Read Angguruk Yali WAHYU 9 Bible Online

WAHYU 9 - Angguruk Yali bible

WAHYU 9

¹Malaikat fuwabon inowen waruk teltukmu anden yet harukmen suhal misig poholman kinangma wambik waharukmu yet harikik. Turuhun elma war atuk ambeg husuruk angge inggikmu og utusa.

²Turuhun ele ino husurukmen indok hubu muhul elma inowen wilip atuk lit mo men pohol men indok hubu inowen hililip tirisimu hik atisi.

³Hubu ino famen herenangge anggolo hik heheg wilip atuk lit it arimano kirimbul onolokon ayeg hag toho welatusa.

⁴Herenangge arimano fam hiyag isaruk lit hoholangge men inggilangge kinangma wilip atuk angge men e inggila men na fug, we ap Allahn tohon enehangge inilahe ik umaho elehon eneg fato eneptuk lamuhup.

⁵Fato eneptuk lamuhup ulug hiyag isaruk lit pinggi unusuk fug angge enehap selma eneg fato enebil larukmen eneg pikalem fuwaben aruhu. Fato eneptukmu ouk hahup ane kirimbulen ap fato eneptukmu ouk turuk hag toho ouk eneptuk laruhu.

⁶Ari turuk lamuhupmu ap arimanowen enehap ouk-ouk war ala peruk lit war atuk ane yami ruhup angge famen hiyahakup fug, eleg ala puhup angge famen eleg amuhup fug.

⁷Herenangge arimano aben tog abuk oho lit wam kuda emberimu laruk hag toho wereg lit ununggul hobog ili ruruk angge hobog teg lit onorohole ap onorohole hag latusa.

⁸Onoruk hiyap onoruk yaron hag tegman eneyeg olomene ayeg hag tegma

⁹enemig sing wan teg hag latusa. Eneherabul aplohok tog abuk oho lit wam kudan kou lisulug larukmu uyug aplohok turuk hag latusa.

¹⁰Eneheye kirimbul olombik hin morog teg hag toho teg latusa. Onolombik atog ine fam ap unusil larukmen eneg pikalem fuwaben atuk.

¹¹Malaikat turuhun ele forohowon ino it inikni wereg. Malaikat ino unuk Ibrani enele fam Abadon suwalegma Yunani enele fam Apolion[1] suwaleg.

¹²Fong watuk ane atamon teko larisimu pirenehon men hinahanehon men fong watuk ane teko lahu.

¹³Malaikat falfalikon inowen waruk teltukmu anden hol harukmen andimbuk uhan hubu lahaptuk ambeg ili rurukon Allah aluke fil werehon fam wilibihon ino feneyen ele urukmu holtikik.

¹⁴Hol harukmen malaikat falfalikon waruk senehon ino fam uruk lit, ”Ik suwon Efrat ayegma malaikat uhan hele wareg lit werehon itano lol enebin,” urukmu holtikik.

¹⁵Ari irisimu malaikat uhan itano mo ari fam pikalem ari fam hup sakan ari fam ap kinangmon minggiroho pinggi unusuhup ulug sali winako foroho latuson itano lol enebik larisi.

¹⁶Lol eneptisiyon itano sehen seneg inap wam kuda emberimu heriyegma teng-teng angge mondeg angge waharuk latusa. Teng-teng angge 200.000.000 wereg ulug winaharukon holtikik.

¹⁷Anden fulu roho yet harukmen wam kuda emberimu ap anggolo heriyegma enesing wan teg latuson arimano sing il indok ambulpul hahon men piyanu paleg lit hubu mik-mik angge turuk hahon men puhulik palehon men wan teg angge waharukmu yer isarikik. Wam kuda ununggul arimano olomene olokon hag tegman enembilik ele keyen indok ambulpul men hubu men kinang ahe amben siyahon hag toho wilip atuk latisi.

¹⁸Wam kuda enembilik ele keyen wilip atuk latisiyon arimano indok men hubu men ahe amben siyahon men wilip atuk lit tohen hag toho ap minggiroho arimano waroho lin isaruk latisi.

¹⁹Wam kuda arimano enembilik men eneheye men inine anggolo reg latisi. Eneheye arimano pisanggo hag teg lit ununggul weregma eneyeg arimanowen ap anggolo siyahap eneptuk latusa.

²⁰Siyahap eneptuk latusa angge famen ap winon war atusa fuhon arimanowen ininggik fam siyag ane turuk latuson arimano embeserusa fug. Mungguwat siyahon fam usa ane turuk lit ili ruruk lit umbagpag turuk angge iren laltuson arimano fam usa ane turuk lit posiyemanggen men e men helep men laltuson inilen yet ha fug tohon inisanggowen holuk fug tohon unuwag la fug tohon wereg angge famen ninikni uruk latusa.

²¹Iren ari turuk lit ap pinggi watuk ane men pamongge unusuruk ane men pabi ruruk ane men yoholiyangge waruk ane men obog toho embeseruk latusa fug.