Read Angguruk Yali Rut 3 Bible Online

Rut 3 - Angguruk Yali bible

Rut 3

¹Welatfareg misihim Naomi inowen iyamalhe Rut fam ele uruk lit, ”Nahaloho, hat hahun hilahunteg fano roho welaruhunen let habuhuk peruk lahi.

²Hiyap hat men ambiyeg yabukmu welahebon inikni Boas ino an namloho werehon hat holuk. O yoho hubanggo roti anggen alinglongangge embeseruk lit ebe waruk ambeg ino at waruk lit welatmisi.

³Wereg lit tehen hat hahap ik umag talug amben fano angge hebene are ramihinteg sum fanowon wan toho roti anggen waruk ambeg lamihin. Lamihinteg at suburu men ik men uwan na fug lit yet hiyahu rohon at wereg ambeg inam arik la fug.

⁴Inam am fug angge at nohik lamisi ambeg fuki roho kim hamihinteg at nohorukmu iraham lamihinteg sum uyug fil saloho nohoruk latmisiyon leg halug nohik kimihin. Nohik kimihinmu haren timihin ane hun inowen hat hiyag hitmisi,” ulug hiyag itfag.

⁵Hiyag itfagma Rut inowen, ”Ehen ane hikit toho anden timin,” ibag.

⁶Ari ibareg Rut ino roti anggen waruk ambeg libareg iyamalheyen hiyag itfag ane hikit toho tibag.

⁷Boas ino suburu men ik men nibareg indi ahiyeg toho nohomin ulug roti anggen het toho imbibahon iraham nohik libag. Nohik libagma Rut ino liplap at nohorukmu iraham libareg sum Boas uyug fil saloho nohoruk latfahon ino leg halug nohik kibag.

⁸Nohik kibagma hup humanoho hun ino lagmag in atfareg iraham ke fag harukmen hiyap eke uyug fil nohorukmu sen hibag.[4]

⁹Sen hibareg kapal haruk lit, ”Hat sa?” ibagma hiyap inowen, ”An Rut hat hamingmingangge nohoruk lahi. Hat an niyamalhe amloho wereg lit fet nasug laruhunen hat haherabul apma welaruhuk ulug wahi,” ulug hiyag itfag.

¹⁰Hiyag itfagma Boas inowen, ”Nahaloho, NINIKNI Allahn hat hubam fano ane eneg tuhu! Haren hiyamalhe fam fano ane turuk latikinon we tot apma regma yoho an hiyamalhe amloho welahiyon hindi neyehenteg nubam turuk lahenon aru mondabi palimu reg. Hat ap kabiniyon enenggengge werehon enengge elehon enesehelimu ap eke hilamin ulug yami enebil la reg lahen angge famen laruk lahen fug.

¹¹Ari fahet nahaloho, hakol ha fug! Ap o pumbuk tu fam wereg inap obog toho hat fahet hiyap tu ubabut fano ulug onoluk atisimu haren nubam ehen ane obog toho anden hubam tuhuk,” il laruk lit,

¹²”An hat hiyamalhe amloho welahireg fet hasug lale angge famen ap misig hit men horog toho werehon inowen fet hasug laruhu ano ulug yet hahuk.

¹³Ari fahet hat hup aru tuma nohomihinmu sono likiya anden ap ino kapal ha lahukmu aren te hiyap ino an hilamin uhu halug fano og habuhu. Nirim uhu halug anden og habuhuken Allah oluk werehon olohotma tem toho hiyag hutuk lahi,” ibareg, ”Noholug likiya lahun,” ulug hiyag itfag.

¹⁴Hiyag itfagma Rut ino Boas uyug fil nohorukmen sakan tibagma Boas inowen hiyap roti anggen waruk ambeg nohik waha ulug ap winon onoluk aruhu rohon lawag pibag ane roho hubet o hik tegma aben yet ha fugmu in atug libag.

¹⁵Lamin ulug turukmen Boas inowen Rut fam, ”Sum suknig lahenon ari keroho embemihinteg ele piyare femihin!” ibagma Rut inowen sum ino keroho imbibareg ele piyare fibagma roti anggen we tot fanowon sum keleg toho 20 kilogram yuhat itfareg Rut unggulmu sukni felug Boas ino o Betlehem pumbukmu libag.

¹⁶Boas larukmu itano Rut ino oho iyamalhe Naomi ambeg watfagma Naomi inowen, ”Nahaloho, ke roho tehen?” ulug kapal hibagma Rut inowen Boasen ubam tibag ane obog toho Naomi hiyag itfareg nin eke hiyag utuk lit,

¹⁷”Boas inowen hiyamalhe ambeg hebe eneg lamihin fug ehekteg roti anggen sum keleg toho yuhat nerehekma walug wahi,” ulug hiyag itfag.

¹⁸Hiyag itfagma Naomi inowen Rut fam, ”Nahaloho, hun Boas inowen alem aru haloho umbul ulug yami rurukmen o yoho eneg kong toho embelusa lit tehen hat tuma heriyeg lit welatmihinmu ulusa ane holuk atmisi,” ulug hiyag itfag.