Read Angguruk Yali HAKIM-HAKIM 9 Bible Online

HAKIM-HAKIM 9 - Angguruk Yali bible

HAKIM-HAKIM 9

¹Welatfareg misihim sambil Gideon amloho Abimelekh ino nisinga erekesi enembeg lamin ulug o Sikhem libareg isinga erekesi unubam hiyag isaruk lit,

²”Hiren Sikhem inap obog toho unubam kapal isaruk lit, ’Gideon umalikisi teng hinahan 70 arimanowen fet nenesug lamuhup peruk lahep ano, ap we misihen fet nenesug laruhu peruk lahep ano?’ ulug kapal isa lalihip. An Abimelekh fahet nenereken ondohowon ulug hiyag isalihip!” ibag.

³Ari ibagma Abimelekh isinga erekesi arimanowen Sikhem inap Abimelekhen ibag ane hikit toho hiyag isibagma iren te, ”Abimelekh nit nenere weregma at ele eneg holtuk lamuhuk,” peruk latfag.

⁴Ari roho pibareg Sikhem inap arimanowen uang perak Baal-Berit ibam forohowon teng hinahan 70 og itfagma Abimelekh inowen ap o eke la eke la turuk lit enehako roho til norukon an men ambiyeg laruk lamuhuk ulug onggo og isibag.

⁵Onggo og isibareg Abimelekh ino ap arimano men ambiyeg ikni ibam o Ofra libareg ori Gideon umalikisi teng pirenman nubam hilag nisanggo fuman arimano obog toho 70 helep misig unggulmuwen pinggi unusibag. Unusurukmu Gideon amloho ilabowon Yotam ino eneg hirag arik libagma ware fisibag fug.

⁶Abimelekh inowen ori obog toho unusibagma Sikhem inap men o Bet-Milo inap men obog toho luhaloho o Sikhem libareg usa ahen alma Abimelekh ap suwon welaruhun ulug lahapfag.

⁷Abimelekh ap suwon lahabehesa ulug Yotam hiyag itfagma Yotam ino tom Garizim fam in arik lahibareg ele ine roho Sikhem inap inibil hi ruruk lit, ”Sikhem hinaben an nele holtihipmu Allahn oho hit henele holuhu.

⁸Misihim sambil e arimanowen ap suwon eke fet nenesug laruhuwon lahabul ulug palu atfag. Palu atfareg sak fam enele uruk lit,[6] ’Haren nit fet nenesug laruhun,’ ulug hiyag itfag.

⁹Hiyag itfagma sak inowen hebeloho hiyag isaruk lit, ’Aben tu Allah hag toho wereg perukon men ap men wel enebul ulug an nahaluwe unubahet emberuk anggeyen nungge fahet an nahaluwe ino lin isalug laminteg ap suwon wereg lit e pali ke kaya-kaya angge turuk laruhuk?’ ulug hiyag isibag.

¹⁰Hiyag isibagma e arimano libareg e sawe fam enele uruk lit,[7] ’Haren nit fet nenesug laruhunen watmihin,’ ulug hiyag itfag.

¹¹Hiyag itfagma e sawe inowen hebeloho hiyag isaruk lit, ’Anggen anden tohon unduk fanowon arimano nungge fahet embeselug laminteg ap suwon wereg lit e pali ke kaya-kaya angge turuk laruhuk,’ ulug hiyag isibag.

¹²Hiyag isibagma e arimano libareg hele anggur fam enele uruk lit, ’Haren nit fet nenesug laruhunen watmihin,’ ulug hiyag itfag.

¹³Hiyag itfagma hele anggur inowen hebeloho hiyag isaruk lit, ’An nahil fanowon Allah hag toho werehon men ap men enehiyehap eneptuk lahiyon nungge fahet embeselug laminteg ap suwon wereg lit e pali ke kaya-kaya angge turuk laruhuk?’ ulug hiyag isibag.

¹⁴Hiyag isibagma e obog toho arimano alog ahen fam, ’Haren nit fet nenesug laruhunen watmihin,’ ulug hiyag itfag.

¹⁵Hiyag itfagma alog ahen inowen e arimano unubam hiyag isaruk lit, ’Hiren we tik-tem toho an ap suwon lahabuhuk peruk lahep halug an napma sakoma hur arik wamuhup! Lahap nabuhup fug halug an alog nahen aru famen indok wilip aruhureg e sin tom Libanon fam werehon obog toho nahu,’ ibag,” ulug Yotam inowen hiyag isibareg nin eke ele hiyag isaruk lit,

¹⁶”Nori, hun Abimelekh ino ap suwon lahabehep ane fahet pikir ane tehe peruk lahep? Gideon men umalikisi men unubam fano ane tehe peruk lahep? An nikniyen fano nuwabukag peruk lit hit fahet tog aptuk lit Midian inap ininggikmuwen windat heneptuk latisi ane fahet niren hebeloho fano ane ubam tehe peruk lahep?

