Read Angguruk Yali Rut 4 Bible Online

Rut 4 - Angguruk Yali bible

Rut 4

¹Boas ino elehet o Betlehem walinggoho ohowon sok kuruk ambeg libareg[5] heriyeg lit yet harukmen ap misig hit men horog toho werehon ulug Rut hiyag itfag ahun ino waharukmu yet hibareg Boas inowen, ”Nare, an niraham hur arik ma!” ulug wol tibagma ap ino hur arik watfag.

²Hur arik watfagma Boas inowen o Betlehem inap onowesi numen hondog enepfareg, ”Nenele ulen hir oho hur arik maniyek!” ulug hiyag isibagma ir oho enembeg hur arik watfag.

³Ambiyeg hur atfareg Boas inowen are tam wol tibahon ino fam ele uruk lit, ”Naomi ino o Moaben suhuloho waharisireg kinang at ahun Elimelekh nit nenere inowen tohon ap winon hiyag isahukmu iren an onggo og numuhup peruk.

⁴Alem ari fahet wenggel hihireg anden hiyag hitminon tu holeg lamin: Kinang ino an aruhuk peruk lahen halug haren ap suwon-suwon tuma heriyehon iniline fag toho imihin. Nirim pemihin halug an nubam hiyag nitmihin. Kinang ino hilawon we nit nenebe piren welahe angge famen anden hat pisan hiyalug kinang ino hilihi ha fug tehen haren imihinon an holmin,” ibagma ap inowen, ”Kinang ino an hilahuk,” ulug hiyag itfag.

⁵Hiyag itfagma Boas inowen hebeloho hiyag utuk lit, ”Kinang ino Naomi inggikmuwen hilahun sambil ino Naomi amloho war atisiyon Mahlon uhe Moab hiyap Rut ino oho hat og humuhup. Rut ahun war atisiyon ubalmangge hunumalikisi indag enebuhubon arimanowen kinang ino seneg lamuhuben haren kinanget hiyap inowet hilahun,” ulug hiyag itfag.

⁶Hiyag itfagma ap inowen, ”Ari halug, yabuk Elimelekhen tohon haloho emberuk lit anden tohon haloho imbihi ha fug nowen kinang inowet hiyabet an hila fug teg lahi. Haren at hilamisi pehen angge famen hat hilahun,” ulug hiyag itfag.

⁷Indam Israel inaben kinang ayeg waroho hilaruk lit nenele arat kong toho embehereg enehangge tu emberuk lahe ulug kinang ngi ahun inowen uyug hililip angge fima filon hog toho kinang og itmin peruk ahun ino og utuk latfag.

⁸Indam turuk latfag ane ari hikit toho ap inowen Boas fam kinang ino hat hilahun ulug hiyag itfareg uyug hililip angge hog toho Boas og itfag.

⁹Og itfagma Boas inowen ap suwon-suwon heriyeg latfahon men ap obog toho welatfahon arimano men unubam hiyag isaruk lit, ”O yoho hit hiniline hun Elimelekh umalikisi Mahlon men Kilyon menen enenggengge lin isaruson Naomi inggikmuwen an hilaruk lahi.

¹⁰Moab hiyap Rut hun Mahlonen lin isarisiyon ino oho an hilaminteg at war atisiyon ubalmangge indag enebuhukmu iren kinang ino ngi roho seneg lamuhup. War atuson ununggul unuk ino it onori men o pumbuk tu wereg inap men enesehelimuwen eleg am nowen hilahuk ulug o yoho hit hiniline uruk lahi,” ibag.

¹¹Ari ibagma ap obog toho sok iraham palu arik watfahon men ap suwon-suwon arimano menen enele uruk lit, ”Ehenon ari niren holehe. NINIKNI Allahn hiyap hat hibam kimisiyon ino let turukmu Lea men Rahel menen unumalikisi anggolo Yakub indag itfag hag toho aren oho malik anggolo indag huruhumu hat nununggul unuk Efrata ninap nenesehelimu tung ahun weregman eneg hat hunuk o Betlehem tuma su aruhu.

¹²NINIKNI Allahn hat indi hasug lit weregma hiyap tuhumon inowen malik indag huruhuwon arimano hiyap Tamar inowen iyamal Yehuda indag itfahon Peres inowen ondohowon ununuk su atfag hag toho ir oho ununggul unuk su aruhu,” ulug hi ribag.

¹³Hi ribagma Boas inowen Rut hilibareg ambiyeg nohibagma NINIKNI Allahn pibag ane hikit toho Rut ino malik ahummu atfagma ap umalik indag tibag.

¹⁴Indag tibagma o Betlehem hiyap arimanowen Naomi fam enele uruk lit, ”Allahn o yoho hambiyanga hat fet hasug laruhuwon eke og herehekon fahet NINIKNI Allah wel turuk lahe. Malik ino unuk Israel ninaben suwap turuk lamuhuk.

¹⁵Haren humalikisi ap angge sabiren indag eneplenon itanowen hat let haptuk lalep ane apma regma hiyamalhe aruwen hat indi hiyarisireg malik indag herehek ane mondabi palimu reg. Malik inowen hat hindi hahiyehap haptuk lit sabal aruhunmu hal habuhu,” ulug hi ribag.

¹⁶Hi ribagma Naomi inowen malik ino wibareg ahoma walinggig latfareg wereg lit malik ino foroho latfag.

¹⁷Foroho lit weregma hiyap winon Naomi iraham ke welatfahon arimanowen, ”O yoho Naomi fahet malik ap angge eke indag aha,” ibareg malik ino unuk Obed suwalfag. Obed ino amloho Isai, Isai amloho Daud fobik indag atfag.

¹⁸Daud umbasi ununuk tuma emberuk lahe: Peres amloho Hezron, Hezron amloho Ram, Ram amloho Aminadab, Aminadab amloho Nahason, Nahason amloho Salmon, Salmon amloho Boas, Boas amloho Obed, Obed amloho Isai, Isai amloho Daud indag tibag.