Read Angguruk Yali 1 SAMUEL 2 Bible Online

1 SAMUEL 2 - Angguruk Yali bible

1 SAMUEL 2

¹Hana inowen NINIKNI Allah wel turuk lit, ”NINIKNI Allahn let naptisimu nahiyeg haruk lahi. Aren nilahe leko palimuwap naptisi. Aren windat naptisimu nahiyeg toho wereg lit nambilik fam ap seliyon ininggaliyap eneptuk lahi.

²Ap misig oho suwon umbagpag turukon NINIKNI hahon wereg eleg. At eneg Allah suwon wereg. Allah NINIKNI eneg helep ubule hag toho wereg.

³Henele hi roho uruk lit hemet toho turuk lahebon umbusuhup! Henele winik-wonog toho uruk lahebon eleg amag! Ari turuk lahebon obog toho NINIKNI Allahn oluk teg lit hunubabut pal heneptuk.

⁴Tog aptuk inap enesehen At inowen fala rebeserisireg ap unuwag inine elehon inineyap eneptuk.

⁵Ap san atam suburu anggolo naruk latisiyon ino ketiya ap enemingmingangge wereg lit aben tohon naruk. Ap san atam suburu obok haruk latisiyon ino ketiya ahiyeg toho wereg lit kel taruk. Hiyap atam ibili atuk latisiyon ino ketiya umalik sabiren indag taruk. Hiyap atam umalik anggolo indag tarisiyon ino ketiya halo atuk.

⁶Ap war atuk ane men onoluk-wereg ane men NINIKNI Allah inggik fam eneg wereg. At inowen ap warehon wereg ambeg pilap eneptuk lit ap warehon wereg ambehen nin wol eneplug onolukap eneptuk.

⁷NINIKNI inowen ap winon enengge hilaruk lit winon mun angge man angge sebe roho og isaruk. Aren eneg ap winon apmayap eneptuk lit winon palimuwap eneptuk.

⁸Ap inilaheg toho werehon ulmu heriyeg ambehen ininggik lisoho in eneptuk lit ap enengge elehon sabelepman lit eneptuk. It arimano ap suwon iniraham heriye feserukmu lehoma hur atuk ambeg ngi atuk. NINIKNI Allahn helep tuwaliyen wal tibareg kinang palimu tuwale feruk lit kinang ahongge inggareg ngi reg lit wereg.

⁹NINIKNI Allah inindi haruk inap o kema-kema larukmu fer enesug lit wereg angge famen At ele holtuk eleg inap o hik tegman war atuk lamuhup. Ap misihen oho inggarehen ineyap taruk lit windat ta fug teg.

¹⁰NINIKNI Allah men seli roho wereg inap siyag amuhup. It unubam poholman ululu sup tuhu. NINIKNI inowen kinang atogman atogma werehon unubabut pal isaruk lit alem unubam werehon kong tuhu. Ap tu suwon welaruhu perukon ino Aren ineyap tuhu. Ahaluwe fanowon unggulmu hilili feruk lit palimu unduhuk fuhu,” ulug Hana inowen Allah wel tibag.

¹¹Wel tibagma hun Elkana inowen, ”Namloho Samuel aru NINIKNI Allah amingmingangge welaruhuwen haren foroho laruhun,” ulug imam Eli hiyag itfareg amloho embeselug ibam o Rama libag.

¹²Eli umaliki itano NINIKNI Allah ele sobir isaruk lit siyag ane eneg turuk latfag.

¹³Ari roho eneg turuk lit aben Allah ibam foroho inap imam fahet emberukon wirim toho wa fug angge huhulangge hilaruk latfag. Likiya hupmu aben wam Allah olohotma esetukmu imam enemingmingangge ino fa inggikmu seneko waharuk lit

¹⁴fa ino fam kubag wam unu esetuk ambeg kila felug hambo roho hilaruk latfag. Wam unu hambo roho waruk latfahon arimano imam itano enemu narukon fahet hilaruk latfag. Ari roho turuk lit Israel inap o Silo waharukon obog toho unubam siyag ane anggolo turuk latfag.

¹⁵Nin wam sei uwan yaluk fugmu imam enemingmingangge ino watlug wam Allah olohotma esetuk ahun fam ele uruk lit, ”Nare, imam inowen wam unu kubag fam osohowon nirim ehekma we unu olukon wirako namisiyen imam fahet imbin,” uruk latfag.

¹⁶Ari uruk latfagma ap inowen hebeloho ele uruk lit, ”Wam sei Allah fahet tam yalminmu fobik hat hindimuwen hilamin pehenon hikit toho hilamihin,” uruk latfag. Ari uruk latfag angge famen ap inowen heng turuk lit, ”Ketiya folo og nimin, eleg halug namuwen hilamin,” uruk latfag.

¹⁷Ari roho turuk lit ap piren kabiniyon itanowen Allah fahet emberuk angge arimano apma reg peruk lit NINIKNI Allah olohotma siyag ane anggolo turuk latfag.

¹⁸Eli umalikisiyen siyag ane anggolo turukmu Samuel inowen NINIKNI Allah olohotma yabuk fano wituk latfag. At ebe totma sum yanggowon imam inaben wan turuk asum wan teg latfag.

¹⁹Mo ilig am wirig am turukmu isingan Samuel fahet sum yaron ebe wirim tohon yihik feruk latfareg ahun men wam Allah olohotma esebul ulug o Silo laruk lit sum ino amloho fahet walug laruk latfag.

