Read Angguruk Yali 1 SAMUEL 15 Bible Online

1 SAMUEL 15 - Angguruk Yali bible

1 SAMUEL 15

¹Welatfagma hun Samuelen Saul fam ele uruk lit, ”NINIKNI Allahn hiyag nitisimu anden hat Israel inap onowe raja welaruhun ulug lahap haptikik. Ari fahet haren NINIKNI pohol ha kinang ha senehon ino ele iminon tu holeg lamin,

²’Israel inap o Mesiren wilip atfareg kema larukmen Amalek inaben Israel inap enele ying eneptuk latfahon Anden wirim tuhuk,’ ehek.

³Ari ehekma ketiya Amalek inap wereg ambeg lahunteg pin kuruk lit mun angge man angge siyahap tuhup. Nindiyen ulug misig oho umbusuk fug angge ap, hiyap, malik suwon, malik toron ag narukon, wam sapi, domba, unta, keledai obog toho unusuhup,” ibag.

⁴Ari ibagma Saulen otsi sehen senehon wol enepfareg o Telaim luhal atfagma kilap isarukmen Israel inap teng-teng angge 200.000, Yehuda inap oho anggolo 10.000 welatfag.

⁵Saul otsi men Amalek inap inibam o pumbukmu libareg otsi fam hiyag isaruk lit, ”Ap seliyon fahet huhelma kahalik lul,” ulug hiyag isibag.

⁶Hiyag isibareg Saulen Keni inap unubam hiyag isaruk lit, ”Israel inap o Mesiren wilip atug waharukmu hit hunumbasiyen fano ane unubam turuk latfag angge re hit Amalek inap men ambiyeg hunusuhuk tohon it embeselug folo-folo wilip atug aliyek!” ibag. Ari ibagma Keni inap arimano Amalek inap sehelimuwen wilip atfag.

⁷Wilip atfagma Saulen Amalek inap unusil laruk lit o Hawilan ak tibareg Mesir mo alem fil o Syur imbisik libag.

⁸Unusil laruk lit Amalek inap onowe Agag oluk angge senetuk lit otsi obog toho unusibag.

⁹Saul otsi menen hun Agag men ambohom domba sapi fanowon seiyon men wam domba umalik men fano angge obog toho siyahap tuk fug angge imbisibag. Imbisibareg wam siyahon mun angge man angge siyahon eneg siyahap tibag.

¹⁰Siyahap tibareg weregma NINIKNI Allahn Samuel fam ele uruk lit,

¹¹”Anden Saul ap suwon welaruhu ulug lahaptikik angge famen aren An ambol yig nutuk lit An nele uruk ane fano holtuk elehen An nindimuwen yihi peruk lahi,” ibag. Ibag ane ino Samuelen hol hibareg indi siyag atuk lit hup misig hunduko ele hi roho Allah fam uruk latfag.

¹²Ibareg Samuel likiyanet in atfareg Saul ambeg lamin ulug larukmen aben hiyag utuk lit, ”Saul ino o Karmel aben wel naptuk lamuhup ulug helep misig enehangge unduhuk fik larisi. Unduhuk ferisireg o Gilgal fil larisi,” ibag.

¹³Ibagma Samuel Saul ambeg libagma Saulen at ubam ele uruk lit, ”NINIKNI Allahn hat fet hasug laruhu. Anden NINIKNI Allah ele irisi ane hikit toho turuk latikik,” ibag.

¹⁴Ari ibagma Samuelen, ”Ari ehen angge famen nungge fahet wam domba sapi enele urukon nisanggo fam holtuk lahi?” ulug kapal hibag.

¹⁵Kapal hibagma Saulen, ”Notsiyen wam domba sapi fanowon Amalek inaben tohon arimano HIKNI Allah fahet umbuhuk ulug siyahap tuk fug angge onoluk angge walug waharusa. Wam winon arimano waroho siyahap turukuk,” ibag.

¹⁶Ari ibagma Samuelen Saul fam ele uruk lit, ”Arat ehenma hat hele imbisin! NIKNI Allahn hubanggo an nubam ele ehekon hiyag hitmin,” ibag. Ari ibagma Saulen te, ”In!” ibagma

¹⁷Samuelen, ”Haren an toron welahi perikin angge famen hat Israel inap ununggul unuk obog toho onowe atikin. NINIKNI Allahn hat Israel inap fet enesug laruhun ulug lahap haptisireg

¹⁸mon haptuk lit, ’Lahunteg Amalek inap siyag ane turukon arimano ibig-obog toho unusik lahun!’ ulug hiyag hitisi.

