Read Angguruk Yali 1 SAMUEL 17 Bible Online

1 SAMUEL 17 - Angguruk Yali bible

1 SAMUEL 17

¹Welatfagma Filistin inaben tog abuhuk ulug sehen seneg inap andog enepfareg Yehuda kinang fam o unuk Sokho luhal arik watfag. Watfareg o Sokho men Azeka men honggolegma o Efes-Damim ino fam o sabo wiroho welatfag.

²Weregma Saul men umalikisi Israel inap men palu atfareg o Ela tonggoma o sabo wirik libag. Libareg Filistin inap onorohole fil luhal atfag.

³Luhal atfareg tonggo pulmu weregma Filistin inap fuma fil punu hu reg ambeg weregma Israel inap oho fuma fil punu hu reg ambeg luhal atfag.

⁴Weregma olok ahun misig Filistin inap luhaloho wereg ambehen wilip atug tot horogma watfag. Watfag ahun ino unuk te Goliat, ibam Gat ahun welatfag. At uwag yat anggolo rehen wirim tibahon il hinahan 3 meter welatfag.

⁵Weregma unggul asum men sing men uyug hililip angge men obog toho ine angge tembaga fam wirihon wan teg latfag. Sing ino anggin te 57 kilogram wan teg latfag. Sehe tog aptuk angge tembaga famon umaloma ha reg latfag.

⁶

⁷Fit humon yaron eke seneg latfag. Fit ambiyang kabuk tohon besi famon ino anggin te kilogram sabiren welatfag. Ahap mapmu angge ap ekeyen Goliat olohotma laruk lit walug laruk latfag.

⁸Walug libagma Goliat in atfareg Israel inap luhaloho welatfahon unubam ele hi roho uruk lit, ”Nungge fahet tog abul ulug luhal arik wahep? An Filistin nahun weregma hit Saul amingmingangge welahep. Ap misig an nambeg watmisiyen hiyahiyek!

⁹Ap ino an men tog abulmu an nuwatmisi halug Filistin ninap hit henemingmingangge welamuhuk. An palimu atuk lit ap ino ware fesemin halug hir oho nit nenemingmingangge wereg lit nenepma welamuhup.

¹⁰Yoho anden hit Israel hinap sehen seneg lahebon hininggaliyap heneptuk lahi. Ap ihiyon ino men an men tog abulen monde fik maniyek!” ibag.

¹¹Ari ibagma hol hibareg Saul men Israel inap obog toho men enekolen yuk lagmag uruk latfag.

¹²Daud ino Efrata ahun Isai amloho ibam te o Betlehem Yehuda kinang fam welatfag. Isai umalikisi likinen welatfag. Saulen Israel inap fer enesug latfag li hun Isai ino sabal teg latfag.

¹³Sabal teg latfagma Isai umalikisi suwon enebe hinahan itano tog abuhuk ulug Saul ombolim laruk latfag. Laruk latfahon itano ununuk te atamon Eliab, pirenon Abinadab, hinahanehon Syama itano laruk latfag.

¹⁴Daud ilabowon welatfag. Owesi hinahan Saul ombolim larukmu

¹⁵Daud ino eke sambil eke sambil Saul embeselug ibam o Betlehem wam domba nikniyen tohon foroho latmin ulug la wam turuk latfag.

¹⁶Ari turukmu Filistin ahun Goliat ino likiya men hupmu men Israel inap per enebik watlug larukmen eneg hup teng misigmen lahabeg nuwalen 40 atfag.

¹⁷Ari roho turuk latfagma Isai inowen amloho Daud fam ele uruk lit, ”Roti anggen wirahowon sum misig men roti numen men wamihinteg folo-folo o saboma howesi enembeg walug lamihin.

¹⁸Wam sapi ag owe kubag fam kilabehon numen tu sehen senehon onowe og irik lamihin. ’Nowesi fano wereg ano,’ ulug hinog og isa lamihinteg fano welahe ulug enehangge iren og humuhubon eke tuma walug waruhun.

¹⁹Saul men howesi men Israel inap obog toho men o Ela tonggoma Filistin inap men tog aptuk lit wereg,” ibag.

²⁰Ibagma likiyamon Daud in atfareg ap eke fam, ”Wam domba aruma hat foroho latmihin,” ulug hiyag itfareg ikni Isai inowen hiyag itfag ane hikit toho wibag angge arimano ha ribareg laruk latfag. Israel inap sehen senehon weregma libareg turukmen Israel inap arimano wilip atug tog aptuk ambeg luhal atfareg enele ngik-ngog turuk latfag.

²¹Ngik-ngog turuk lit Israel inap men Filistin inap men tog abul ulug fuma-fuma luhal atuk latfag.

