Read Angguruk Yali 1 SAMUEL 25 Bible Online

1 SAMUEL 25 - Angguruk Yali bible

1 SAMUEL 25

¹Libareg weregma Samuel ino war atfag. War atfagma Israel inap obog toho palu atfareg uba yatuk lit olma kinang habuloho o Rama sale fisibag. Ari tibagma Daud ino ik ambut fil libareg o Paran lekma welatfag.

²Welatfag li itano o Maon pumbukmu hun Kaleben ondohowonen ondohowon eke unuk Nabal welatfag. Nabal ino wam endetukon wereg lit tung ahun welatfag. At uhe unuk Abigail orohole fano reg lit indi oho fano wenggel harukon weregma Nabal ino ubabut siyag teg lit olok ane eneg turuk latfag. Misihim sambil Nabal ino ambohom domba teng obog sehelet obog 3.000 men kambing teng-teng angge 1.000 men o pumbuk Karmel forohoma libareg onoruk paltuk latfag.

⁴Onoruk paltuk latfag ane ino fahet Daud ino lekma wereg lit hol hibareg

⁵otsi numen hiyag isaruk lit, ”Nabal o Karmel weregma lalihipteg an nunuk fam hi ruruk lit

⁶at ubam ilihibon tu: Hat amusun toho holuk wereg lit hori men hat nim werehon obog toho hinindi fano roho welamuhup.

⁷Ketiya eneg hat hotsi menen hambohom onoruk paltuk lahep ane fahet holtikikteg an notsi hambeg mon enebik wahi. Hat hotsiyen hambohom nit niniraham o Karmel horogma foroho lit weregma niren it enele ying eneptuk latukuk fugmu hat hambohom misig oho eleg atisi fug.

⁸Alem ari fahet hat hotsi kapal isamihinmu ihiyon hikit toho hiyag humulusa. Ari fahet haren te an o yoho nahiyeg toho welahi sambil tu fam Daud otsi nambeg wahasa peruk lit hahiyehen notsi aruma feneyen an hamloho welahiyon haren fano peruk lahen angge og nitmihin ulug hiyag irik lalihip,” ulug hiyag isibag.

⁹Hiyag isibag ane ari Daud otsiyen Nabal hiyag itfareg Nabalen hebeloho nungge imisi ulug yet teg latfag.

¹⁰Yet teg latfagma Nabal inowen hebeloho hiyag isaruk lit, ”Isai amloho Daud ino ap sa? At unuk indam oho holtikik fug. Yoho ap enemingmingangge anggolo iniknisi embeselug laruk.

¹¹Suburu men ik men wam warihiyon aruma men an nambohom onoruk paltuk inap fahet imbihi angge re hit ap o keman wahasa ulug honorohole napeleg hinap hunubam og hisa fug teg lahi,” ulug hiyag isibag.

¹²Hiyag isibagma Daud otsi suhuloho inikni ambeg libareg it unubam ibag ane obog toho hiyag itfag.

¹³Hiyag itfagma Daud inowen otsi unubam, ”Hit obog tohowen sehen seneriyek!” ulug hiyag isibagma ap wal tanehen enesehen senetfagma Daud inowen oho asehen seneko Nabal wabul ulug wilip atuk lit at otsi enebe teng nuwal fimahen 400 Daud ombolim libagma ap teng likinen 200 nenenggengge foroho lamuhuk ulug pok atfag.

¹⁴Ari turukmu Nabal ot eke Nabal uhe Abigail ambeg libareg hiyag utuk lit, ”Daud ino lekma wereg lit otsi unubam, ’Nabal hi rik lalihip,’ ulug hiyag esehekma ninikni ambeg wahasama Nabal inowen it unubam suwahal ehek.

¹⁵Nit ap arimano horogma leimu weregma iren nit nenele ying nenebuk fug angge we fano ane eneg nunubam turuk latusama nit nenenggengge misig oho eleg atisi fug.

