Read Angguruk Yali 1 SAMUEL 18 Bible Online

1 SAMUEL 18 - Angguruk Yali bible

1 SAMUEL 18

¹Daud men Saul men enele ibag sambil ino Saulen Daud fam hiyag utuk lit, ”Hikni ambeg lahun fug, an men mondabi welamuhuk,” ulug hondohibag. Saul amloho Yonatan inowen oho Dauren ibag ane hol hibareg, ”Nindi ulug nininggik ahandip toho welamuhuk,” ulug inggareg indi reg hag toho Daud oho indi reg latfag.

³Indi reg lit Yonatanen Daud fam, ”Nenebe misig hag toho mondabi welamuhuk,” ulug sali imbibag.

⁴Sali emberuk lit sum wan teg latfahon ino nonggoloho wibareg tog aptuk asum men karog men sehen men namil alunggu ke pug turukonet aren tohon obog toho Daud og itfag.

⁵Og itfareg weregma Saulen Daud fam, ”Tog abik lamihin,” ulug o kema-kema monde ferukmu Daud palimu eneg atuk latfagma Saulen Daud ino sehen seneg inap onowe welaruhun ulug lahapfag. Lahapfag ane ari fahet hol hibareg Saul amingmingangge men Israel inap obog toho menen fano peruk latfag.

⁶Dauren Filistin ahun ino ware fisibagma Israel inap suhuloho inibam waharukmu Israel hiyap o pumbuk obog toho welatfahon arimano wilip atfareg enehiyeg toho yunggultuk lit waruk men puhuli men watil ap suwon Saul olohotma hunuke laruk latfag.

⁷Enehiyehen yunggultuk lit hiyap arimanowen, ”Saulen ap teng numen 1.000 unusirisimu Dauren ap teng-teng angge 10.000 unusirisi,” ulug kelem sini fam yunggultuk latfag.

⁸Urukmu hol hibareg Saulen siyag ane ehesa ulug undama olok anggolo haruk lit, ”Dauren unusirisiyon arimano ap teng-teng angge 10.000 winahakesareg anden unusirikikon we tor angge 1.000 winahakesa. Ari til laruk lit fobik at ap suwon raja welaruhu,” ulug indimu wenggel haruk latfag.

⁹Ari sambil ak tibareg Daud fahet Saul undaman siyag toho wenggel haruk lit eneg welatfag.

¹⁰Likiyamon Saul olma wereg lit inggikmu fit ap unusuruk angge seneg latfagma Allahn hime siyahon ino Saul ubam monde fibagma nenek turuk latfag. Nenek turukmu Daud inowen wina sambil pinggong watuk latfag hag toho ari sambil oho watuk latfag.

¹¹Watukmu Saul indimuwen wenggel haruk lit, ”Daud aru fit tu hik isaminmu folok toho ubahat fam himbisi femin,” peruk lit fit hik isibag. Fit ino pirenam hik isarukmen Daud ino iming atfag.

¹²Iming atfagma NINIKNI Allahn Daud ino ibil atisireg an ambolma nasug ulug Saul ino Daud fahet akol toho welatfag.

¹³Wereg lit Saulen, ”Daud ino an niraham welaruhu fug,” pibareg sehen senehon ap teng-teng angge 1.000 onowe suwon lahapfag. Lahapfagma tog abuk oho laruk lit aren milal eneptuk latfag.

¹⁴Milal eneptuk lit o kema-kema tog abik larikim NINIKNI Allahn let turukmu Daud ino palimu eneg atuk latfag.

¹⁵Daud palimu eneg atukmu Saulen yet haruk lit Daud fahet akol anggolo haruk latfag.

¹⁶Ari turukmu Israel inap men Yehuda inap obog toho arimanowen tog aptuk ane Dauren fano milal neneptuk ulug at fahet inindi reg latfag.

¹⁷Welatfagma Saulen Daud fam ele uruk lit, ”Nahaloho atamon unuk te Merab tu hat huhe aruhuwen og huruhuk. Og huruhukmu NINIKNI Allahn tog abik lahup ulug hiyag nisaruk halug an fahet hahako roho tog aptuk laruhun,” ulug hiyag itfag. Hiyag utuk lit, ”An ninggiken Daud waruhuk fug, Filistin inaben wabukag,” ulug indimu wenggel hibareg ibag.

¹⁸Ibagma Dauren Saul fam ele uruk lit, ”An nikni umba Israel inap sehelimu toron weregma an ap sa hahon ke roho hat ap suwon hiyamal welaruhuk,” ibag.

¹⁹Ibagma Saulen ahaloho Merab ino Daud og uruhuk pibag sambil horog atfag angge famen Daud embeselug hiyap ino o Mehola ahun Adriel uhe amag ulug og itfag.

²⁰Og itfagma Saul ahaloho eke Mikhal inowen Daud hilahuk ulug indi haruk latfag. Peruk latfag ane ino Saul hiyag itfagma fano ibag.

²¹Saul indimuwen, ”Mikhal og uruhukon ari onggok Filistin inaben Daud wabukag ulug yebangge hag toho tuhuk,” peruk latfag. Peruk lit Saulen inggik pirenehon Daud hiyag utuk lit, ”O yoho hat an niyamal atmihin,” ibag.

²²Ari ibareg Saulen amingmingangge hiyag isaruk lit, ”Daud fam hirako hiyag utuk lit, ’We tik-tem toho ap suwon inggarehen oho nit amingmingangge welaheyonen oho hat ninindi hiyaruk lahereg ketiya eneg ap suwon ino iyamal welaruhun,’ ilihip,” ulug hiyag isibag.

²³Saulen ibag ane ari amingmingangge arimanowen Daud hiyag itfagma Dauren hebeloho ele uruk lit, ”An nanggengge elehon toron welahi angge ap suwon iyamal aruhukon aru hiren se reg peruk lahep?” ulug hiyag isibag.

²⁴Hiyag isibagma libareg Saul amingmingangge arimanowen inikni fam Dauren ibag ane ino hiyag itfagma

²⁵Saulen it unubam ele uruk lit, ” ’Ap suwon inowen nahaloho onggoma og nuruhu ulug wenggel haruk eleg. We Filistin inap ap suwon men seli roho werehon arimano ap teng uhan 100 unusuhureg enembilahap paloho og nirik waruhu ehek,’ ulug Daud hiyag irik lalihip,” ibag. Ibag ane ari Daud Filistin inaben wabukag ulug wenggel hibareg ibag.

²⁶Saulen ibag ane ari hiyag irik libagma Dauren ap suwon iyamal aruhukon ino fano pibag. Saulen nahaloho onggoma og nuruhun ibag sali uwanma

²⁷Daud otsi men tog abik libareg Filistin inap teng likinen 200 unusibareg enembilahap paloho walug watfag. Walug watfahon arimano misig oho umbusuk fug angge obog toho hiyap onggoma ap suwon og itfag. Og irik watfagma Saulen ahaloho Mikhal ino Daud og itfag.

²⁸Ari tibagma Saulen yet haruk lit NINIKNI Allah Daud men weregma nahaloho Mikha inowen oho at fahet indi haruk ulug Saul undaman oluk atfag.

²⁹Oluk atfagma Saulen Daud fahet akol anggolo haruk latfag. Saul oluk wereg li Daud men hili roho welatfag.

³⁰Wereg lit Filistin inap onowesi suwon tog abul ulug waharukmu Daud inowen unusuruk lit palimu eneg atuk latfag. Saul otsi sehelimuwon misig oho at hahon elegma we Daud unuk eneg mondabi su atuk latfag.