Read Angguruk Yali 1 SAMUEL 19 Bible Online

1 SAMUEL 19 - Angguruk Yali bible

1 SAMUEL 19

¹Saulen amloho Yonatan men amingmingangge obog toho men unubam, ”Daud ware fusuhuk,” ibag. Ibagma Yonatan inowen Daud indi anggolo haruk lit

²at ubam hiyag utuk lit, ”An nikni Saulen huwaruhuk ulug indimu peruken hat hindi hebeloho welamin! Ari fahet sono likiya hirag arik lahunteg anggenma welaruhun.

³Anggenma welaruhunmu an nikni men hat hambeg lahukteg nikni iraham unduhuk lit hat fahet nenele uhuk. Nenele uhukmu nikniyen puhu ane noluk aruhureg anden hat hiyag huruhuk,” ibag.

⁴Ibareg Yonatanen Daud fahet fano ane eneg ikni Saul fam hiyag utuk lit, ”Hat ap suwonen hamingmingangge Daud fam siyag ane tuhun fug. Aren hat hubam siyag ane tuk fug angge fano ane eneg hubam turuk latisi.

⁵War atuk ane fahet akol eleg toho Filistin ahun ino watisimu NINIKNI Allahn Israel inap inibil atukmu it palimu atuk latusa. Palimu atuk ane hat yet harikinteg hahiyeg toho welatikin angge famen nungge fahet Daud siyag ane turuk elehon ubam haren siyag ane turuk lit at amep hinanggimin peruk lahen?” ibag.

⁶Yonatanen ibag ane ari hol hibareg Saulen ele uruk lit, ”At war aruhu fug ulug NINIKNI Allah oluk werehon olohotma uruk lahi,” ulug sali imbibag.

⁷Sali imbibagma Yonatanen Daud wol tibareg Saulen ibag ane hiyag utuk lit Daud hondoholug Saul ambeg watfag. Watfareg Daud inowen Saul men wereg lit yabuk atam wituk latfag hag toho wituk latfag.

⁸Welatfagma tog aptuk ane nin eke ak tibareg Daud inowen Filistin inap men tog abuhuk ulug libareg ap anggolo unusibagma Filistin inap at olohotman enekolen linggik-longgo uruk latfag.

⁹Ari turuk latfagma NINIKNI Allahn Saul ubam hime siyahon ino monde fibag. Monde ferukmu itano Saul olma heriyeg lit fit inggikmu seneg latfag. Senegma Daud inowen pinggong watuk latfag.

¹⁰Watukmu Saulen wenggel haruk lit, ”Daud aru fit tu hik isaminmu folok toho ubahat fam himbisi femin,” ulug hik isarukmen Daud ino iming atukmu itano fit ino ubahat fam mil tibag. Ari turuk lit Daud hup ino sambil watep angge famen oho felug wilip atfag.

¹¹Wilip atfagma Saulen ap hiyag isaruk lit, ”Daud ibam kahalik lalihipteg likiyanet ware fusuhup,” ulug ap mon enepfag. Mon enepfagma Mikhal inowen ahun Daud hiyag utuk lit, ”Hat o yoho hup tu hirag atmihin fug halug sono likiya hat huwabuhup,” ibag.

¹²Ibareg Mikhal inowen Daud ubahat fo reg keyen sel fil wili fibag. Wili fibagma pupu angge longgo ibag.

¹³Longgo ibagma Mikhal inowen sabalhe ap hag toho witfahon wibareg Daud nohoruk ambeg yinggi fibag. Yinggi fibareg Daud oruk pukag ulug wam kambing oruk fam ap hag toho witfahon ino unggul asum teberuk lit sum nohoruk angge fam hililip tibibag.

¹⁴Hililip tibibareg weregman Saulen ap mon enepfahon itanowen Daud hondohul ulug watfagma hiyap inowen, ”At ouk waruk,” ulug hiyag isibag.

¹⁵Hiyag isibagma Saul ambeg larukmen Saulen, ”Nin lalihipteg Daud ebe ha lalihipteg at nohoruk anggeyet tuma walug watlihipmu ware fesemin,” ulug otsi mon enepfag.

¹⁶Ap mon enepfahon itano olma kibareg yet harukmen nohoruk ambeg ap hag toho witfahon ino unggulmu wam kambing oruk weregma Daud nohoruk ambeg yinggigmu yet hibag.

¹⁷Yet hibareg Saul hiyag itfagma Saulen Mikhal pet turuk lit, ”Nungge fahet an men seli roho werehon ino haren hirako wilibehenteg hele si ane, ’At ouk waruk,’ ulug hiyag nerehen?” ibag. Ibagma Mikhalen te, ”Aren an nubam uruk lit, ’An laminen numbahin! Numbahamihin fug halug hat huwatug lamin,’ ehek,” ibag.

¹⁸Daud longgo ibareg hirag-hirag Samuel ambeg o Rama libag. Libareg Saulen ubam turuk latfag ane arimano obog toho Samuel hiyag itfag. Hiyag itfagma Samuel men ambiyeg o Nayot libareg welatfag.

¹⁹Weregman aben te, ”Daud o Rama horogma o Nayot wereg,” ulug Saul hiyag itfag.

²⁰Hiyag itfagma Saulen, ”Daud hondohik lalihip!” ulug otsi mon enepfag. Mon enepfag inap itano libareg yet isarukmen Allah wene hiyag isaruk inap nabi arimano onowe Samuel alukema palu roho wereg lit enehiyehen enele hi roho uruk lit yunggultukmu yet isibag. Yet isibagma Allah hime fanowon ino Saulen mon enepfahon itano unubam atfagma ir oho enehiyehen yunggultuk latfag.

²¹Ari tibag ane ino Saul hiyag itfagma nin ap winon eke mon enepfag. Mon enepfagma Allah hime fanowon it unubam atfagma ir oho enehiyehen yunggultuk latfag. Yunggultuk latfagma Saulen nin eke inggik hinahanehon ap mon enepfagma ir oho Allah wene hiyag isaruk inap winon hag toho ambi ane turuk latfag.

²²Turuk latfagma Saul inggareg o Rama lamin ulug o Sekhu ik humon habulig ambeg libag. Libareg ap hinog og isaruk lit, ”Nori, Samuel men Daud men kema wereg?” ibagma iren te, ”O Rama horogma o Nayot wereg,” ulug hiyag itfag.

²³Hiyag itfagma o Nayot larukmen Allah hime fanowon ino Saul oho ubam atfagma kema laruk lit Allah wene hiyag isaruk inaben turuk ane hag toho ahiyehen yunggultil laruk lit o Nayot kibag.

²⁴Kibareg at asum nonggoloho imbisibareg Samuel alukema yunggultuk latfag. Yunggultuk lit sum wan teg eleg angge abiye kinangma fuk tibareg hubet unukohowet nenek turuk hag toho turuk latfag. Ari turukmu aben yet hibareg enele uruk lit, ”Saul oho Allah wene hiyag isaruk ahun nabi atisi ano?” uruk latfag ane ari ketiya oho uruk.