Read Angguruk Yali 1 SAMUEL 10 Bible Online

1 SAMUEL 10 - Angguruk Yali bible

1 SAMUEL 10

¹Libagma Samuelen kubag ahaluwe amben fanowon kilabehon wibareg Saul unggul ke hilili fibareg mako pug toho hi ruruk lit, ”Israel inap fahet ap suwon raja welaruhunen NINIKNI Allahn lahap habehek. Umalikisi Israel inap sen enesug lit haren ap seliyon it walinggoho werehon ininggikmuwen windat eneptuk laruhun. NINIKNI Allahn lahap habehekon ino we tem pemihinen enehangge teko lamisiyon iminon tu:

²Yoho an numbahalug lamihinteg Rahel salfag ambeg Benyamin kinang fam o pumbuk Zelzah werehon horogma itanowen ap piren men salkal ilihip. Salkal ilihipteg enele hubam uruk lit, ’Wam keledai longgo urusama yami eneptikinon itano hiyaharusa. Hikniyen wam keledai itano wenggel ha fug angge, ’Namloho fahet ke roho tuhuk?’ ulug indi anggin toho wenggel haruk lit wereg,’ ulug hiyag humusa.

³Hiyag humusama lamihinteg o Tabor horogma usa ahen ino iraham ap hinahan Allah wereg ambeg o Betel lahul ulug laharukmu salkal ilihip. Ap misihen wam kambing umalik hinahan, ap ekeyen roti hinahan, ap ekeyen kubag anggur ahaluwe kilabehon walug laruk lamusa.

⁴Laruk lit hi habusareg roti piren og humusama hilamihin.

⁵Hilamihinteg o Gibea-Allah Filistin inap sehen senehon wereg ambeg lamihin. Lamihinteg hat o pumbuk ino kurukmu Allah wene hiyag isaruk inap nabi luhaloho Allah fahet punumu hubu lahaptuk ambehen wambik waharukmu salkal ilihip. Iren pinggong puhuli waruk tung turuk lit enehiyehen enele hi roho yunggultil wamusa.

⁶Yunggultil wamusama NINIKNI Allah hime fanowon inowen hat hineyap haptukmu har oho iren yunggultil laruk hag toho yunggultuk latmihin. Ari roho yunggultuk lit hat hubabut keron atmisi.

⁷Enehangge hiyag hirihiyon hubam atmisimu Allah hat men weregma fano peruk laruhun ane roho turuk laruhun,” ulug Samuelen nin hiyag utuk lit,

⁸”Hat tam o Gilgal wambimihinteg an nangno nasugmen hup sabirenam aruhumu an hat hambeg waruhukteg Allah olohotma wam esetuk lit At fahet hubu lahabuhuk. Hubu lahabuhukteg turuk laruhun ane hiyag huruhuk,” ulug Samuelen Saul hiyag itfag.

⁹Ari ulug hiyag itfagma Saul ino Samuel embeselug lamin ulug hebel atukmu itano Allahn Saul indi kera fisibag. Indi kera fisibagma enehangge teko lamisi ibahon arimano obog toho ino sambil ubam atfag.

¹⁰O Gibea libareg Allah wene hiyag isaruk inap nabi luhaloho larukmu salkal ibag. Salkal urukmu Allah hime fanowon inowen Saul ineyap tibagma it winonen enehiyehen enele hi roho uruk lit yunggultuk latfag hag toho ar oho it sehelimuwen yunggultuk latfag.

¹¹Ari roho turuk latfagma ap atam Saul haruk latfag inap arimanowen yet hibareg it-it enele sahaltuk lit, ”Yihi, Kis amloho tu nungge ubam ahareg nenek turuk? Saul oho Allah wene hiyag isaruk ahun nabi aha ano?” ibag.

¹²Ibagma ap welatfahon misihen, ”It iniknisi nenepelegma lawag,” ulug apmayap enepfag. (Ari fahet ap o kema-kema welatfahon obog tohowen enele sahaltuk lit, ”Saul oho wene hiyag isaruk ahun nabi atisi ano?” uruk latfag.)

¹³Saul ino ahiyehen ele hi roho uruk lit yunggultuk latfareg Allah fahet punumu hubu lahaptuk ambeg lahibag.

