Read Angguruk Yali WAHYU 10 Bible Online

WAHYU 10 - Angguruk Yali bible

WAHYU 10

¹Anden yet harukmen malaikat ineyon misig poholman wambik waharukmu hina sum hag toho wan tegma kaliye ahikal unggulmu hobog teg lit orohole mo yatuk hag teg lit uyugmu indok ambulpul ulog-ulog wambik waharukmu anden yet harikik.

²Inggikmu suwesingga toron misig wiriloho seneg latisi. At ino uyug pikit fil ik sobig lit uyug hare fil kinang sobig lit

³ele olomene ele hag toho hum toho kuwa ruruk latisi. Ele urukmu itano ululu sabiren sipuk turuk latusa.

⁴Ululu itano sipuk turuk latusama suwesingga fam hahatmin ulug turuk lit hol harukmen ele poholman uruk lit, ”Ululu sabiren itano enele ehesa ane suwesingga fam hahabuk fug, aben holuhup tohon enehangge tebelug map tebemihin,” urukmu holtikik.

⁵Malaikat uyug fuma ik sobig lit uyug fuma kinang sobig latisiyon inowen inggik pikiron fam pohol fil leg haruk lit,

⁶”Anden tik-tem toho iminon aru mondabi oluk werehon fam mun angge man angge poholma kinangma ikma werehon wal tibag ahun fam sali embemin,” il laruk lit, ”Sali ari pisan aruhu fug.

⁷Malaikat sabiron inowen waruk teluhu sambil ino Allahn hirako peruk ane inam aruhu. Amingmingangge atam wene hiyag isaruk latfag inap hiyag isibag ane hikit toho teko lahu,” irisi.

⁸Ari irisimu anden hol harukmen ele pohol filen tam hol harikikon ino nin eke an nubam ele uruk lit, ”Lamihinteg malaikat uyug fuma ik sobig lit uyug fuma kinang sobig lit werehon inowen inggikmu suwesingga wiriloho seneg lahayon ino wak lamihin,” ulug hiyag nutukmu hol harikik.

⁹Ari hol harikikteg malaikat ino ambeg larikikteg heng turuk lit, ”Suwesingga ino og nimin,” irikikmu aren an nubam ele uruk lit, ”Hilamihinteg namihinmu hahummu fato rimisi angge famen hambilikmu kin ahaluwe hag toho unduk fano rik ohoreg,” ulug hiyag nitisi.

¹⁰Ari hiyag nitisimu suwesingga ino malaikat inggikmuwen warikikteg narikik. Narukmu nambilikmu kin ahaluwe hag toho unduk fano turuk latisi angge famen pil harikikmu nahum fato ruruk latisi.

¹¹Ari turukmu hiyag nutuk lit, ”O pumbuk obog toho men ap ununggul unuk obog toho men enele wal taneg urukon men ap palimu werehon men fulu roho haruk lahen ane hiyag isaruk laruhun,” ulug hiyag nitisi.