Read Angguruk Yali WAHYU 7 Bible Online

WAHYU 7 - Angguruk Yali bible

WAHYU 7

¹Anden yet harukmen kinang atog fumag-fumag malaikat uhan unduhuk lit siyelu tom fam ik fam e fam fu ruruk laruhu fug ulug iren ki regma yet harikik.

²Mo lahik waharuk ambeg malaikat winon eke inam atisireg Allah oluk werehon inowen tohon enehangge walug waharisi. Waharisireg malaikat uhan itano tom men ik men siyahap tuhup ulug atog fumag-fumag in eneptuson itano fam enele hi roho uruk lit,

³”Allah umaliki enehangge inilahe umag enebuk fugmu tom men ik men e ohi men siyahap tuk fug,” uruk latusa.

⁴Uruk latusama anden hol harukmen it Israel inap famen ondoko laruson arimano enehangge inilahe umag eneptuson obog toho mangno roho teng-teng angge teng nisanggowen 144.000 winag isaruson holtikik.

⁵Ununggul unuk wal taneg werehon enehangge unubam emberuson teng-teng angge 12.000 welatusa. Ununggul unuk Yehuda enehangge unubam emberuson teng-teng angge, ununggul unuk Ruben teng-teng angge, ununggul unuk Gad teng-teng angge,

⁶ununggul unuk Asyer teng-teng angge, ununggul unuk Naftali teng-teng angge, ununggul unuk Manasye teng-teng angge,

⁷ununggul unuk Simeon teng-teng angge, ununggul unuk Lewi teng-teng angge, ununggul unuk Isakhar teng-teng angge,

⁸ununggul unuk Zebulon teng-teng angge, ununggul unuk Yusuf teng-teng angge, ununggul unuk Benyamin teng-teng angge 12.000.

⁹Anden yet harukmen ap anggolo enebe winag isa fug toho weregma yer isarikikon arimano o pumbuk wal taneg werehon men ununggul unuk wal taneg werehon men inibam wal taneg werehon men enele wal taneg urukon obog toho arimano men palu roho lehoma hur atuk ahun ino men domba umalik ino men enelukema unduhuk latusa. It arimano sum yanggowon wan teg lit uluwa inggila ininggikmu wal taneg seneg latusa.

¹⁰Ari regma enele hi roho uruk lit, ”Ninikni Allah lehoma heriyeg lit werehon men domba umalik men nit windat neneptukon itano hi eneptuk lahe,” uruk latusa.

¹¹Ari urukmu lehoma hur atuk angge men iniknisi roho werehon men lebe ruruk angge uhan itano men weregma malaikat obog toho arimanowen it walinggoho kilap enesug lit kinangma ying atusareg Allah fam sembahyang uruk lit,

¹²”Amin! Ninikni ulug Allah wel turuk lit At palimuwap tuhup. Mun angge man angge alem At oluk tehen Ninikni uruk lamuhup. At ine werehon hi ruruk lit palimuwap turuk lit eneg welamuhup. Amin!” uruk latusa.

¹³Ari uruk latusama iniknisi roho werehon misihen an nubam ele uruk lit, ”It sum yanggowon wan tohon arimano kema inap, kema filen waharusa?” ulug kapal niyarisimu

¹⁴anden at ubam, ”Nikni, hat holuk,” irikik. Ari irikikmu aren an nubam, ”Ap aruma inindi anggin toho welatusareg wilip atuson wereg. Wam domba umalik ino mep fam enesum umag tarusama enesum yanggo atisi.

¹⁵Enesum yanggo atisimu it aruma Allah lehoma hur atuk ambeg alukema unduhuk lit likiya hupmu Allah ibamen let turuk lit wereg. At lehoma werehon inowen it palimu ungga sal enebuhu.

¹⁶Ungga saleg lit weregma suburu obok ik obok ha fug angge molok ha fug angge indok ambiyang ki ruk fug angge welamuhup.

¹⁷Wam domba umalik lehoma iraham werehon inowen it fer enesug lit ik eleruk fanowon mondabi onoluk welamuhubon fahet hondog eneptuk laruhu. Allahn it uba yatukon onggon eneptuk lit uba sumag eneptuk laruhu,” ulug hiyag nitisi.