¹⁷

¹⁸Hiren o yoho Gideonen ondohowon enele holuhuk fug ulug umalikisi teng pirenman nubam hilag nisanggo fuman arimano obog toho 70 helep misig unggulmuwen unusehepteg Gideon amingmingangge hiyap misihen endetisiyon Abimelekh ino fahet nit nenere pehepteg Sikhem ninap fet nenesug laruhun ulug ap suwon lahabehep.

¹⁹O yoho hiren Gideon men umalikisi men unubam fano ane tehep halug hiren oho Abimelekh fahet henehiyeg toho weregma aren oho hit fahet ahiyeg toho welaruhu!

²⁰Fano ane tehep fug halug Abimelekh famen indok wilip aruhureg Sikhem hinap men o Bet-Milo hinap men obog toho narukmu Sikhem hinap, o Bet-Milo hinap famen oho indok wilip aruhureg Abimelekh ino nahu,” ulug hiyag isibag.

²¹Ari ulug hiyag isibareg Yotam ino libareg are Abimelekh fahet akolen o Beer hirag arik libag.

²²Hirag arik libareg weregma hun Abimelekh inowen Israel inap fet enesugmen eneg mo hinahan libag.

²³Mo hinahan libagma hun Abimelekh otsi Sikhem inap men seliyap enebukag ulug Allahn siyahon hime ubam monde fik watfagma Sikhem inap arimano Abimelekh apma welamuhuk fug peruk latfag.

²⁴Abimelekh ino indi oloken ori Yerubaal umalikisi teng pirenman nubam hilag nisanggo fumahen 70 itano unusibahon enemep Abimelekh men o Sikhem inap at let turukon men unubam wambukag ulug hime siyahon ino monde fik watfag.

²⁵Monde fik watfagma Sikhem inap arimanowen Abimelekh ele ying turuk lamuhuk ulug ap tom fene laharukon kahal enesug lit enenggengge yoholiyangge hilaruk latfag. Ari turuk latfahon fahet aben Abimelekh hiyag itfag.

²⁶Ari tibag li hun Ebed amloho Gaal ori men o Sikhem watfareg yug toho weregma Sikhem inaben at ubabut fano peruk latfag.

²⁷Ari peruk lit iniyabuk anggur yatuk ambeg lalug anggen arimano tahanoho perele fibareg enehiyehen yunggultuk latfag. Yunggultul ulug it unumbasi wel eneptuk ibam kibareg olman suburu men ik men naruk lit Abimelekh ino abug uruk latfag.

²⁸Abug uruk lit Ebed amloho Gaal inowen, ”Abimelekh ino ap sa hag toho weregma nit Sikhem ninap at amingmingangge welamuhuk? At te Israel ahun Yerubaal amloho wereg lit hun Zebul ino an nubalma Sikhem inap arimano sen enesug laruhun ulug unduhuk ferisiyon ino apma welamuhuk fug. Hun Hemor o Sikhem tu tam witfag ahunen endetfahonen ondohowon enepma welamuhuk.

²⁹Anden Sikhem inap aruma sen enesug lale halug Abimelekh ino pinggi watle. At fam nele eleyon tu, ’Hat hotsi we tor angge werehen nin winon wol enepmihinmu an men tog abul,’ ulug hiyag etle,” ibag.

³⁰Gaalen ibag ane ari o Sikhem seneg latfag ahun Zebul inowen hol hibareg indi inahan hibag.

³¹Inahan hibareg otsi hiyag isaruk lit, ”Hun Abimelekh o Aruma weregma lalihipteg hiyag irik lalihibon tu: Ebed amloho Gaal ori men o Sikhem waharusareg Sikhem inaben enembol yig humag ulug inindi kahal eneptuk angge re hat holuk toho welamin.

³²Ari fahet o yoho hubanggo hat hotsi men wilip atlihipteg o Sikhem horogma lalug hirahoma welatlihip.

³³Sono likiya mo lahik waharukmu itano o ino siyahap tuhuben wilip amuhup. Hit wilip atukmu yet hisahupteg Sikhem inaben hunusul ulug olman wilip amuhup halug hit hinine roho turuk lit it unusuhup,” ulug hiyag isibag ane hikit toho Abimelekh hiyag irik libag.

³⁴Hiyag irik libagma Abimelekh ori men o hupmu wilip atug o Sikhem libareg asan uhan luhaloho wereg lit o ino siyahap tul ulug hirahoma welatfag.

³⁵Weregman o sakan tibagma Gaal ino o pumbuk inowen wilip atmin ulug sokolma in arik larukmen Abimelekh ori men hiraho latfag ambehen at wabul ulug wilip atukmu yet isibag.

³⁶Yet isibareg Gaal inowen Zebul fam ele uruk lit, ”Ap anggolo tom famen wambik waharukmu yet isimin,” ulug hiyag itfagma Zebul inowen, ”Ap waharuk ehen angge famen tom ahuhe ap hag toho inam atukmu yet haruk lahen,” ibag.