¹⁹Nungge fahet NINIKNI Allahn hiyag hitisiyon holtikin fug? Nungge fahet Amalek inaben tohon siyahap tuk fug angge hilaruk lit NINIKNI Allahn siyag perukon tirikin?” ibag.

²⁰Ari ibagma Saulen Samuel fam hiyag utuk lit, ”NINIKNI Allah ele holtuk lit lahun irisi ke fano larikik. Larikikteg Amalek inap onowe Agag ino eneg oluk angge walug waharuk lit umalikisi obog toho unusirikik.

²¹Unusuruk lit wam domba sapi fanowon oho ware fesele angge famen numalikisiyen o Gilgal inowen HIKNI Allah fahet esebuhuk ulug walug waharusa,” ibag.

²²Ari ibagma Samuelen hebeloho hiyag utuk lit, ”NINIKNI Allahn fano perukon te ke: Allah fahet wam waroho hubu lahaptukon ano Allah ele holtukon ano keyon fano? Wam Allah fahet waroho esetukon apma regma Allah ele holtukon palimu reg ulug holuk toho welamin! Wam domba sei emberukon apma regma Allah ele inindimu wenggeltukon emberimu reg.

²³Allah ele ying turukon men pamongge watukon men ambi reg lit wereg. Allah ele sobir isarukon men usasum foroho ane men ambi reg lit wereg. NINIKNI Allah ele miyaltikinmu Aren oho ap suwon raja welaruhu fug ulug hat miyal haptuk,” ibag.

²⁴Ari ibagma Saulen Samuel fam ele uruk lit, ”NINIKNI Allah ele men haren irikinon men pisan isalug siyag ane tirikik. An numalikisi fahet nakol toho wereg lit it enele holtikik.

²⁵Ari fahet ketiya anden siyag ane tirikikon hapeleg amag! An men suhuloho o Gilgal lulteg NINIKNI Allah fam sembahyang imin,” ibag.

²⁶Ibagma Samuelen, ”Haren NINIKNI Allah ele embeserikinmu Aren oho hat fahet ap suwon welaruhu fug ulug humbaharisi. Ari fahet an hat men lul fug,” ibag.

²⁷Samuel lamin ulug hebel atukmen Saulen asum atog senetfagma tararag tibag.

²⁸Tararag tibagma Samuelen Saul fam ele uruk lit, ”An nasum tararag tehekon ari NINIKNI Allahn te Saul Israel inap fahet ap suwon welaruhu fug ulug o yoho humbaharukon fahet enehangge tehek. Allahn hat humbahalug ap winon ubabut fanowon lahabuhu.

²⁹Allah Israel inap Inikni umbagpag turukon inowen ele si ane uruk eleg. Aren uruk ane nin eke un ane uhu fug. At ap un ane urukon hag toho wereg eleg,” ibag.

³⁰Ibagma Saulen ele uruk lit, ”Anden siyag ane tirikik angge famen ketiya hat an men ambiyeg lulteg HIKNI fam sembahyang uruk latmin. An min ambiyeg laruk lit numalikisi Israel inap men onowesi men onolohotman hi napmihin,” ulug heng tibag.

³¹Heng tibagma Samuel Saul men ambiyeg suhuloho o Gilgal libareg Saulen NINIKNI Allah fam sembahyang uruk latfag.

³²Sembahyang ibagma Samuelen, ”Amalek inap onowe Agag ino walug maniyek!” ibagma Agag ino walug waharukmu indimuwen wenggel haruk lit, ”Nuwabuk ambeg pisan isalug wahi,” ulug indi se roho watfag angge famen

³³Samuelen ap ino fam, ”Haren karog fam hiyap unumalikisi anggolo unusirikin hag toho hat hisingan indag tarisiyon ino oho longgo imisi,” ibareg Samuelen o Gilgal Allah fam uruk ambeg inowen hun Agag ino pal-pal hik isibag.

³⁴Hik isibareg te Samuel o Rama larukmu Saul oho ibam o Gibea libag.

³⁵Libareg weregman Samuel oluk wereg lit misihim oho Saul men mangno atuk latfag fug angge famen Samuel ino indimuwen wenggel haruk lit, ”NINIKNI Allahn Saul ino Israel inap onowe welaruhun ulug lahaptisiyon fahet indimu nambiken peruk,” ulug indi anggin toho welatfag.