²²Luhal atuk latfagma Daud inowen wibag angge arimano pilabe fibareg sum foroho ahun fam, ”Foroho lamin,” ulug inggikmu imbibag. Imbibareg nowesi pen isa lamin ulug pupu angge ap luhaleg ambeg libag.

²³Libareg owesi men enele urukmen hun Goliat ino Filistin inap luhaloho wereg ambehen wilip atug tot horogma watfareg wina sambil uruk latfag hag toho urukmu Dauren hol hibag.

²⁴Hun ino horogma waharukmu yet hibareg Israel inap obog toho enekolen at embeselug tululuk toho laruk lit,

²⁵”Ap ari hiren yet hehep? Israel ninap nininggaliyap nenebik oho waharuk! Ap san hun aru waruhu halug ninikni ap suwon inowen, ’Onggo anggolo og utuk lit nahaloho oho og uruhuk,’ irisi. Israel ninap winonen ap suwon raja fahet hundig-hundig uang emberukmu ap ari waruhu ahun ino umalikisi menen emberuk lamuhup fug,” uruk latfag.

²⁶Ari urukmu Daud inowen ap iraham unduhuk latfahon kapal isaruk lit, ”Filistin ahun ambilahap paleg elehon ari ap sa hag toho wereg lit Allah oluk werehon umalikisi sehen senehon ahako roho ininggaliyap eneptuk? Ap san Filistin ahun ari waruhu halug at ino fam nangginoho tuhup,” ulug kapal isibag.

²⁷Kapal isibagma ap arimanowen Saulen ibag ane ino Daud hiyag itfag.

²⁸Dauren ap arimano unubam ele urukon hol hibareg Daud owe atamon Eliab ino indimu olok atfagma Daud pet turuk lit, ”Hat nungge fahet tuma wahen? Wam domba piren hinahan itano anggenma ap sa fam embelug wahen? Nolok nahun ulug hahako roho turuk lahenon ari an hiyaruk lahi. Ap tog aptukmu yet isamin ulug wahen!” ibag.

²⁹Ibagma Daud inowen, ”Anden siyag ane tihi? Anden we hinog og isaruk lahi,” ibag.

³⁰Ibareg ambol yig utug atam kapal isibag hag toho ap winon oho kapal isa libag. Kapal isibagma ap arimanowen atam ibag hag toho hiyag itfag.

³¹Ap arimanowen Dauren ibag ane hol hibareg Saul hiyag itfag. Hiyag itfagma Saulen, ”At hondohik aliyek!” ulug ap mon enepfag.

³²Hondoholug watfagma Dauren Saul fam ele uruk lit, ”Nikni, ap misihen oho Goliat fahet henekol ha fug! An hamingmingangge laminteg Filistin ahun ari men tog abul,” ibag.

³³Ibagma Saulen Daud fam, ”Haren Filistin ahun ari men tog abik lahen ha fug teg. Hat hebe tot teg, at te ebe totman tog aptuk ane milaltukmen indi anggat teg,” ibag.

³⁴Ari ibagma Dauren Saul fam hebeloho ele uruk lit, ”An hamingmingangge aruwen wam domba nikniyen tohon foroho lahi. Foroho lit weregman olomene olokon men wam eli menen wam domba misig hilalug larukmu

³⁵anden muko lalug watuk lit wam domba ino ambilikmuwen taluk turuk lahi. Taluk turuk lahimu aren hebeloho nuwatmin ulug in atukmu anden anggolop pete roho senetug pinggi ware feseruk lahi.

³⁶An hamingmingangge tuwen olomene onolokon oho wam eli onolokon oho unusuruk latikik hag toho Filistin ahun ambilahap paleg elehon ariyen Allah oluk werehon umalikisi sehen senehon ininggaliyap eneptukon ari oho ware fesemin.

³⁷NINIKNI Allahn olomene men wam eli onolokon men eneyegman windat naptuk latisi hag toho Aren Filistin ahun ari inggikmuwen oho windat napmisi,” ibag. Ari ibagma Saulen Daud fam, ”Lamihin! NINIKNI Allahn let hapmisi,” ibag.

³⁸Ibareg tog aptuk asum Saulen tohon ino Daud og itfareg unggul asum ine angge tembaga fam wirihon men sing men wan tibibag.

³⁹Wan tibibagma Dauren tog aptuk asum pali ke karog Saulen tohon namil fam pug tibibag. Pug tibibareg misihim oho wan tibag fureg ari sambil eneg wan tibareg lamin ulug turukmen Dauren Saul fam, ”An misihim oho sum tu hahon wan tirikik fureg la fug teg lahi,” ibareg hog toho imbisibag.

⁴⁰Imbisibareg Daud inowen wanggun eneg inggikmu seneg lit ikman helep anggen fuwaben eneko wibareg sum suknig latfahon fam fani ribareg helep anggen hik turuk angge inggikmu seneg latfag. Seneko Filistin ahun ino horogma libag.