²⁰Walug larukmu hun Eli inowen Elkana uhe men hi eneptuk lit, ”Malik NINIKNI Allah og itikibon tu ubalmangge malik winon eke NINIKNIYEN hiyap tu famen og hisahuwen Allah unuk fam hi heneptuk lahi,” uruk latfagma inibam laruk latfag.

²¹Welatfagma Allahn Hana indi hibagma ap umalik hinahan hilani malik piren indag enepfag. Indag eneptuk latfagma malik Samuel ino NINIKNI Allah amingmingangge weregman eneg su atfag.

²²Samuel su atfagma hun Eli mondabi sabal atfag. Sabal atfagma umalikisiyen Israel inap obog toho unubam siyag ane eneg turuk lit Allah wereg ambeg sok foroho hiyap itano men ambiyeg nohoruk urukon obog toho hun Eliyen hol hibag.

²³Hol hibareg umalikisi komo eneptuk lit, ”Numalikisi, ap obohen hiren siyag ane turuk lahebon fahet henebug urukmu holtuk lahi. Nungge fahet ari roho eneg turuk lahep?

²⁴Ari eneg turuk lamuhup fug, numalikisi! NINIKNI Allah umalikisiyen hit hunubahet urukmu holtuk lahiyon ari mondabi siyag peruk lahi.

²⁵Ap misihen are fam siyag ane turuk halug Allahn haluhu angge famen ap ekeyen NINIKNI Allah fam siyag ane turuk halug san haluk teg?” ulug komo enepfag angge famen NINIKNI Allahn iren inikni ele holuk fug angge siyag ane eneg turukmu Anden unusuhuk pibahon hikit toho inikniyen komo enepfag ane holfag fug.

²⁶Holfag fugmu Samuel su atuk lit weregma NINIKNI Allahn oho aben oho at fahet fano peruk latfag.

²⁷Welatfagma Allah amingmingangge nabi misig hun Eli ambeg watfareg hiyag utuk lit, ”NINIKNI Allah ele urukon tu, ’Humbasi indam ap suwon Mesir inap onowe inggikmu weregma An hat humba Harun olohotma ebenam atik iyag.

²⁸Ebenam atuk lit Israel inap ununggul unuk winon embeselug hat humban ondohowonen ondohowon eneg An namingmingangge imam welamuhup ulug in heneptik iyag. We hiren An nolohotma sum yanggowon imam inaben wan turuk asum wan teg lit hubu amben fanowon lahaptuk lamuhup ulug mumal heneptik iyag. We hat hori men eneg hunubam hiyag hisaruk lit, ’Israel inaben An nubahet emberuk angge winon hit naruk lamuhup,’ ulug hiyag hisarik iyag.

²⁹Nungge fahet haren wam suburu An fahet emberuk lamuhup ulug imbiyahon apmayap turuk lahen? Nungge fahet An hambolma nasug lit hat humalikisi palimuwap eneptuk lahen? Nungge fahet Israel inaben An nunuk fam emberuk angge arimano fanowon eneg hit naruk lit henebe fit taruk lahep?

³⁰Ari fahet An Israel hinap HINIKNIYEN nele iminon tu holeg lamin: We tem toho Anden sali imbiyahon tu, ’Hat humalikisi men An namingmingangge imam mondabi welamuhup,’ iyag angge famen ketiya Anden hit mondabi imam welamuhup fug uruk lahi. Ap san An palimuwap naptukon ino Anden oho palimuwap tuhuk. Ap san An apmayap naptukon ino Anden oho apmayap tuhuk.

³¹We tot welamuhupmu Anden hit hininggik ineyon ari paluhukmu hit hununggul unuk ariyon welahebonet welamuhubonet sabal am fug angge war atuk lamuhup.

³²Anden Israel inap winon unubam fano ane turuk laruhukmu hat humalikisi obog toho sabal am fug angge war atukmu haren yet isaruk lit hat hindi siyag atuk laruhu.

³³Hat humalikisi fobikon obog toho war atuk lamuhupmu misig welaruhuwon ino eneg elehap tuhuk fug. Aren an fahet hubu lahaptuk laruhu angge famen fano roho wereg lam fug angge uba yatukmen eneg war am hag toho welaruhu.[4]

³⁴Fobik teko lahu ihiyon ino tem toho irisi puhunen nele sali hubam emberuk lahi: Hat humalikisi Hofni men Pinehas men itano misihim sambil enebe pirenet war amuhup.

³⁵War amuhupmu ap misig Anden tu fano perukon ino imam wereg lit let naptuk laruhuwen unduhuk fuhuk. At indi wirik toho wereg lit An nindimuwen fano peruk ane hikit toho niyabuk wituk laruhu. Anden at famen indag amuhubon oho inineyap eneptuk laruhukmu it arimanowen Israel inap onowesi Anden mumal eneptuk laruhukon arimano ler eneptukmen eneg welamuhup.

³⁶Fobik ap sa hat famen indag amuhubon oluk welaruhu halug imam Anden unduhuk fuhukon ino olohotma elenggen fam hur aruhureg heng turuk lit uang men suburu men tot og nutukmu naruk laruhuken hit imam hinap henemingmingangge welaruhuk uhu,’ ehek” ulug Allah amingmingangge nabi inowen hun Eli hiyag itfag.