit henele hi roho, ’NINIKNI Allah men Gideon men ununuk fam tog abul,’ ulug pinggong ele watlihip,” ulug hiyag isibag.

¹⁹Hiyag isibareg weregma hup humanoho Midian inap tam kahaleg latfahon nohik libagma nin fobikon kahalik waharukmu Gideon otsi palu misihon 100 men o sabo Midian inaben tohon ambiyangma libareg kubag iral kilaboho wibahon arimano arap toho hik isaruk lit pinggong ele hum toho watuk latfag.

²⁰Watukmu palu piren arimanowen hol hibareg iren oho kubag wibahon arimano arap toho hik isibareg iral ininggik hare filon fam seneg lit enele hi roho, ”NINIKNI Allah men Gideon men ununuk fam tog abul,” ulug pinggong ininggik pikit filonen watuk latfag.

²¹Ari roho pinggong watuk lit Israel inap arimano in atfag ke wal-wal o sabo Midian inaben tohon walinggoho unduhukmen Midian inap enekolen ya nga uruk lit la wam turukmu

²²NINIKNI Allahn inindi sohuwa fisibagma it-it wat-wat atukmu winon linggik-longgo ibahon arimano o Zerera fil laruk lit o Bet-Sita keyen tulug o Abel-Mehola o pumbuk Tabat horogma libag.

²³Larukmu Naftali inap, Asyer inap, Manasye inap obog toho wol enepfagma it arimanowen Midian inap mug eneplug libag.

²⁴Mug eneplug larukmu Gideon inowen tom Efraim fam werehon obog toho wambik wamusareg ik naruk ke kahaltil o Bet-Bara keyen tulug Yordan ikma lalusareg kahaleg lit Midian inap waharukmu unusil lalusan hiyag isil lalihip ulug ap mon enepfag. Mon enepfagma libareg Gideonen ibag ane hiyag isibagma Efraim inap obog toho ik naruk ke kahaltil laruk lit o Bet-Bara keyen tulug Yordan ikma libareg Midian inap kahal enesug lit welatfag.

²⁵Kahal enesug lit Midian inap onowesi piren itano Oreb men Zeeb men sen enepfareg helep iraham Oreb watfag ambeg ino unuk Oreb Ahalep suwalfag, Zeeb ino anggur anggen waruk ambehen watfag ambeg ino unuk Zeeb suwalfag. Suwalfag ambeg itano embeselug Midian inap muko imbisik libareg Efraim inap arimanowen Oreb men Zeeb men ununggul walug ik Yordan paloho Gideon og irik libag.