⁴¹Libagma ap misihen ahap mapmu angge seneko Filistin ahun ino alukema atfagma Daud horogma watfag.

⁴²Filistin ahun ino watfareg Daud fil yet harukmen at ebe tot teg lit ahap hulu reg lit orohole fano regma yet hibareg inggaliyap turuk lit,

⁴³”An mene hag toho welahimu neyehenteg wanggun eneg seneko waharuk lahen?” ibareg numba ulug wel eneptuk angge ununuk fam Daud ino huluwap turuk latfag.

⁴⁴Huluwap turuk lit Goliat inowen te, ”An horogma ma! Watmihinmu hat hunu suwe pohol ke larukon men wam pak farema werehon menen nalusan og isamin,” ibag.

⁴⁵Ibagma Dauren Goliat fam hebeloho ele uruk lit, ”Haren an nuwatmin ulug karog men fit men sehe tog aptuk angge arimano walug wahen angge famen an te NIKNI Allah pohol ha kinang ha senehon unuk fam hat hambeg wahi. Israel inap sehen senehon Inikni Allah unuk siyahap turuk lahenma

⁴⁶yoho NINIKNI Allahn hat an ninggikmu embemisimu huwatuk lit hunggul pal hapmin. Pal hapminteg hebe wareg anggeyet hori Filistin inap sehen senehon enebe warehon arimanowet yoho suwe pohol ke larukon men wam pak menen nalusan og isamin. Og isaminmu ap obog toho o kema-kema werehonen Israel inap Inikni Allah we tem toho wereg ulug onoluk aruhu.

⁴⁷Karog men fit men fam wabuk fug angge IKNI Allahn let turukmu warehek ulug ap tuma werehonen yet halusa. Tog aptuk ane NINIKNI Allah inggik fam weregma Aren hit Filistin hinap nit nininggikmu embemisi,” ibag.

⁴⁸Ibagma Goliat ino Daud horogma libagma Daud oho Filistin ahun ino watmin ulug folo-folo ap seliyon luhaloho wereg ambeg horogma libag.

⁴⁹Libareg Dauren sum elma inggik pilabe fibareg helep anggen misig wibareg hik isaruk angge fam hik isibag. Hik isibagma Filistin ahun ino ilahuwag fiyog toho helep anggen unggul abuhema kibag. Kibagma orohole pilabeg kinangma waroho tulungum tibag.

⁵⁰Ari tibagma Dauren Filistin ahun ino helep anggen hik turuk angge fam watfag. Karog inggikmu elegman Filistin ahun ino apmayap turuk lit ware fisibag.

⁵¹Ware fisibareg Filistin ahun ino yinggigmu Daud libareg iraham unduhuk lit karog Goliaren tohon ino asum famen lisoho wibareg Goliat unggul palfag. Paltukmu Filistin inaben yet harukmen it onowe olok ahun ino war atukmu yet hibareg enekolen linggik-longgo uruk latfagma

⁵²Israel inap men Yehuda inap menen ngik-ngog turuk lit Filistin inap muko o Gat keyen o Ekron elehet walinggoho ohowon sok horogma imbisik libag. Imbisik libareg yet harukmen kebunggalem o pumbuk Saaraim fil larukon fam o Gat inowen tulug o Ekron fam Filistin inap pinggi unusibahon arimano anggolo mondeg latfag.

⁵³Ari reg latfagma Israel inaben Filistin inap muko unusibareg suhuloho waharuk lit Filistin inap enenggengge o saboma imbibahon arimano hilibag.

⁵⁴Hilaruk latfagma Dauren Goliat unggul paleg angge o Yerusalem walug laruk lit tog aptuk angge sehen fit ap inowen tohon arimano ibam o saboma imbik libag.

⁵⁵Goliat uwan wabuk fug lit Dauren tog apmin ulug Goliat horogma larukmu Saulen yet hibareg sehen senehon onowe Abner fam kapal haruk lit, ”Abner, malik ari sa amloho?” ibagma Abner inowen, ”Nikni, an we tem toho napeleg,” ibag.

⁵⁶Ibagma ap suwon inowen, ” ’Malik ari ap sa amloho?’ ulug kapal isa lamihin!” ibag.

⁵⁷Ibareg welatfagma Daud inowen Filistin ahun ino watfareg suhuloho waharukmu Abneren wol tibareg hondoholug Saul ambeg libag. Laruk lit Dauren Filistin ahun ino unggul paleg angge inggikmu seneko walug libag.

⁵⁸Libagma Saulen kapal haruk lit, ”Namloho, hat sa amloho welahen?” ibagma Dauren, ”Hat hamingmingangge Isai Betlehem ahun ino amloho an tu,” ibag.