Read Angguruk Yali 1 SAMUEL 12 Bible Online

1 SAMUEL 12 - Angguruk Yali bible

1 SAMUEL 12

¹Welatfagma Samuelen Israel inap obog toho unubam ele uruk lit, ”Hiren an nubam heng naptikibon holtikikteg ap suwon raja misig hit fahet lahaptikik.

²Ketiya famen fobik welamuhubon ap suwon lahaptikikon inowen fet henesug laruhu. An mondabi sabal atikikteg noruk hubulu wilip atisimu an numalikisi su atusareg hit sehelimu weregma yet isaruk lahep. An nebe kabinimu angge fet henesugmen eneg yoho obog toho hiyag hisaruk lahi.

³An hit honolohotma unduhuk lahiyon tuwen let heneptuk lit anden siyag ane turukmu yet niyarikip halug NINIKNI Allah men ap suwon Aren lahaptisiyon ino men onolohotman fag toho iyek! Wam sapi keledai men san tohon warikik? Ap sa anggengge og numag ulug apmayap tirikik? Ap sa siyahap tirikik? Ap san onggo og nirik waharisimu nil hupnig lit alem fano roho haltikik fug? Ap sa anggengge warikik halug hebeloho og hisamin,” ibag.

⁴Ibagma iren te, ”Haren nit apmayap neneptuk lit siyahap neneptikin fug, niren nungge-nungge og hutukukon hilarikin fug,” ibag.

⁵Ibagma Samuelen it unubam, ”O yoho hiren te, ’Nit nunubam siyag ane tirikin fug,’ ehebon NINIKNI Allahn holehekma ap suwon Aren lahaptisiyon inowen oho holehek,” ibagma iren te, ”NINIKNI Allahn holeg lit weregma we tem toho ehe,” ibag.

⁶Ibagma Samuelen it unubam ele uruk lit, ”NINIKNI Allahn Musa men Harun men mumal enepfareg hit hunumbasi o Mesiren hondog eneplug watfag ahun inowen holeg lit weregma an nele hiyag hisaruk lahi.

⁷Ari fahet ketiya hiren siyag ane turuk latikibon NINIKNI Allah olohotman hiyag hisaminen welamek! NINIKNI Allahn hit men hunumbasi men hunubam fano ane turuk latisiyon honoluk toho welamek!

⁸Yakub o Mesir libareg welatfagma Mesir inaben enele ying eneptukmu hit hunumbasiyen NINIKNI Allah fam, ’Let nenebin, let nenebin!’ ulug enele hi roho uruk latfagma At inowen Musa men Harun men mon enepfagma it piren itanowen hunumbasi o Mesiren hondog eneplug wilip atfareg, ’Kanaan kinang tu fam welamuhup,’ ulug hiyag isibag.

⁹Ari tibag angge famen iren INIKNI Allah enepeleg atfagma Allahn o Hazor inap sehen senehon onowe Sisera inggikmu imbisibareg Filistin inap men o Moab inap onowe suwon menen oho unusukag ulug ininggikmu imbisibag.

¹⁰Imbisibagma hit hunumbasiyen NINIKNI Allah fam enele hi roho uruk lit, ’Niren Hat humbahalug Baal men Astoret men unubam nunumbasi ulug wel eneptuk lit Hat hubam siyag ane anggolo turukuk angge famen ketiya ap seliyon ininggikmuwen windat neneptuk lit let nenepmihinmu Hat eneg wel haptuk lamuhuk,’ ulug heng tibag.

¹¹Heng tibagma NINIKNI Allahn Yerubaal unuk winon Gideon ino, Barak, Yefta men an Samuel men nit obog toho mon nenebik waharuk lit ap seliyon hit walinggoho werehon ininggikmuwen windat heneptuk latisimu hit hinindi yuwag toho welatikip angge famen

¹²Amon inap onowe Nahas ino hunusimin ulug waharukmu yet harikipteg HINIKNI Allah hit fet henesuhon raja ino henembol yig utuk lit an nubam, ’At te fug, ap suwon raja ekeyen nit fet nenesug laruhu,’ irikip.

¹³Ketiya ap suwon raja mumaltikibon tu yet hemek! Hiren heng tirikip ane hikit toho NINIKNI Allahn ap suwon tu laha ferisi.

¹⁴Laha ferisimu hiren NINIKNI Allah fahet henekol toho wereg lit At eneg wel turuk lit wene holtuk lamuhup. At ele sobir isa fug angge hit men ap suwon hit fet henesuhon men NINIKNI Allah ombolim laruk lamuhup halug fano welamuhup angge famen

¹⁵hiren NINIKNI Allah wene holuk fug angge At ele sobir isaruk lamuhup halug Aren hir oho honowe raja ino oho siyahap henebuhu.

¹⁶We tot welatihipmu NINIKNI Allahn alem suwon hit honolohotma timisi ane yet halihip.

¹⁷Ketiya o hibi wereg angge famen anden NINIKNI Allah fam heng timinmu osit men ululu men monde femisiyon yet halihipteg hiren, ’Ap suwon raja nit fahet lahap nisimin,’ ulug heng turuk latikibon ari fam NINIKNI Allah olohotma siyag ane anggolo turuk latukuk ulug honoluk atmisi,” ibag.

¹⁸Ibareg Samuelen NINIKNI Allah fam ele hi roho heng tibagma o ino sambil ululu men osit men monde fibag. Monde fibagma yet hibareg ap arimano NINIKNI Allah men Samuel men unubahet enekol toho welatfag.

¹⁹Enekol toho wereg lit ap obog tohowen Samuel fam enele uruk lit, ”Nit humalikisi war amuhuk tohon HIKNI Allah fam sembahyang imihin. Nit siyag ane turuk lahe ninaben, ’Ap suwon eke lahap nisamihin,’ ulug heng turuk lit siyag ane sebe roho turuk latukuk,” ibag.

²⁰Ibagma Samuelen it unubam, ”Hiren siyag ane anggolo tirikip angge famen henekol ha fug! NINIKNI Allah ombolim larukon umbusuhup fug! Hinindi piren teg eleg angge NINIKNI Allah eneg wel turuk lamuhup.

²¹Allah embeselug inine eleg angge fam nunumbasi ulug onombolim laruk lamuhup fug. It arimano alem elehen let heneptuk lit windat henebuk fug teg.

²²NINIKNI Allahn, ’Hit we tik-tem toho An numalikisi fano welamuhup,’ ulug sali imbibahon ino nele si irikik ulug uwag oko waruk lit hit hik hisa fug teg.

²³Hit hik hisa fug angge weregma anden hit fahet Allah fam sembahyang uruk ane embesele halug NINIKNI Allah fam siyag ane tele. Hit fahet sembahyang urukon umbusuk fug angge kebunggalem fanowon pikiron laruk lamuhuben hiyag hisaruk laruhuk.

²⁴We NINIKNI Allah fahet henekol toho wereg lit hinindi piren teg eleg angge wirik toho Allah wel turuk lamuhup. Aren hit hunubam alem suwon fanowon turukmu yet haruk latikibon honoluk toho welamuhup.

²⁵Hiren siyag ane turukmen eneg welamuhup halug hit men ap suwon raja hit fet henesuhon men siyag amuhup,” ibag.