Read Angguruk Yali 3 YOHANES 1 Bible Online

3 YOHANES 1 - Angguruk Yali bible

3 YOHANES 1

¹Gayus nare, an hare penatua inowen tem toho nindi hasug lit hat fahet suwesingga aru emberuk lahi.

²Nare nindi hasug lahiyon, hat hindi yuwag toho wereg lit hebe oho ouk wa fug angge fano welahenma hubahet sembahyang uruk lahi.

³Nori piren hinahan nambeg waharusareg welahen ane fahet hiyag nutuk lit Allah wene tem toho urukon fahet aren fano wenggel haruk ulug hiyag nutusama nahiyeg haruk lahi. Haren tem toho uruk awene ino hindi wirik toho wenggel haruk lit fano ane turuk lahen.

⁴An numalikisi Allah wene wenggel haruk lit fano ane turuk urukmu holtuk lit nahiyeg anggolo haruk lahi. Alem winonen ari hag toho nahiyehap naptuk eleg.

⁵Nare nindi hasug lahiyon, hori men pohon hambeg waharukon men fano fer enesug lit unubam turuk lahen ane ari fahet ap wene fam wenggel harukonen turuk hag toho turuk peruk lahi.

⁶Haren ari roho let neneptuk latisi ulug ap tuma waharusonen Allah umalikisi tuma werehon hiyag isarusa. Allahn fano pukag ulug ap pohon funggalma larukon fahet haren fano ler eneptuk laruhun.

⁷It arimano Kristus inowen mon neneptisi ulug larukmu Kristus fam wenggel haruk eleg inap tor angge oho og nisimin ulug heng uk fug teg.

⁸Heng uk fug tehen it arimano hahon ninibam hondoko kilap enebuk teg lahe. Ari roho turuk lit wene fanowon hiyag isil noruk inap men mangno roho wereg lit ler eneptuk lahe.

⁹Suwesingga il horog angge tot Allah umalikisi fahet emberikik angge famen hun Diotrefes inowen an palimu reg lit fer enesug laruhuk peruk lit anden peruk ane aren fano holtuk eleg.

¹⁰An hambeg waruhukteg hun inowen turuk ane fahet nenele sahaluhuk. At inowen ele siyag toho uruk lit nit nenebug uruk. Nit nunubam eneg per enepmin puk fug angge wene hiyag isil laruk inap arimano oho nibam hondoko kilap enepmin peruk eleg. It hondoko kilap eneptuk inap arimano unubam imbisiyek ulug per eneptuk lit Allah umalikisi men welatihip fug ulug yanggaloho wilip eneptuk.

¹¹Nare nindi hasug lahiyon, siyag ane turuk inap onombolim la fug angge fano ane turuk inap onombolim laruk laruhun. Ap sa fano ane turuk halug at ino Allah amloho wereg. Ap san siyag ane turuk ahun inowen tam oho Allah yet harisi fug.

¹²Hun Demetrius fahet ap obog tohowen fano ane turuk ahun ulug fag toho hiyag nisaruk. Tem ane uruk ahun inowen oho at fano ulug wel turuk. Niren oho at fahet fano peruk lit tem peruk lahe ane ari hat holuk.

¹³Alem anggolo werehon suwesingga fam haharoho embele angge famen ketiya suwesingga fam hahatmin peruk lahi fug.

¹⁴An folo-folo hambeg waruhukteg ambiyeg wereg lit nenele uhuk peruk lahi.

¹⁵Nare, hindi yuwag toho welaruhun. Nit horiyen hi haptuk lahe. Nonori hat men werehon hi heneptuk lahe ane aru enebe misig-misig hiyag isahun.