³⁷Ibagma Gaal inowen nin eke hiyag utuk lit, ”Ap anggolo tom Kinang Anum suwalehon ino famen wambik waharuk lit asan misig usa ahen filen waharukmu yet isimin,” ibag.

³⁸Ibagma Zebul inowen, ”Haren hele hemet toho uruk lit, ’Abimelekh ino ap sa hag toho weregma nit at amingmingangge welamuhuk?’ irikin ane ketiya hapeleg aha? Ap haren ininggaliyap eneptikinon aruma ketiya waharukmu it men tog apmihinen wilip atmihin,” ibag.

³⁹Ari ibagma Gaal inowen o Sikhem inap hondog eneplug wilip atfareg Abimelekh men tog aptuk latfag.

⁴⁰Tog aptuk lit Abimelekh inowen Gaal ino muko larukmu akolen o pumbukmu kibag. Kibagma Abimelekh ori menen Sikhem inap arimano unusil larukmu funggalem ke tan war atil yan war atil laruk lit winon sok o pumbukmu kuruk ambeg oho war arik libag.

⁴¹Ari roho unusibareg Abimelekh ino suhuloho ibam o Aruma watfag. Watfagma Zebul inowen Gaal ori men o Sikhem tuma welamuhup fug ulug yanggal enepfagma libag.

⁴²Libagma noholug likiyamon Sikhem inap arimano niniyabuk lul ulug turukmu aben yet isibareg Abimelekh hiyag irik libag.

⁴³Hiyag irik libagma otsi asan hinahan luhal atfareg Sikhem inap unusul ulug o ino iraham kahal enebik libag. Kahal enesugmen Sikhem inap arimano o pumbukmuwen wilip atukmu yet isibareg Abimelekh otsi men in atuk lit unusuruk latfag.

⁴⁴Unusul ulug Abimelekh otsi asan misig men sok o ino kuruk ke iraham in arik larukmu asan piren Sikhem inap iniyabuk ke libahon arimano unusil libag.

⁴⁵Likiya ak tibag angge Abimelekh inowen o Sikhem inap men tog aptukmen eneg o hup atfagma o ino kibareg Sikhem inap obog toho unusibag. Unusibareg o ino harep pisako oluna fisibareg fobik oho kinang tu fam ap welamuhup fug ulug usahinte saho foloho hilil isibag.

⁴⁶Ari tibag ane fahet Sikhem inap elehet yaron alem ke welatfahonen hol hibareg enekolen unumba iren wel turukon El-Berit ibam apma kinang habulig ambeg kibareg welatfag.

⁴⁷Sikhem inap arimano obog toho kinang habulig ambeg palu roho wereg ulug aben Abimelekh hiyag itfagma

⁴⁸Abimelekh ori men tom Zalmon fam lahibareg Abimelekhen yaha wibareg e inggik eke palfag. E palfahon ino umaloma hilang teg lit ori unubam, ”Anden turukmu kim niyaruk lahebon ari hiren oho folo-folo tilihip,” ulug hiyag isibag.

⁴⁹Hiyag isibag ane ari hikit toho ap arimano wal tanehen e inggik eke paloho walug Abimelekh men ambiyeg libareg e arimano kinang habulig ambeg emberimu embelug indok munggalfagma Sikhem inap abet hiyabet obog toho teng-teng angge 1.000 war atfag.

⁵⁰Welatfagma Abimelekh o Tebes libareg o ino walinggoho kilabeg latfareg ilmig tibag.

⁵¹Ilmig tibag ambeg ino pulmu o yaron ine roho wirig latfahon weregma Tebes inap abet hiyabet obog toho enekolen o yaron ino fam kibareg sok laroho hinawimu lahibag.

⁵²Lahibagma Abimelekh o ino sokolma libareg harep pisatmin ulug turuk latfag.

⁵³Ari turukmu hiyap ekeyen helep humon hik isa wamburukmen Abimelekh unggul uwag arap toho ware fisibag.

⁵⁴Ware feserukmu itano Abimelekh inowen ot at asehen seneg latfahon fam ele uruk lit, ”Hiyap ekeyen warehek ulug aben an nabug uhup tohon haren karog lisoho wamihinteg an kangguloho nuwarin!” ulug hiyag itfag. Hiyag itfagma amingmingangge inowen kangguloho ware fisibagma war atfag.

⁵⁵War atfagma Israel inaben yet hibareg inibam wal taneg libag.

⁵⁶Ari roho turuk lit Abimelekh inowen ori teng pirenman nubam hilag nisanggo fumahen 70 arimano unusuruk lit ikni indi siyaha fisibahon fahet Allahn ayeg waroho alem siyahon ubam imbibag.

⁵⁷Imbibag hag toho Sikhem inaben siyag ane turuk latfahon fahet oho alem siyahon unubam imbibag. Imbibag ane ari Yerubaal amloho Yotam inowen Sikhem inap arimano huluwap enepfag ane hikit toho teko libag.