Read Angguruk Yali WAHYU 12 Bible Online

WAHYU 12 - Angguruk Yali bible

WAHYU 12

¹Weregman enehangge suwon poholman inam atisi: Hiyap misig mowen hililip teg lit pikalem palimu uyug sobig lit suhal nisanggowen unggul walinggoho hutuk teg latisi.

²Hiyap ino malik fet talug latisireg indag tamin ulug ahum fato ruruken ngi hum uruk latisi.

³Ari uruk lit weregma enehangge winon eke poholman inam atisi. Manu misig ahap ke indok ambulpul kiyog turuk lit unggul sabiren teg lit andimbuk numen teg lit unggul wal taneg aliliyangge hobog teg latisi.

⁴Manu aheye ino kaya rurukmu suhal minggiroho poholman kinangma pilap eneptuk latisi. Ari turukmu manu inowen hiyap umalik indag tamin ulug turukon ino ondoho feruk halug hum toho namin ulug turuk latisi.

⁵Ari perukmen hiyap inowen malik ap angge indag tarisi. Indag tarisiyon inowen wanggun tomuk ineyon seneg lit ap obog toho sen enesug laruhu Allahn perisi. Manu inowen malik ino hum toho namin ulug turukmen malik ino Allah wereg ambeg lehoma walug larusa.

⁶Walug larusama hiyap ino longgo imin ulug farema larisimu Allahn at welaruhu ambeg ulug hale ferisi. Hale ferisi ambeg ino weregma kultukmen eneg hup teng-teng angge 1.260 aruhu.

⁷Weregman poholman tog aptuk ane ak turusareg Mikhael otsi malaikat men manu ino men tog abul ulug turukmu manu ino otsiyen let turukmu tog aptuk latusa.

⁸Tog aptuk latusareg manu otsi men apma atusareg poholma it fahet kolo reg ambeg eleg latisimu manu ino kinangma pilaptusa.

⁹Manu ino pisanggo sabalon unuk Iblis Setan urukon kinangma werehon obog toho inindi ninap eneptuk lit mingming eneptukon ino apma pilaptusa. At otsi amingmingangge obog toho pilap eneptusa.

¹⁰Anden hol harukmen poholman ele hi roho uruk lit, ”Ninikni Allah inggik ineyon ap fanowap eneptukon inowen mun angge man angge seneg lit ahaluwe unggulmu are reberisiyon men mangno roho palimu wereg. Nit nonori fam un ane lombohap tirisiyon ino apma pilaptusa. At ino Allah fam ele uruk lit likiya hupmu un ane lombohap eneptuk latisi.

¹¹Domba umalik amep fam men wene fag toho hiyag isarukon ino fam men apmayap turusa. Wene hiyag isaruk lit nininggareg fano welamuhuk puk fug angge nunusukag peruson ariyen palimu atusa.

¹²Pohol men hit poholma welahebon obog toho men henehiyeg toho welamek. Hit kinang men ik men welahebon Iblis henembeg wambik waharisimu hinindi anggin amag. At welaruhuwon sali il misig tot tehen olok anggolo haruk,” uruk latisi.

¹³Manu inowen mondabi kinangma waroho pilap nabehesa perisireg hiyap ap umalik indag tarisiyon ino mutug laruk latisi.

¹⁴Mutug laruk latisimu hiyap ino welaruhu ambeg ulug farema tam hal itisi ibam ino lamisi ulug aherabul piren suwe tunguni aherabul ino og utusa. Manu ino wereg ambeg yat fil hiyap ino imbisik larisireg kultukmen mo ilig am wirig am turukmu misig aruhureg nin eke piren aruhureg nin mo ilig aruhu.

¹⁵Hiyap ino imbisik larisimu manu inowen nangginoho watmin ulug hiyap ino ikma ubuk uruk lit war amag ulug ik humon ambilik ele keyen fulok tirisireg wirig atuk latisi.

¹⁶Wirig atuk latisimu kinang inowen hiyap ino let timin ulug waharisireg at ambilik iya reberisimu ik manu famen fulok tirisiyon ino pil isarisimu firig atisi.

¹⁷Ik firig atisimu manu inowen hiyap ino warihi ha fug teg lahi ulug olok harisireg umalikisi winon Allahn komo enepfag ane holtuk lit Yesus awene onoluk inap unusimin ulug larisi.

¹⁸Larisireg saho ik ayegma unduhuk latisi.