Read Angguruk Yali WAHYU 4 Bible Online

WAHYU 4 - Angguruk Yali bible

WAHYU 4

¹Ele hiyag nitisimu itano yet harukmen poholma kurukon sok husigmu yet harikik. Yet harukmen ele tam urukmu holtikikon ino waruk ele hag toho uruk lit, ”Fobik aruhu ane fahet hubam unug haminen tiya lahik ma,” irisi.

²Ari irisimu Allah hime fanowon ino nubam atisireg yet harukmen hur atuk angge palimuwon misig poholma unduhukmu Ap misig heriyeg lit welatisi.

³Ap heriyeg latisiyon ino helep sili umbagpag turukon hag toho men ip orohole hahon men wereg latisi. Hur atuk angge ino kaliye ahikal piyanu palehon hahonen mase roho kilabeg latisi.

⁴Hur atuk angge uhaneg fumag arimanowen misig ino walingguruk latusa. Hur atuk angge walingguruk latuson arimano fam ap iniknisi rohon enesum yanggowon wan teg lit ununggul hobog ili ruruk angge pug teg lit heriyeg latusa.

⁵Hur atuk angge pulmu werehon ino famen lebeglu men pinelu men ululu men wilip atuk latisi. Aluke fil iral sabiren ambulpul turuk latisi. Iral itano Allah hime fanowon sabiren wereg.

⁶Hur atuk angge alukema ik il wirik anggolowon umbagpag turukon yenggeleg latisi. Iraham ke walinggoho lebe ruruk angge uhan eneluke filet enembol filet inilanggen eneg ololop tehon unduhuk latusa.

⁷It unduhuk latuson arimano atamon olomene olokon singa hahon weregma pirenehon sapi hahon weregma hinahanehon ap orohole hahon weregma uhanehon suwe tunguni lam-lam larukon hahon welatisi.

⁸Welatusa angge uhan itano enebe wal taneg eneherabul falfaliken heheg wilibig latusa. Enebene undama filet selma filet inilanggen eneg ololop toho wilibig latisi. Yuwag toho welam fug angge ilingge hundig hup hundig enele uruk lit, ”Ninikni we At eneg welatfahon werehon waruhuwon Ninikni fano, Allah fano, At palimu werehon fano,” uruk latusa.

⁹It lebe ruruk angge uhan itanowen hur atuk angge fam heriyeg lit werehon mondabi oluk welaruhuwon ino ubam enele uruk lit, ”Ninikni hat fano,” ulug wel turukmu

¹⁰iniknisi rohon uhaneg fumag welatuson arimano hur atuk angge ino alukema hur arik wamburuk latusa. At mondabi oluk welaruhuwon ino fam sembahyang uruk lit ununggul hobog ili ruruk angge lisoho hur atuk angge alukema hik isaruk lit enele uruk lit,

¹¹”Ninikni Allah, mun angge man angge Haren wal tinag. Haren eneg tam ari perik inahon famen mun angge man angge wereg atfag. Wereg atfagma Hat eneg wel haptuk lit hi habuk teg, Hat eneg palimuwap habuk teg,” uruk latusa.