Read Angguruk Yali Rut 2 Bible Online

Rut 2 - Angguruk Yali bible

Rut 2

¹Naomi ahun Elimelekh are ununggul unuk misihon eke unuk Boas tung ahun welatfag.

²Weregma Moab hiyap Rut inowen iyamalhe Naomi fam hiyag utuk lit, ”An laminmu ap misihen indi niyamisi halug ap ino iyabukmu amingminganggeyen roti anggen paltukmu loloho wamburukon andog tik lamin,” ibagma Naomi inowen, ”Nahaloho, fano lamihin,” ibag.

³Ibagma Rut ino Elimelekh are Boas anggema ulug fuki roho oluk teg eleg angge famen Boas iyabukmu libareg otsiyen roti anggen paltukmu loloho wamburukon ondoltuk latfag.

⁴Ondoltukmu Boas ino o Betlehemen yabukmu watfareg amingmingangge roti anggen paltukon arimano unubam, ”NINIKNI Allahn hit fet henesug laruhu,” ulug hi enepfagma iren hebeloho, ”Ninikni, har oho Allahn let haptuk laruhu,” ulug hi ribag.

⁵Hi ribagma Boas inowen amingmingangge onowe ino fam, ”Hiyap ari kema hiyap?” ulug kapal hibagma

⁶amingmingangge onowe inowen te, ”Hiyap ari o Moab hiyap he Naomi men tuma waharisiyon.

⁷Aren te, ’Humalikisi onombolim laruk lit roti anggen het toho emberukon seheli ke loloho wamburukon anden ondol tamin,’ ulug heng nabehekteg o likiya ak tehekteg kel ta fug angge ondoltukmen eneg we ketiya tot kel tamin ulug o saboma heriyeg,” ulug hiyag itfag.

⁸Hiyag itfagma Boas inowen Rut fam ele uruk lit, ”Nahaloho, anden hubam iminon tu holeg lamin! Yabuk anden tohon tuma embeselug yabuk amuwon fam roti anggen ondolik lamihin fug! Tuma ondoltuk lit an namingmingangge hiyap roti anggen paltil laruk isalug onombolim lamihin. It embeselug la fug angge iniraham eneg welatmihin. Ik obok haptuk halug kubag an namingmingangge ap umaliken ik hinanggoho emberukon na lamihin. An numalikisi unubam, ’Hiyap ari sen ha fug,’ ulug komo enebihireg hakol eleg toho lamihin,” ulug hiyag itfag.

¹⁰Ari ulug hiyag itfagma Rut ino aluke pilabeg kinangma sahun atfareg Boas hi ruruk lit, ”An hiyap pohon famen nungge fahet hindi niyaruk lit an let naptuk lahen?” ibag.

¹¹Ibagma Boasen hebeloho, ”Aben hat fahet hiyag nutuk lit, ’Hiyap ari ahun war atisimu iyamalhe ubam fano ane eneg turuk lit ikni isinga embeselug endetusa ambeg oho embeselug ap indam isarisi fuhon wereg ambeg waharisi,’ ulug hiyag nutukmu holtikik.

¹²Haren tirikin ane fahet NINIKNI Allahn hebeloho let habuhu. Israel inap INIKNI apma yuwag toho welaruhuk ulug waharikinmu onggo anggolo og huruhu,” ulug hiyag itfag.

¹³Hiyag itfagma Rut inowen te, ”Nikni, an hiyap hat hamingmingangge werehon tuma hag toho welahi fug angge famen haren an hindi neyehenteg an nindi anggin toho weregma fano ane nubam uruk lit nindi seyap nabehen,” ulug hiyag itfag.

¹⁴Suburu naruk li horog atfagma Boas inowen Rut fam, ”Suburu nulen ma! Roti anggen fanowon sak amug fam pila felug namihin!” ulug hiyag itfagma Rut ino amingmingangge yabuk warukon arimano iniraham hur arik watfag. Watfagma Boas inowen roti anggen fano roho wiratfahon Rut og itfagma nibareg ahum ouken winon minggiroho imbibag.

¹⁵Imbibareg Rut ino nin roti anggen ondol tamin ulug libagma Boas inowen amingmingangge hiyag isaruk lit, ”Hiyap ariyen roti anggen het toho emberuk lahebon seheli ke ondol tarukmu pet turuk lit inggaliyap tilihip fug! Roti anggen het tohon at ondol tawag ulug misig-misig lisoho pila feselihip,” ulug hiyag isibag.

¹⁷Hiyag isibagma Rut inowen roti anggen ondoltukmen eneg o hupmu atfagma roti anggen ondolfahon arimano fuk harukmen anggen loloho wambibahon arimano sum misig 10 kilogram atfag.

¹⁸Atfagma Rut inowen sum fam fani roho walug o pumbukmu libareg ondolfahon arimano iyamalhe fam unug hibareg Rut inowen naruk lit minggiroho imbibahon ino oho hinanggoho iyamalhe Naomi og itfag.

¹⁹Og itfagma Naomi inowen kapal haruk lit, ”Yoho kema lahenteg roti anggen aruma ondolehen? Ap hat indi heyehekon Allahn let tuhu,” ibagma Rut inowen, ”O yoho yabuk roti anggen ondolihi ambeg ino ngi ahun unuk te Boas,” ulug hiyag itfag.

²⁰Hiyag itfagma Naomi inowen Rut fam, ”Hun Boas ino an namloho wereg angge re aren nit fet nenesug laruhu. NINIKNI Allahn ap onolukon warehon umbusuk fug angge indi enesug lit werehon inowen Boas ino indi reg laruhu,” ibagma

²¹Rut inowen te, ”Hun inowen nin eke hiyag nutuk lit, ’Hat an namingmingangge roti anggen paltil larukon iniraham ondol tarukmen eneg obog toho paluhup,’ ulug hiyag nerehek,” ibag.

²²Ibagma Naomiyen Rut fam, ”Nahaloho, ap yabuk amumu waruk inaben siyahap habuhup tohon Boas amingmingangge hiyap arimano iniraham eneg ondolik laruk laruhun,” ulug komo ribag.

²³Komo ribag ane roho Rut ino Boas amingmingangge hiyap arimano iniraham wereg lit roti anggen ondoltukmen roti anggen we tot fanowon tam paltukon famen tulug fobik fano anggolowon paltukon arimano obog toho paltuk latfag. Roti anggen paltuk latfag li itano Rut ino iyamalhe Naomi men welatfag.