Read Angguruk Yali 1 SAMUEL 1 Bible Online

1 SAMUEL 1 - Angguruk Yali bible

1 SAMUEL 1

¹O pumbuk Ramataim-Zofim ino tom Efraim fam weregma ap misig unggul unuk oho Efraim ahun welatfag, unuk te Elkana. Elkana ikni Yeroham, Yeroham ikni Elihu, Elihu ikni Tohu, Tohu ikni Zuf welatfag.

²Hun Elkana inowen uhesi piren og enesug latfag, misig unuk te Hana, eke misig unuk Penina. Penina ino malik indag tarukmu Hana malik indag ta fug angge ibili welatfag.

³Hun ino mo ilig am wirig am turukmu ibam embeselug o pumbuk Silo inowen NINIKNI Allah pohol ha kinang ha senehon fam sembahyang uruk lit hubu lahabik laruk latfag. O Silo ino hun Eli umalikisi piren Hofni men Pinehas men imam wereg lit Allah ibam foroho latfag.

⁴Hun Elkana inowen sembahyang uruk sambil wam NINIKNI Allah olohotma esetukon arimano uhe Penina men umalikisi ap angge hiyap angge obog toho wal taneg og isaruk latfag.

⁵Og isaruk lit uhe Hana oho minggiroho og utuk latfag. NINIKNI Allahn Hana ino ibiliyap tibag angge famen Elkana inowen Hana indi reg lit welatfag.

⁶NINIKNI Allahn ibili welaruhu pibagma werehon fahet andelaha Peninan Hana indimu siyag toho welamag ulug apmayap turuk latfag.

⁷Ari roho turukmen eneg mo ilig am wirig am turuk latfag. It itano Allah ibam sembahyang ik larukmu o Silo inowen oho Hana andelaha Peninan indi siyahap turukon fahet uba yatuk lit suburu na fug angge welatfag.

⁸Ari roho eneg turuk latfagma ahun Elkana inowen ele ubam uruk lit, ”Hana, hat nungge fahet hindi siyag toho wereg lit suburu na fug angge uba eneg yatuk lahen? Malik ap angge numen indag tele peruk lit an hambolmayap naptuk lahen ano?” uruk latfag.

⁹Misihim sambil o Silo inowen imam Eli ino hur atuk angge Allah ibam sokolma werehon fam heriyeg lit weregma wam men suburu men ik men nibareg Hana in atfag.

¹⁰Indimu siyag toho welatfareg NINIKNI Allah fam sembahyang uruk lit uba eneg yatuk latfag.

¹¹Hanan sembahyang uruk lit, ”NIKNI pohol ha kinang ha seneg lahenonen an hamingmingangge asengseng toho welahiyon Hat holuk. An fahet hapeleg toho welam fug angge we tem toho yet niyaruk lahen halug malik ap angge misig og nuruhun. Og nuruhun halug nin anden malik ino hebeloho Hat fahet og huruhuk. Og huruhukmu malik ino Hat hamingmingangge amusun toho welatug war aruhuwen fili fam oruk paluhup fug,”[1] ulug Allah fam sali imbibag.

¹²Hiyap inowen NINIKNI Allah fam sembahyang yat toho urukmu hun Eli inowen hiyap ino ambilikmu fuki roho yet teg latfag.

¹³Yet haruk lit weregman Hanan ele undaman urukmu ambilik eneg lebe ruruk latfag angge famen at ele holuk fug teg latfagma Eli inowen hiyap tu ik olokon nenggekteg nenek turuk lit uruk peruk latfag.

¹⁴Eli inowen ele ubam uruk lit, ”Hat noenam nenek turuk lit welaruhun? Ik olokon nalug nenek turuk lahenon ari embesemihin,” ibag.

¹⁵Ari ibagma Hana inowen, ”Eleg nikni, an nindimu siyag toho wereg lit uruk lahi. Anggur ahaluwe men ik olokon winon men ninggireg nenek turuk lit uruk lahi fug. An nundama werehon NINIKNI Allah fam hiyag utuk lahi.

¹⁶An hahaloho fahet siyag ane eneg turuk hiyap wereg puk fug. Nindi anggin toho wereg lit siyahon wenggeltuk lahiyon fahet yat toho uruk lahi,” ibag.

¹⁷Ari ibagma Eli inowen, ”Allah Israel ninap Ninikni inowen haren heng ehenon hikit toho og huruhuwen hahiyeg toho lamihin,” ibag.

¹⁸Ari ibagma hiyap inowen, ”Haren an hamingmingangge fahet hapeleg am fug!” ibareg wilip atlug libag. Libareg suburu naruk lit orohole seleg toho welatfag.

¹⁹Elkana uhesi men unumalikisiyet nohibareg hubet in atug sembahyang NINIKNI Allah fam ibareg inibam o Rama libag. Welatfareg Elkana uhe Hana men ambiyeg nohibagma NINIKNI Allahn malik og isamin pibag.

²⁰Ari pibagma Hana malik ahummu atfagma welatfareg malik ap angge indag tibag. Malik tu NINIKNI Allah fam heng irikik ulug unuk Samuel suwalfag.[2]

²¹Suwalfareg weregma mo ilig am wirig am turukmu wina sambil turuk latfag hag toho ino sambil oho hun Elkana uhesi men umalikisi men NINIKNI Allah olohotma wam esebuhukteg nin eke sali emberukukon hikit toho fano-fano angge umbuhuk ulug libag.

²²It larukmu Hana inowen pok atmin pibareg ahun fam hiyag utuk lit, ”Fobik malik tu ag umbusuhu halug hondoholug lahukteg NINIKNI Allah olohotma weregman eneg sabal aruhuwen inggikmu umbuhuk,” ibag.

²³Ari ibagma ahun Elkanan te, ”Ari fano ehenma welatmihin. Ag umbusuhu halug eneg lahun. We NINIKNI Allahn let haptukmu sali emberikinon[3] wirim aruhu peruk lahi,” ibag. Ari ibagma hiyap ino pok atfareg weregma malik ino isinga ag narukmen eneg su atfareg ag imbisibag.

²⁴Ag imbisibagma isingan malik ino hondoholug laruk lit wam sapi yuhambukon suwon endetfag sali mo hinahan atfahon men roti sum misig men kubag anggur ahaluwe kilabehon men walug Allah ibam o Silo libag. Malik ino ebe tor angge hondoholug libag.

²⁵Libareg wam sapi waroho senggelfareg Elkana uhe Hana menen malik ino hun Eli ambeg walug libag.

²⁶Libareg hiyap inowen Eli fam, ”Nikni, an nele we tot hubam imin. An indam nikni hat hirahamen NINIKNI Allah fam sembahyang irikik nuhe inowen yoho aru oho uruk lahi.

²⁷Malik tu fahet anden sembahyang irikikmu NINIKNI Allahn heng irikikon ino hikit toho og nitisi.

²⁸Og nitisimu anden oho malik aru hebeloho NINIKNI Allah og utuk lahi. At iyabuk witukmen eneg sabal aruhuwen inggikmu emberuk lahi,” ibag. Ari ibareg enelenggen fam hur atuk lit NINIKNI Allah wel tibag.