Read Angguruk Yali WAHYU 22 Bible Online

WAHYU 22 - Angguruk Yali bible

WAHYU 22

¹Nin winon eke an nubam unug haruk lit Allah men domba ino men lehoma hur atuk ambehen wilip atisiyon ik il wirik anggolowon aben narukmu onoluk eneg welamuhup ahik ino unug harisimu harikik.

²O pumbuk ino honggolegma ik ayeg fumag-fumag e anggen aben narukmu onoluk eneg welaruhu ahen wilibig latisi. E arimano pikalem inam atukmu eneg mo misig fam nisanggowenam anggen yihik feruk latusa. E inggila arimano fam ap o pumbuk obog toho hihir eneptukon welatisi.

³Allahn ubam siyag urukon ap misig oho o ino fam welaruhu fug. Allah men domba ino men lehoma hur atuk ambeg o pumbuk ino sehelimu weregma enemingmingangge arimanowen unubam sembahyang uruk lit

⁴Allah orohole yet harukmu it inilahuwagma At unuk hahareg lamuhup.

⁵O hup am fug angge welaruhumu iral men mo umbagpag men turuk lalep puhup fug. Ninikni Allah inowen it unubam selehap enebuhumu it suwon toho palimu wereg lit ap winon mingming eneptukmen eneg welamuhup.

⁶Ari yet harikikmu malaikat inowen nubam ele uruk lit, ”Hiyag hutuk lahiyon aru tem toho uruk lahi. Allah inowen amingmingangge wene hiyag isaruk inap hime fanowon og isaruk. At inowen tot welamuhukmu aruhu ane fahet it unubam unug isamin ulug malaikat monde ferisi,” ulug hiyag nitisi.

⁷Hiyag nitisimu Yesusen ele uruk lit, ”Tot welaruhukteg tem toho waruhuk. Nei fulu roho warikin ane haharoho emberuk lahenon holuhup inap arimano enehiyeg toho welamuhup,” ulug hiyag nitisi.

⁸An Yohanes welahiyon inowen mun ane man ane harikikteg obog toho nubam irisi ane arimano fahet malaikat ubam sembahyang imin ulug alukema hur atikik.

⁹Sembahyang imin ulug turukmen aren, ”Ari timihin fug,” il laruk lit, ”Hat men hori wene hiyag isaruk inap nabi men buku ari fam haharehon holtuk inap men hag toho an oho Allah amingmingangge welahi. An nubam sembahyang uk fug tehen Allah fam eneg sembahyang uruk lamin,” irisi.

¹⁰Ari irisireg, ”Fobik aruhu ane horog tehen suwesingga fam haharoho wereg ane ari enehangge emberuk lit seleben toho umbuk fug,” irisi.

¹¹”Ap san siyag ane turuk halug at inowen turuk lamag. Ap san sabelep ubam umbat taruk halug at inowen umbat tawag. Ap san pikir ane turuk halug at inowen pikir ane eneg turuk lamag. Ap san fano roho wereg halug at inowen fanowap taruk lamag.

¹²Tot welaruhukteg waharuk lit ap siyag ane fano ane turukon arimano hikit toho onggo walug waruhukon ari fam ayeg war isahuk.

¹³An te A men O men welahi, atam waharik iyahon An, obog-obogma welaruhukon oho An, alemet ondomiyet An welahi.”

¹⁴Sum enebemon umag tarukon arimanowen enehiyeg toho welamag. It arimanowen e anggen nalug onoluk eneg wereg ahen ino na hag tehen elehet sok ino fam o pumbuk ino kuruk lamuhup.

¹⁵Olomene siyahon men pamongge watuk inap men ap hiyap yaying turukon men ap unusurukon men muruwal turuk inap men sibiling-sibiling ane uruk inap men it arimano kuk fug tehen selma welamuhup.

¹⁶An Yesus inowen malaikat monde ferikikmu hit henembeg waharisireg Allah umalikisi winon obog toho aru onoluk aruhuwen hiyag hisarisi. An Dauren ondohowonen indag nasuhon ahanuk hag toho welahi. Wap yali filen lahik waharuk lit umbagpag turukon hag toho An welahi,” irisi.

¹⁷Allah hime fanowon ino men hiyap ap hilahuk peruk hiyap ino menen, ”Ma!” ulug wol turuk. Wol turukmu holtukon inowen oho, ”Ma!” ulug wol turuk laruhu. Ik obok toho wereg lit namin perukon waruhureg ik eleruk fanowon aben narukmu onoluk eneg welamuhup ahik ino saplangge hinang tahu.

¹⁸Fobik aruhu ane suwesingga aru fam hahareg lit werehon holtuk inap unubam imin ane tu tem toho imin: Ap ekeyen amu ane buku aru fam lombohap turuk halug at ubam oho Allahn alem amuwon siyahon buku tu fam harikikon arimano lombohap tuhu.

¹⁹Ap ekeyen fobik aruhu ane buku aru fam hahareg lit werehon elehap turuk halug buku aru fam haharoho werehon e anggen narukmu onoluk eneg wereg ahen ino men o pumbuk fanowon ino men ubam werehon Allahn taluk toho hilahu.

²⁰Obog toho aru tem ane ulug hiyag hisarisiyon inowen ele uruk lit, ”We tem An folo-folo waruhuk,” irikim, ”Nonowe Yesus, nit nenembeg waruhun. Amin!” uruk.

²¹Nonowe Yesus inowen hit obog toho indi henesug lit welaruhu. Amin.