Read Angguruk Yali WAHYU 17 Bible Online

WAHYU 17 - Angguruk Yali bible

WAHYU 17

¹Tot weregman malaikat sabiren kubag sabiren seneg latuson itano misig an nambeg waharisireg ele uruk lit, ”Hiyap yaying turuk latisiyon ino ik eleruk fulok-falok toho wilip atuk ambeg heriyeg latisiyon ino fam alem ubam atisiyon fahet hiyag hitminen tiya ma!

²Ap suwon kinangma werehonen hiyap ari men pabi ril noruk latusama ap kinangma werehon arimano ik olokon pabi turuk ahik ino hinang isarisimu narusareg nenek turuk latusa,” irisi.

³Irisimu Allah hime fanowon inowen an farema hondog naptug larisimu yet harukmen pak humon oruk huluwon emberimu hiyap eke heriyeg latisi. Pak ino unggul sabiren tegma andimbuk numen teg lit ebene ununuk Allahn siyag perukon anggolo hahareg latisi.

⁴Hiyap ino sum mut men polu men fam palehon wan tegma ili ruruk angge men ilembani umbagpag turuk angge men helep anggen umbagpag turukon il asinandi turukon men lahabeg latisi. Lahabeg lit inggikmu kubag ili rurukon eke senegma kubag ino fam pabi ruruk angge olohulong kilabeg latisi.

⁵Ilahuwagma unuk misig awiya waruk ane hahareg latisi. Hahareg latisiyon ino, ”Babel suwon yaying turuk hiyap men siyag-siyag angge kinangma werehon men inisinga,” ulug hahareg latisi.

⁶Yet harukmen hiyap inowen Allah umalikisi fanowon men Yesus wene hiyag isaruk latusa inap enemep hinang tarisireg nalug nenek turukmu yet harikik. Yet haruk lit yihi ulug nindi anggin toho welatikik.

⁷Nindi anggin toho weregma malaikat inowen an nubam ele uruk lit, ”Nungge fahet hindi anggin toho welahen? Hiyap ino men pak suwon emberimu hur atukon ino unggul sabiren andimbuk numen ino men fahet mapmu roho werehon fahet fag toho hiyag hitnin,” irisi.

⁸”Pak haruk lahenon ino welatisi angge famen eleg atisi, ketiya re wereg eleg. At ino turuhun elma ap war atuk ambeg inowen lahik waruhureg nin at ino mondabi siyag atuk ambeg lahu. Ap kinangma werehon pohol kinang atam wal turukmu suwesingga fanowon fam ununuk imbibag fuhon arimanowen yet hahupteg enekol hahup. Pak ino welatisiyon eleg atisi angge famen nin inam aruhumu yet hahupteg enekol hahup.

⁹Alem palimu werehon tu: Indi anggat teg lit werehon inowen oluk teg lamag! Unggul sabiren arimano punu sabiren weregma hiyap ino palimu heriyeg lit wereg. Unggul sabiren itano ap suwon sabiren wereg.

¹⁰It sabiren itano fuwaben wamburusama falfalikon weregma sabiron lahik waruhu. Sabiron ino lahik waruhureg ilamna welaruhuwon fahet inam aruhu.

¹¹Pak ino welatisi angge famen eleg atisiyon ino ap suwon likinon wereg. At ino likinon wereg angge famen it sabiren itano sehelimu at misig wereg lit mondabi siyag atuk ambeg lahu.

¹²Andimbuk numen yet hehenon arimano ap suwon numen uwan in amuhubon wereg. In amuhupteg pak ino men mangno roho inineyap enebuhupmu palimu weregma mo il misig lahu.

¹³It arimano inindi misig toho enele misig uruk lit pak ino ineyap turuk lit palimu unduhuk fuhup.

¹⁴Unduhuk fuhupmu it arimanowen domba umalik ino men tog abul puhup angge famen Aren it apmayap enebuhu. Ap arimano kinangma wereg lit palimu welahe perukon arimano palimu At wereg, ap iniknisi roho werehon fahet Inikni At wereg. Domba umalik inowen wol eneptisireg hiyag eneptisiyon arimano inindi wirik toho At men ambiyeg welamuhupteg At men mangno roho palimu amuhup,” ulug malaikaren hiyag nutuk latisi.

¹⁵Nin eke hiyag nutuk lit, ”Ik eleruk wilip atuk ambeg hiyap yaying turukon heriyegma yet hehenon ino o pumbuk men ap palu roho werehon men enele wal taneg urukon men inibam wal taneg werehon men fahet yet hehen,” ulug hiyag nitisi.

¹⁶”Pak ino fam andimbuk numen yer esehenon itanowen yaying turuk hiyap ino ninirim uhupteg siyahap turuk lit asum hog toho hik isahupteg abiye weregma unu sali heheg nahupteg indokma hik isahup.

¹⁷Inindi misig toho wereg lit Allahn peruk ane turuk lamuhup ulug Allahn inindi selehap eneptisi. Selehap eneptisimu Allahn perisi hag toho ininggikmu seneg latusa angge ino pak wimbi fam emberuk lit palimuwap tuhup. Allahn irisi ane uwan teko la fugmu at palimu welaruhu.

¹⁸Hiyap yet hehenon ino o pumbuk suwon ino ap suwon kinangma werehon obog toho ki enesug lit werehon ino yet hehen,” ulug hiyag nitisi.