Read Angguruk Yali 1 SAMUEL 24 Bible Online

1 SAMUEL 24 - Angguruk Yali bible

1 SAMUEL 24

¹Welatfagma Daud Filistin kinangon embeselug punumu ap laruk eleg ambeg o En-Gedi libareg welatfag.

²Weregman Saulen Filistin inap muko imbisik libareg waharukmen, ”Daud ino lekma o En-Gedi horogma wereg,” ulug aben hiyag itfag.

³Hol hibareg Saulen Israel inap sehelimuwon eneko teng-teng angge 3.000 og enepfag. Og enepfareg Daud otsi men yami enebil tom unuk Kambing alem fil libag.

⁴Laruk lit wam domba elehet oko kilabeg ambeg libag. Libag ambeg ino owik eke weregma Saul miyema kurukmen Daud otsi men owik elma monmon fil welatfag.

⁵Wereg lit Daud otsiyen Saul yet hibareg Daud fam enele uruk lit, ”NINIKNI Allahn, ’We tem toho ap seliyon hat hinggikmu umbuhuk,’ ulug sali hiyag hitisiyon yoho horog aha. Ari fahet haren fano peruk lahen ane at ubam timihin,” ibag. Ari ibagma Daud in atfareg linglong Saul iraham libareg asum atog hirako paloho wibag.

⁶Waruk lit Dauren indimu wenggel haruk lit, ”Nungge fahet Saul asum atog paloho wihi,” ulug indi pong-pong angge tirikim

⁷otsi fam hiyag isaruk lit, ”Anden NINIKNI Allahn lahaptisiyon ino ubam siyag ane timin fuhen Allahn fet nasug lamag. NINIKNI Allahn ap suwon welaruhu ulug lahaptisimu an ninggiken watmin fug,” ulug otsi hiyag isibag.

⁸Hiyag isibareg Dauren otsi komo eneptuk lit Saul watihip fug ulug hondo enepfag. Hondo enepfagma Saul ino in atug owik ino embeselug wilip atug libag.

⁹Larukmu Daud oho in atug owikmuwen wilip atfareg Saul ambol filen ele hi roho, ”Nikni, hat ap suwon,” urukmu Saulen ambol fil hebeloho yet harukmen Daud ino elenggen fam hur atfareg orohole han kinangma kunuk toho wereg lit Saul hi ribag.

¹⁰Hi ribareg Dauren, ”Nungge fahet Dauren hat huwaruhu ulug aben urukon fahet tem toho uruk peruk lahen?

¹¹NINIKNI Allahn yoho hat owikmuwen an ninggikmu embehekon hat hilen yet haruk lahen. Notsiyen, ’Ware fesemihin,’ ulug hiyag nerehesa angge famen anden hebeloho uruk lit, ’An nikni aru NINIKNI Allahn ap suwon welaruhu ulug lahaptisimu anden watmin fug,’ ihireg humbahaki.

¹²Nikni, hasum atog fahe paloho wihiyon ninggikmu werehon tu yet himin! Hat huwabuk fug angge hasum atog eneg paloho wihiyon tu yet hamihinteg an nindimuwen nolok ane wenggel haruk lit huwaruhuk peruk lahi fuhon fahet hat holuk atmisi. Anden hat hubam siyag ane tirikik fug angge famen haren an nuwatmin ulug mug naplug eneg laruk lahen.

¹³Siyag ane turukon ino an ano hat ano ulug NINIKNI Allahn yet nisaruk lit nunubabut pal nenebuhuwen humbaharuk lahi. Haren an nubam siyag ane turuk lahenon ari fahet an ninggik fam fobik oho hat huwaruhuk fugmu NINIKNI Allahn alem angginon hat hubam umbuhu peruk lahi.

¹⁴Nunumbasiyen enele uruk latfag ane tu, ’Indimuwen olok ane wenggeltukon inowen eneg olok ane turuk,’ uruk latfag ane hikit toho an nindimuwen nolok ane wenggeltuk lahi fureg an ninggiken hat huwaruhuk fug.

¹⁵Hat Israel ninap nonowe welahenon ap sa men tog apmin ulug wahen? Ap sa mutug waharuk lahen? An mug naplug wahenon aru mene warehon hag toho welahi. An fi misig hag toho welahi!

¹⁶Alem nit nunubam werehon ari NINIKNI Allahn haloho pale fuhu. Aren nit yet nisaruk lit an nibil aruhureg hat hinggikmuwen windat naptuk lit fanowap nabuhu peruk lahi,” ibag.

¹⁷Dauren ele obog toho hiyag itfagma Saulen, ”Namloho, hat Daud hele uruk lahen?” ibareg ele ine roho uba yatuk latfag.

¹⁸Uba yatuk lit Saulen Daud fam, ”Hat fano, an siyag. Anden hat hubam nolok ane turuk lit weregman haren an nubam fano ane turuk lahenon ino o yoho inam aha. NINIKNI Allahn an hat hinggikmu embehek angge famen nuwarehen fug.

²⁰Ap misihen seli ahun senetukon ke roho fano lamihin ulug inggik kobog isa reg? Haren yoho fano ane nubam tehenon ari fahet NINIKNI Allahn fobik fano ane hubam tuhu.

²¹Hat tem toho ap suwon raja welaruhunmu Israel inap hat hinggikmu mondabi welamuhubon ari an ketiya noluk aha.

²²Ari fahet NINIKNI Allah olohotma tem toho imihinon tu, ’Anden hat humalikisi humbusagsi unusuruk lit it ununuk elehap tuhuk fug,’ ulug sali embemihin,” ibag.

²³Ibagma Dauren, ’Unusuhuk fug,’ ulug Saul fam sali imbibag. Imbibagma Saul ibam larukmu Daud otsi men oho punumu ap laruk eleg ambeg o En-Gedi libag.