¹⁴Lahibagma Saul amiyen Saul men amingmingangge men unubam ele uruk lit, ”Hit kema larikipteg wahep?” ulug kapal isibagma iren te, ”Wam keledai itano yami eneptukmen hiyag eneptukuk fureg Samuel ambeg larukuk,” ibag.

¹⁵Hiyag itfagma Saul amiyen, ”Samuelen ele hubam irisi ane hiyag nimin,” ibagma

¹⁶Saulen ami fam, ”Wam keledai longgo uruson hiyaharusa ane fahet eneg hiyag nisarisi,” ulug hiyag itfag. ”Ap suwon raja welaruhun,” ulug Samuelen hiyag itfag ane ino ami hiyag itfag fug.

¹⁷Ari tibagma Samuelen Israel inap NINIKNI Allah olohotma o Mizpa wamuhup ulug wol enepfagma watfag.

¹⁸Watfagma Samuelen ele hiyag isaruk lit, ”Allah Israel ninap NINIKNI ele urukon tu holeg lamek, ’Anden hit Mesir inap ininggikmuwen windat heneptik iyareg o Mesiren hondog heneplug wilip atik iyag. O pumbuk winonen oho apmayap heneptukmu it ininggikmuwen windat heneptuk latikik.

¹⁹Alem hunubam atukmu hit siyag toho weregma Anden let heneptuk latikik angge famen ketiya hiren An Hinikni henembol yig nutuk lit, ’At fug, ap suwon raja eke nit fet nenesuhon lahap nisimin,’ uruk lahep. Ari uruk lahepma hununggul unuk wal toho ap misig umalikisi men henemu-henemu An HINIKNI Allah nolohotma in amek!’ uruk,” ibag.

²⁰Ibareg Israel inap ununggul unuk wal taneg, ”Il misig horogma in arik maniyek!” ulug wol enepfareg enehangge unubam hik tibagma ununggul unuk Benyamin inap unubam atfag.

²¹Unubam atfagma Samuelen Benyamin inap fam, ”Ap misig umalikisi men henemu-henemu in arik maniyek!” ulug wol enepfareg enehangge unubam hik tibagma hun Matriyen ondohowon unubam atfag. Unubam atfagma, ”Hun Matriyen ondohowon ap misig-misig in arik maniyek!” ulug wol enepfareg enehangge ino Kis amloho Saul ubam atfag angge famen at ebe elegma yami ribareg hiyahibag fug.

²²Hiyahibag fureg NINIKNI Allah fam, ”Ap ino tuma wereg ano?” ulug kapal hibagma, ”Sum olohok angge emberuk ambeg hiraho lit wereg,” ulug hiyag isibag.

²³Hiyag isibagma Saul hirako weregma ap piren hinahan libareg hondoholug watfag. Watfareg Israel inap sehelimu in atfagma ap winon unuwag horog tegma Saul eneg uwag yat latfag. It men wirim harukmu Saul anggolop ke ununggul palegma yet hibag.

²⁴Yet haruk lit Samuelen ap obog toho unubam, ”Ap NINIKNI Allahn mumaltisiyon tu yet hemek! Israel ninap sehelimu misig oho at hahon wereg eleg,” ibag. Ari ibagma Israel inap obog tohowen, ”Ninikni raja, hat amusun toho welaruhun,” ulug ininggik tag tibag.

²⁵Ininggik tag tibagma Samuelen Israel inap unubam ap suwonen yabuk waruk ane seleg toho hiyag isibareg suwesingga fam haharoho NINIKNI Allah wereg ambeg imbik libag. Imbik libareg Samuelen ap obog toho unubam, ”Hinibam wal-wal lalihip!” ulug hiyag isibag.

²⁶Hiyag isibagma Saul ibam o Gibea larikim enehako roho turuk inap NINIKNI Allahn inindi anggarap enepfahon arimano oho Saul men ambiyeg libag.

²⁷It arimano larukmu enele siyag toho uruk inaben, ”Ap aruwen nangginoho nit let neneptuk laruhu?” ulug apmayap turuk lit ahiyehap angge eke og itfag fug. It arimanowen enele urukon Saulen holfag angge famen holtuk eleg hag toho welatfag.