Read Angguruk Yali WAHYU 15 Bible Online

WAHYU 15 - Angguruk Yali bible

WAHYU 15

¹Anden yet harukmen enehangge suwon aben fog turukon poholma weregma yet harikik. Yet harikik angge ino malaikat sabiren arimano fotog-fotogma ap siyahap eneptuk angge ininggik wal taneg alem seneg latusa. Allah olok peruk ane alem ari famen fotog fotogma siyahap enebuhu.

²Anden yet harukmen ik il wirikon indok men mangno roho yenggelegma ik ayegma ino pak wimbi men wirimangge men unuk winaharukon men enele holtul fug ulug longgo uruson arimano unduhukmu yer isarikik. It unduhuk latuson arimano Allah ambinggong ininggikmu wal taneg seneg latusa.

³Pinggong seneg lit Allah amingmingangge Musa ino asini men domba umalik ino asini men uruk lit yunggultuk latusa, ”Ninikni Allah Hat suwon palimu welahen. Haren turuk lahenon fano ane turuk lahenma aben fog haptuk. Haren ap hondog eneptuk abunggalem ke ino tem toho pikiron eneg hondog eneptuk lahenma ap obog toho Inikni Hat welahen ulug wel haptuk lahe.

⁴Ninikni, ap san Hat fahet akol toho wereg eleg, ap san Hat hunuk palimu emberuk eleg ano? We Hat eneg fanowon welahen. Haren alem kong turuk lit pikit toho eneg kong turuk lahenma ap obog toho indit-indit werehon Hat hambeg waharuk lit halukema hur atuk lit wel haptuk lahe,” ulug sini yunggultuk latusa.

⁵Ari ulug yunggultuk latusama anden yet harukmen Allah ibam poholma werehon o sabo wene haharoho werehon sok husurukmu yet harikik.

⁶Sok ino ele keyen malaikat sabiren ap siyahap eneptuk angge alem men Allah ibamen wilip atukmu yer isarikik. It arimano enesum fanowon yanggowon umbagpag turukon wan teg lit unubahare ke ili ruruk ahele fam nunggulig pug teg latusa.

⁷Malaikat itano wilip atukmen lebe ruruk angge uhan itano misihen kubag ili rurukon enebe wal taneg og isarisi. Kubag arimano fam Allah mondabi welaruhuwon inowen olok haruk ane keleg toho pilabeg latisi.

⁸Allah ine roho palimu werehon ibam ulug hubu lahaptukmu hubuwen o ino hondo reg latisi. Ap siyahap eneptuk ane alem sabiren arimano teko la fugmu ap misihen oho Allah ibam ino kuk fug teg latisi.