Read Angguruk Yali 1 SAMUEL 11 Bible Online

1 SAMUEL 11 - Angguruk Yali bible

1 SAMUEL 11

¹Welatfagma hun Nahas Amon inap onowe suwon raja ino umalikisi sehen senehon men tog abuhuk ulug kinang Gilead fam watfareg o pumbuk Yabes ino waling enesug latfag. Waling enesugmu o Yabes inap arimanowen Nahas fam enele uruk lit, ”Nunusimin pehen ane embeselug mangno amul halug hat hinggikmu welamuhuk,” ibag.

²Ibagma hun Nahas inowen hebeloho uruk lit, ”Hit obog toho hinil pikiron hililoho hik isahukteg eneg an men mangno amuhuken sali umbuhuk. Ari roho turuk lit Israel inap obog toho ininggaliyap enebuhuk,” ibag.

³Ari ibagma Yabes inap onowesi arimanowen at ubam enele uruk lit, ”Hup sabirenam welamuhukteg Israel pumbuk obog toho fam ap mon enebik wamuhukmu ap misig oho let neneptukon eleg halug nit nenebe hat hinggikmu imbik wamuhuk,” ulug heng tibag.

⁴Ari ulug heng tibagma ap mon enepfahon itano o Gibea Saul wereg ambeg libareg alem ino hiyag isibagma holfareg Israel inap enele hi roho uba yatuk latfag.

⁵Uba yatukmu itano Saul ino wam sapi men yabukmuwen waharuk lit hol isarukmen enele ya nga uruk latfagma kapal isaruk lit, ”Ap aruma nungge fahet uba yatuk?” ibagma Amon inaben Yabes inap unusuk oho turuken uba yatuk ulug Saul hiyag itfag.

⁶Hiyag itfag ane ari hol harukmen Allah hime fanowon inowen Saul ineyap turukmu at indimu indok ambulpul hag toho ulog turuk latfag.

⁷Ulog turuk latfagma wam sapi piren wibareg waroho pal-pal lahapfareg, ”Paleg angge aruma Israel pumbuk obog toho og isa lalihip,” ulug ap mon enepfag. Mon enepfagma libareg hiyag isaruk lit, ”Ap san Saul men Samuel men ambiyeg tog abik lahup fug halug at ino ambohom sapi tu hag toho waroho pal-pal lahabuhup,” ibag. Ibagma Israel inap NINIKNI Allahn tuhu urukon fahet enekol hibareg misig oho pok am fug angge enebe obog toho tog abuhuk ulug watfag.

⁸Watfareg o Bezek luhal atfagma Saulen winag isarukmen Israel inap teng-teng angge 300.000 weregma Yehuda inap oho teng-teng angge 30.000 luhal arik watfag.

⁹Watfareg Yabes inaben mon enepfahon itano hiyag isaruk lit, ” ’Sono mo uwan unukoho am fugmu ap let nenebuhubon nenembeg wamuhup,’ ulug honori Yabes inap hiyag isa lalihip,” ibagma mon enepfahon itano suhuloho o Yabes watfareg hiyag isibagma Yabes inap arimano enehiyehen turuk latfag.

¹⁰Ari turuk lit Yabes inaben hun Nahas hiyag utuk lit, ”Sono wilip amuhukteg nit nenebe hit hininggikmu umbuhukmu hiren fano peruk lahep ane roho nit nunubam tuhup,” ulug hiyag itfag.

¹¹Likiyamon Saulen umalikisi fam, ”Palu hinahan luhal amek!” ibagma luhal atfareg o ket sakan tirikim ap seliyonen o sabo wirig ambeg pulmu kibareg mo uwan unukoho am fugmu Amon inap muko unusibag. Muko unusurukmu Amon inap we tor angge wilip atuk lit misig-misig linggik-longgo ibag.

¹²Ari tibagma Israel inaben Samuel fam enele uruk lit, ”Ap san Saul fahet, ’Nit nonowe welaruhu fug,’ urusa? Ari uruson unusulen og nisimin!” ibag.

¹³Ari urukmu hol hibareg Saulen, ”O yoho Israel ninap NINIKNI Allahn windat nenebehek angge re ap misig oho unusilihip fug,” ulug hiyag isibag.

¹⁴Ari ibagma Samuelen Israel inap hiyag isaruk lit, ”O Gilgal lulteg Saul ap suwon raja welaruhuwen lahabul,” ibag.

¹⁵Ari ibagma Israel inap obog toho o Gilgal libareg NINIKNI Allah olohotma Saul ino ap suwon raja unduhuk fibag. Unduhuk fibareg Allahn windat nenebehek ulug wam waroho hubu lahaptuk lit Saul men Israel inap obog toho menen enehiyeg toho yunggultuk latfag.