Read Angguruk Yali 1 SAMUEL 22 Bible Online

1 SAMUEL 22 - Angguruk Yali bible

1 SAMUEL 22

¹Welatfareg Daud inowen nuwabuk nowen ulug o Gat embeselug o Adulam owikmu hirag arik libag. Libag ane ari hol hibareg owesi otsi men ori obog toho men at ambeg watfag.

²Waharukmu ap alem unubam welatfahon men aben angge paleg latfahon men enehummu het-pet harukon men oho Daud men welamuhuk ulug ambeg watfag. It watfahon enebe mangno roho teng nuwal fimahen 400 weregma Daud ino it onowe atfag.

³Atfareg Daud owik ino embeselug o Moab kinangma o pumbuk Mizpa libareg Moab inap onowe suwon fam ele uruk lit, ”An nikni nisinga men hambeg wamuhupteg hat men welamuhuben hiyag nitmihin. It hat men weregman eneg Allahn an nubam turuk laruhu ane noluk aruhu,” ulug hiyag itfag.

⁴Ari hiyag itfareg Daud inowen ikni isinga men Moab inap onowe ambeg hondog eneplug libag. Libareg Daud ino suhuloho punumu ap laruk eleg ambeg hirag arik libareg welatfag. Welatfag li Daud ikni isinga o Moab inap onowe men welatfag.

⁵Weregma Allah amingmingangge nabi Gad ino Daud ambeg watfareg hiyag utuk lit, ”Punumu tuma hiraho lit welaruhun fug! Lamihinteg Yehuda kinangma welaruhun,” ulug hiyag itfagma Daud ino punumu ap laruk eleg ambeg ino embeselug o Keret farema libag.

⁶Libagma Daud otsi men wereg ambeg aben onoluk atisi urukmu Saulen hol hibag. Hol hibag li itano Saul ino inggikmu fit eke seneko o Gibea hebema e win hahon alma heriyegma otsi obog toho at walinggoho unduhuk latfag.

⁷Unduhukmu Saul inowen it unubam ele uruk lit, ”Hit Benyamin hinaben holeg lamek! Hiren te Yehuda ahun Isai amloho Daud inowen nit obog toho suburu yabuk men anggur yabuk men og nisaruk lit ap sehen senehon teng-teng angge 1.000 ano teng uhan 100 ano milal eneptuk lamuhuken in nenebuhu peruk lahep ano?

⁸Hiren an siyahap nabuhuk ulug henele sahaltikipteg turuk lahep. An namloho inowen Daud ibil atisi ane fahet hit misihen oho hiyag nitikip fug. An siyahap naptuk ane fahet hinindi wenggel ha fug angge, ’Hat hamloho Yonatan inowen hamingmingangge Daud indi kahaltisimu ketiya Saul wabuhuk ulug kahal haptuk,’ ulug nungge fahet hiyag nitikip fug?” ulug hiyag isibag.

⁹Hiyag isibagma Edom ahun Doeg Saul otsi iniraham unduhuk latfahon inowen Saul ubam ele uruk lit, ”Daud ino hun Ahitub amloho Ahimelekh o Nob weregma waharukmu yet harikik.

¹⁰Waharisimu Ahimelekh inowen Daud ubam teko lahu ane fahet NINIKNI Allah kapal harisireg kalemma laruk lit naruk angge men karog Filistin ahun Goliat inowen tohon men Daud og itisi,” ulug hiyag itfag.

¹¹Hiyag itfagma ap suwon Saul inowen Allah amingmingangge imam Ahimelekh men ori imam werehon obog toho men hondog enebik watlihiben o Nob lalihip ulug otsi mon enepfag. Mon enepfagma Saul ambeg hondog eneplug watfag.

¹²Watfagma Saul inowen, ”Hat Ahitub amloho, fano holeg lamin!” ibagma Ahimelekh inowen, ”Yu, nikni, holeg lahi,” ibag.

¹³Ibagma Saul inowen hiyag utuk lit, ”Nungge fahet hat men Isai amloho ino menen an siyahap nabuhuk ulug turuk lahep? Haren suburu men karog men og itikinteg at fahet Allah kapal harikinmu ketiya aren an nuwaruhuk ulug kahal nasug lit wereg,” ulug hiyag itfag.

¹⁴Hiyag itfagma Ahimelekh inowen ap suwon ino fam ele uruk lit, ”Ari ehen angge famen hat hamingmingangge sehelimu sa Daud hag toho wereg? Aren eneg hat hele holeg lit wereg. Wereg lit hat hiyamal atisireg hat huwabuhup tohon ulug fet hasug inap onowe atisimu hat hibam werehon obog tohowen at wel turuk.

¹⁵Ari roho turukmu indam oho anden at fahet Allah kapal haruk latikik. Hat kahal hasug ane fahet anden we tor angge oho holtikik fug. Ari fahet haren Ahimelekh men ori menen oho an siyahap nabuhuk ulug turuk puk fug!” ibag.

¹⁶Ibagma Saul inowen hebeloho hiyag utuk lit, ”Ahimelekh nare, hat men hori obog toho men war atihip,” ibag.

¹⁷Ibareg Saul inowen at wabuhup tohon ulug foroho inap Saul iraham unduhuk latfahon hiyag isaruk lit, ”NINIKNI Allah amingmingangge aruma waling enesug lit unusilihip! Iren Daud ibil atuk lit at hirag arik laruk ane onoluk atisi angge famen an hiyag nutusa fug,” ulug hiyag isibag. Ari ulug hiyag isibag angge famen Daud otsi arimanowen NINIKNI Allah amingmingangge imam aruma unusuk fug teg lahe ulug unusibag fug.

¹⁸Unusibag fugmu ap suwon inowen Edom ahun Doeg fam, ”Haren Allah amingmingangge aruma unusimihin!” ulug hiyag itfagma Doeg inowen imam arimano karog fam unusibag. O ino sambil unusibahon arimano sum yanggowon imamen wan turuk angge wan teg latfahon enebe teng hinahan nubam hilag uhan 85 unusibag.

¹⁹Unusibagma Saul inowen imam inibam o pumbuk Nob inap oho karog fam unusuruk lit abet hiyabet malik suwon oho ag narukon oho it enembohom sapi keledai domba men obog toho unusibag.

²⁰It obog toho unusurukmu Ahimelekh amloho Abyatar eneg wilip atuk lit Daud men welaruhuk ulug ambeg hirag arik libag.

²¹Libareg Abyatar inowen Daud hiyag utuk lit, ”Saul inowen NINIKNI Allah amingmingangge imam arimano obog toho unusirisi,” ulug hiyag itfag.

²²Hiyag itfagma Daud inowen Abyatar hiyag utuk lit, ”O Nob larikik sambil ino Edom ahun Doeg ino weregma yet harikikteg an wahi ane fahet Saul hiyag uruhu ulug noluk atisi. We anden tirikik ane ariyen hat hori obog toho unusurusa.

²³Ketiya hakol eleg toho wereg lit an men welamuhuk. Saul inowen hat huwaruhuk ulug yami haptuk hag toho an oho nuwaruhuk ulug yami naptuk. Yami naptukmu anden yet teg lit welaruhuken hat an niraham weregma nungge-nungge hubam aruhu fug,” ulug hiyag itfag.