Read Angguruk Yali WAHYU 1 Bible Online

WAHYU 1 - Angguruk Yali bible

WAHYU 1

¹Yesus Kristus inowen tot welamuhupmu teko lahu ane mapmu rehon inamap tirisi ane suwesingga aru fam wereg. Allahn namingmingangge teko lahu ane fahet inindi anggar amag ulug Yesus Kristus ubam imbibagma Aren inamap tirisi. Inamap turuk lit malaikat misig amingmingangge Yohanes ambeg monde feruk lit at ubam selehap tirisi.

²Allah wene Yesus Kristus inowen Yohanes fam fag toho hiyag itisiyon Yohanesen yet harisi ane arimano obog toho hiyag isaruk latisi.

³Wene aru fulu roho harisi ane fahet haharoho emberisiyon ap san aru uruk lit fano roho hol harukon hikit toho turuk laruhuwon ino ahiyeg toho welaruhu. Teko lahu ane ari horog ketiya teko lahu.

⁴Allah umalikisi o pumbuk sabiren Asia kinang fam welahebon an Yohanes inowen hunubam nele hiyag hisaruk lahi. At werehon welatfahon waruhuwon ino ubabut fano reg lit hinindi yuwahap heneptuk laruhu. Hime fanowon sabiren Allah lehoma werehon ino alukema werehon arimanowen let heneptuk lamuhup.

⁵Yesus Kristus ino ap war atuk ambehen tam oluk atfagma ap suwon kinangma werehon palimu At wereg lit indi wirik toho Allah wene fag toho hiyag isaruk latfahon inowen hi heneptuk laruhu. Yesus inowen indi nenesug lit siyag angge nit nunubam werehon At amep fam elehap tibag.

⁶At inowen nit o yowi misig inap welamag ulug mangnowap neneptisi. Niren Ikni Allah let turuk inap imam hag toho welamuhup ulug Aren nit unduhuk nunubaharisi. At ino ine roho wereg lit mondabi palimu lehoma welaruhu. Amin.

⁷At ino hina fene waharukmu ap obog toho inil wal taneg yet hahup. At ino fit fam hak toho watfag inap arimanowen oho At yet hahupmu ap kinangma werehon obog tohowen ya nga uruk lit at fahet uba yatuk lamuhup. We tem toho ihi. Amin!

⁸An te A men O men welahi ulug Ninikni Allahn irisi. At werehon men watfahon men waruhuwon men mun ane man ane senehon ino At eneg wereg.

⁹Yesus apma wereg lit niren At yet teg lit weregma aben alem siyahon nunubam emberukmu an henere Yohanes oho hit men sebe roho welahi. Allah wereg ambeg kuhuk ulug ninindi yuwag toho welahe. Allah wene Yesus Kristus inowen fag toho hiyag isibahon arimano uruk latikikon fahet ik alonggenma o Patmos aru hik niya waharusama welahi.

¹⁰O wene uruk sambil Allah hime fanowon nubam atisireg an nambol filen ele ine roho waruk ele hag toho urukmu hol harikik.

¹¹Ele hiyag nutuk lit, ”Anden turukmu yet hamihin ane suwesingga fam hahatmihinteg Allah umalikisi o pumbuk sabiren fahet embemihin: O Efesus, Smirna, Pergamus, Tiatira, Sardis, Filadelfia, Laodikia inap fahet embemihin,” ulug hiyag nitisi.

¹²Ele nubam urukmu itano hebeloho kim hamin ulug turukmen iral hunduko emberuk angge ili rurukon sabiren fam indok ambulpul turukmu yet harikik.

¹³Iral hunduko emberuk angge sabiren itano sehelimu ap kinangmon hag toho misig unduhuk latisi. Asum yaron wan teg lit ubahare ke ili ruruk ahele fam nunggulig pug teg latisi.

¹⁴Unggul men oruk men suwe oruk yanggowon hag toho kut teg lit il indok ambulpul kiyog turuk latisi.

¹⁵Uyug te helep indokma yihik ferukmu ambilik angge turuk hag teg latisi. Ele re ik hul tung tik wamburuk hag toho uruk latisi.

¹⁶Inggik pikit fil suhal sabiren seneg latisi. Ambilikmuwen te karog misig famen ayeg fumag-fumag umahowon olokon wilip atisi. Orohole re o hibi fam mo yatukon hag toho yatuk latisi.

¹⁷Ari regma itano yet harikikteg nebe napelu ruruk lit hololong toho At uyug alma itano ap warehon hag toho ying atikik. Ying atikikmu inggik pikiron an nubam emberisireg, ”Hakol fug, An atam welatik iyahon, fobik oho wereg lit

¹⁸mondabi noluk welaruhukon yet niyimin, An war atikik angge famen mondabi noluk welahi. Ap warehon wereg ambeg fahet sok husuruk angge Anden ki reg lahi.

¹⁹Haren yet hehen ane aru hahatuk lit ketiya teko larukon men fobik teko lahuwon men fahet hahatuk laruhun.

²⁰Suhal sabiren ninggik pikit fil wereg lahason men iral hunduko emberuk angge ili rurukon sabiren men hehenon fahet wirimangge seleg toho hiyag hitmin: Suhal sabiren itano Allah umalikisi o pumbuk sabiren werehon itanowen tohon malaikat wereg. Iral hunduko emberuk angge sabiren itano Allah umalikisi o pumbuk sabiren werehon fahet yet hehen,” ulug hiyag nitisi.