Read Angguruk Yali 1 SAMUEL 13 Bible Online

1 SAMUEL 13 - Angguruk Yali bible

1 SAMUEL 13

¹Saul ap suwon lahapfagma Israel inap fet enesugmen eneg mo piren libag.

²Larukmu Saulen Israel inap sehelimuwon ap teng-teng angge 3.000 andog enepfag. Andog enepfahon winon 2.000 Saulen milal eneptukmu o Mikhmas men tom Betel fam men welatfag. Winon 1.000 amloho Yonatan men o Gibea Benyamin kinang fam welatfag. Winon hinibam wal taneg lalihip ulug hiyag isibag.

³Hiyag isibareg weregma hun Yonatan inowen Filistin inap sehen senehon onowe o Geba welatfahon ino ware fisibagma Filistin inaben hol hibag. Hol hibagma Saulen, ”Kinang atogman atogma waruk tung til laruk lit henele hi roho, ’Tog abuhuken maniyek!’ ulug Ibrani inap obog toho wol enebiyek,” ulug ap mon enepfag.

⁴Mon enepfagma hiyag isil laruk lit, ”Saulen Filistin inap onowe ino ware feserisimu Filistin inap arimano Israel inap fahet inindimu siyag atusa,” urukon Israel inap obog tohowen hol hibag. Hol hibareg Saul ambiyeg tog abuhuk ulug o Gilgal palu arik watfag.

⁵Palu arik watfagma Filistin inap oho Israel inap men tog abul ulug palu atuk latfag. Ap wam kudan lisoho laruk angge kereta fam larukon teng-teng angge 3.000,[7] ap wam kuda fam laharukon oho teng-teng angge 6.000, ap unuyug fam larukon winag ha fug toho ik yinggi hag mondoko palu atuk latfag. Palu roho watfareg o Bet-Awen mo alem fil o Mikhmas o sabo wiroho welatfag.

⁶Filistin inap watfareg Israel inap walinggoho kilap enesugmu yet isibareg Israel inap enekolen helep alma, kiling elma, tom alem ke, owikmu, ik fahet fo reg ambeg hirag atuk latfag.

⁷Hirag atuk latfagma ap winon ik Yordan paloho o Gad men Gilead men nindig atukmu Saul o Gilgal weregma at men welatfahon arimano inindimu enekol toho welatfag.

⁸Saul Samuelen ibag ane roho o Gilgal hup sabirenam at nangno ruruk latfag angge famen watfag fug. Watfag fugmu Saul men welatfahon arimano at embeselug misig-misig linggik-longgo ibag.

⁹Ari fahet Saulen, ”Allahn let nenepmisiyen At olohotman wam esetuk lit hubu lahapminon fahet wam eke wak aliyek!” ibag. Walug watfagma at inggarehen Allah fahet wam waroho hubu lahapfag.

¹⁰Hubu lahapfagma itano Samuel ambeg watfag. Waharukmu itano Saulen hi rimin ulug olohotma libag.

¹¹Larukmen Samuelen ubam ele uruk lit, ”Hat nanggintuk lahen?” ibagma Saulen, ”Haren sali emberikinon hikit toho waharikin fugmu ap an men welatuson arimano misig-misig longgo uruk latusa. Ari roho longgo urukmu Filistin inap nunusul ulug o Mikhmas palu roho weregma yet isarikikteg

¹²nindimu wenggel haruk lit, ’Anden NINIKNI Allah fam hindi nisimin ulug heng tuk fugmen ketiya Filistin inap nunusul ulug o Gilgal wamusama nangginoho tihi ha reg,’ ulug an nineyap taruk lit Allah fahet hubu lahabihi,” ibag.

¹³Ari ibagma Samuelen Saul pet turuk lit, ”Hat tehenon aru siyag. HIKNI Allahn hat hiyag hitisi ane hikit toho tehen fug. Holten halug hat humalikisi menen Israel inap mondabi fet enesug lamuhup ulug NINIKNI Allahn palimuwap heneplep angge famen

¹⁴ari tehenma hat humalikisi men mondabi ap suwon welamuhup fug. NINIKNI Allahn hat hiyag hitisi ane fano holtikin fugmu Allah indimuwen ap tu fano perukon eke mumal tarisireg An numalikisi fet enesug laruhun ulug ap suwon raja lahabe fuhu,” ibag.

¹⁵Ari ibareg Samuel o Gilgal embeselug o Gibea Benyamin kinang fam libag. Libagma Saulen ap at men pok atfahon arimano winag isarukmen ap tor angge 600 eneg welatfag.

¹⁶Saul amloho Yonatan men ap it iniraham welatfahon arimano men o Geba Benyamin kinang fam weregma Filistin inap o Mikhmas welatfag.

¹⁷Filistin inap palu hinahan ap enenggengge ilmig enebil lahuk ulug o saboman wilip atug laruk lit palu misig ik eleruk fil Syual kinang fam o Ofra fil libag,

¹⁸nin palu misig hubula fil o Bet-Horon fil libag, nin misig lekma laruk ke o Zeboim tonggoma wamburuk ambeg ino libag.

¹⁹Libag li itano Filistin inaben uruk lit, ”Ibrani inaben ine angge besi fam karog men sehe men wibuhup fug,” ulug imbibagma o Israel besi laltuk ahun misig oho welatfag fug.

²⁰Ari fahet Israel inap obog tohowen yabuk wituk angge, o wituk angge, yaha, karog besi famon arimano umatuk lamuhup ulug Filistin inap enembeg walug laruk lit uang og isarukmu umatuk latfag.

²²Ari roho turukmu tog aptuk sambil ino ap Saul men amloho Yonatan men welatfahon arimano karog men sehe men misig oho it ininggikmu welatfag fug. We Saul men Yonatan men ininggikmu eneg welatfag.

²³Weregma Filistin inap palu misig wilip atfareg ap seliyon kahal enesug lamuhuk ulug kenkenma o Mikhmas horogma libag.