Read Angguruk Yali 1 SAMUEL 23 Bible Online

1 SAMUEL 23 - Angguruk Yali bible

1 SAMUEL 23

¹Welatfareg aben Daud hiyag utuk lit, ”Filistin inaben Kehila inap men tog abul ulug o ino larusareg roti anggen ket paltuson arimano yoholiyangge hilaruk lit wereg,” ulug hiyag itfag.

²Hiyag itfagma Dauren NINIKNI Allah kapal haruk lit, ”Anden Filistin inap arimano men tog abuhuken lamin ano?” ulug kapal hibagma NINIKNI Allahn hiyag utuk lit, ”Lamihinteg Filistin inap apmayap eneptuk lit o Kehila inap arimano windat enebuhun,” ibag.

³Ari ibagma Daud otsiyen at ubam enele uruk lit, ”Nit tuma o Yehuda kinangma nenekol toho welahe angge re nangginoho o Kehila inowen Filistin inap arimano luhaloho weregma lahukteg it men tog abuhuk?” ibag.

⁴Ibagma Daud inowen nin eke NINIKNI Allah kapal hibagma Allahn hiyag utuk lit, ”Anden Filistin inap arimano hat hinggikmu umbuhuken o Kehila lamihin,” ibag.

⁵Ibagma Daud otsi menen Filistin inap men tog abul ulug o Kehila libareg Filistin inap mulangge unusibareg enembohom oho yanggal eneptuk latfag. Ari roho turuk lit Daud inowen Kehila inap arimano windat enepfag.

⁶Daud o Kehila weregma Ahimelekh amloho Abyatar Allah amingmingangge imam ino Saulen nuwaruhu rohon ulug ambeg waharuk lit imamen wan turuk asum teko lahu ane fahet fulu roho hiyag isaruk angge ino walug watfag.

⁷O itano li aben Saul hiyag utuk lit, ”Daud o Kehila larisi,” ulug hiyag itfagma Saulen ele uruk lit, ”Allahn Daud ambol yig utuk lit an ninggikmu emberisi. Daud ino o Kehila elehet yaron walinggoho ohowon men sok lare ferukon men weregma kuruk lit yebangge elma kirisi,” ibag.

⁸Ari ibareg Saul inowen Daud men tog abuhuken palu arik wamuhup ulug Israel inap obog toho wol enepfareg Daud otsi men waling enesug lamuhuken o Kehila lul ulug welatfag.

⁹Saulen nuwarik oho turuk ulug Daud indimuwen oluk atfareg imam Abyatar fam ele uruk lit, ”Imamen wan turuk angge ino walug ma,” ibagma walug watfag.

¹⁰Walug watfagma Daud inowen ele uruk lit, ”Israel ninap NINIKNI Allah, an o Kehila welahi ane ari fahet Saulen o pumbuk aru siyahap tik lamin peruk ulug aben enele urukmu an hat hamingminganggeyen holtikik.

¹¹Anden holtikikon hikit toho we tem toho Saul waruhu ano ulug Hat Israel ninap NINIKNI Allah welahenonen an hamingmingangge hiyag nimin,” ibagma NINIKNI Allahn, ”Waruhu,” ibag. Ibagma Dauren, ”Waruhumu Kehila inaben an notsi men Saul inggikmu nunumbahakup ano?” ulug kapal hibagma NINIKNI Allahn, ”Hunumbahakup,” ibag.

¹³Ari ibagma Daud otsi enebe teng falfalik fumahen 600 welatfahon arimano men o Kehila embeselug libareg o ekema-ekema la wam turuk latfag. Daud ino o Kehila inowen wilip atisi ulug aben Saul hiyag itfagma aren Daud men tog apmin pibag ane ari imbisibag.

¹⁴Imbisibagma Daud ino o Zif lekma punumu ap laruk eleg ambeg libareg welatfag. Weregma Saulen likiya hupmu muko laruk latfag angge famen Allahn Daud ino Saul inggikmu imbibag fug.

¹⁵Saulen Daud ware fesemin ulug wilip atfag ane oluk atfareg Daud o Zif lekma eneg welaruhuk ulug o Koresa horogma libareg welatfag.

¹⁶Weregma Saul amloho Yonatan inowen Dauren Allah fam indi wirik toho wenggel hahuwen ineyap timin ulug ambeg watfareg ele ubam uruk lit,

¹⁷”Hakol ha fug! An nikni Saul inowen hat sen habuhu fug. Sen habuhu fugmu hat Israel ninap nonowe suwon raja aruhunmu an oho hat hiraham wereg lit ap suwon aruhuk. Ari roho welamuhukon fahet an nikniyen oho oluk atisi,” ulug hiyag itfag.

¹⁸Ari hiyag itfareg it pirenen nininggik ahandip toho welamuhuk ulug NINIKNI Allah olohotman sali imbibag. Sali imbibareg Yonatan ino ibam larukmu Daud o Koresa pok atfag.

¹⁹Pok atfagma Zif inap Saul o Gibea weregma libareg hiyag utuk lit, ”Daud ino Yehuda lekma ik ambut fil nit nenengginang fam o Koresa horogma Hakhila punumu ap laruk eleg ambeg hiraho lit wereg.

²⁰Weregma haren senete peruk laruhun halug nit nenembeg waruhunmu niren ap ino hat ap suwon hinggikmu umbuhuk,” ulug hiyag itfag.

²¹Hiyag itfagma Saulen it unubam ele uruk lit, ”Hiren an hinindi nasug lahepma NINIKNI Allahn fano ane hunubam tuhu.

²²Aben Daud ino indi anggat anggolo reg urukmu holtikikteg at senetuk ane anggin peruk lahi. Ari fahet lalihipteg at wereg ambeg men ap san Daud yet harisiyon men honoluk aruhuwen fuki roho yet ha lalihip.

²³O kema-kema hirag atuk ambeg obog toho yet hil lahupteg at wereg ambeg honoluk aruhu halug hiyag nirik wamuhup. Hiren te, ’At wilip am fug angge nit nenengginangma wereg,’ ulug hiyag numuhup halug an oho hit men lahukteg ap ino Yehuda inap enebe teng-teng angge werehon sehelimu wereg ano ulug yami ril lahukteg seneruhuk,” ulug hiyag isibag.

²⁴Hiyag isibagma Zif inap arimano tam inibam larukmu Saul fobik it onombolim libag. Libag li itano Daud otsi men o Yehuda kinang fam ik ambut fil o Maon lekma ap laruk eleg ambeg welatfag.

²⁵Weregma aben hiyag utuk lit, ”Saul otsi menen hat yami habik wahasa,” ibagma Daud helep humon Maon lekma werehon alma libag. Libagma Daud Maon lekma wereg urukmu holfareg Saul inowen Daud muko o Maon lekma libag.

²⁶Libareg Saul tom alem keyen larukmu Daud tom ino fuma fil laruk lit Saulen sen nabuk nowen ulug folo-folo laruk latfag angge famen Saul otsi menen Daud walinggik libareg senebuk oho turuk latfag.

²⁷Senebuk oho lit turukmen Saul ot eke ikni ambeg watfareg ele ubam uruk lit, ”Filistin inaben nit nenengginang siyahap tul ulug wahasama folo-folo hibam watmihin!” ulug hiyag itfag.

²⁸Ari ulug hiyag itfagma Saul inowen Daud muko laruk latfag ane imbisibareg Filistin inap men tog apmin ulug libag. Saul inowen Daud embeselug libag ambeg ino aben ”Helep Embeselug Libag Ambeg” suwalfag.