¹⁶Nit nenembohom it horogma foroho lit weregma ap arimano likiya hupmu nit fahet elehet walinggoho ohowon hag toho welatusa.

¹⁷Alem eheyon ari hol hamihinteg haren timihin ane fano wenggel hamihin. Alem angginon nit ninikniyet niret nunubam aruhu rohon! At ubabut mondabi siyag teg lit weregma ap misihen oho at ubam ele uk fug teg,” ulug Abigail hiyag itfag.

¹⁸Hiyag itfagma Abigail inowen suburu roti teng likinen 200 men hele anggur ahaluwe kubag piren men wam domba watfahon fuwaben men roti anggen wirahowon sum misig men kin altap hag angge teng likinen 200 men walug wam keledai fam lahapfag.

¹⁹Lahapfareg Abigail inowen ahun Nabal hiyag um fug angge we otsi eneg hiyag isaruk lit, ”Hiren tam lalihipmu an fobik lamin,” ibag.

²⁰Ari ibareg Abigail ino wam keledai fam lahalug laruk lit tom alowag teg keyen wamburukmen Daud otsi men salkal ibag.

²¹Salkal uk fugmu Dauren otsi unubam ele uruk lit, ”Nungge fahet anden hun ino anggengge leimu walug waharuson obog toho foroho latikik? Forohoman anggengge misig oho eleg atisi fug. Anden we fano ane ubam tirikik angge famen aren ayeg waroho siyag ane nubam turuk.

²²Ari fahet o sono mo lahik wam fugmu o yoho anden at ori obog toho unusimin. Ap misig oluk welaruhu halug Allahn we tik-tem toho alem angginon nubam umbuhu,” ibag.

²³Ari urukmu itano Abigail inowen Daud yet hibareg folo-folo wam keledai famen wambulug Daud alukema orohole han sahung atfareg

²⁴at uyug apma ying atfag. Ying atfareg Daud ubam ele uruk lit, ”An hat hamingminganggeyen hubam nele iminon hol himin. An nubam eneg alem angginon umbuhun!

²⁵Hat an nikniyen ap ubabut mondabi siyahon Nabal ino fahet wenggel hamihin fug. At unuk Nabal suwalehon hikit toho at indi sohu reg lit sohu-sohu ane eneg turuk.[10] At eneg ibam weregma an hat hamingmingangge winama wereg lit hat hotsi nenembeg mon eneptikinon arimano yet isarikik fug.

²⁶Yet isarikik fureg hat nikni hambeg wahi. Wale fug halug haren ap ino ninggareg ninggik fam ayeg waroho watmin ulug ware feselen angge famen NINIKNI Allahn alem angginon ubamap tamisi fug pehek ane hikit toho ware fesehen fug. Ari regma NINIKNI oluk werehon men hat hinggareg menen holeg lit weregma anden we tem toho uruk lahiyon tu: Hat men seli roho wereg lit hat siyahap habuhuk peruk inap arimano hun Nabal sohuwon hag amuhup.

²⁷Nikni, ketiya fano-fano angge an hat hamingminganggeyen walug wahiyon aruma hilamihinteg hotsi hat men wahebon fibir enepmihin.

²⁸Ari turuk lit anden hat hele ying habihiyon ari hapeleg atmisi. Haren NINIKNI Allah fahet tog aptuk lahenma Allahn hat lahap habuhureg hat men haren enderuhunonen endebuhubon men fet henesugmen eneg welaruhu. Fet henesugmu hat holuk wereg li alem siyahon tuhunon fahet aben holuhup fug.

²⁹Ap ekeyen hat huwatmin ulug mug haplug lahu halug aben fano angge sum fam fani roho foroho hag toho NINIKNI Allahn har oho fet hasug laruhu angge famen hat men seli roho welamuhubon war amag ulug helep hik isaruk hag toho hik isaruk laruhu.

³⁰NINIKNI Allahn fano ane hubam tuhuk ulug hiyag hitisi ane hikit toho hubam turuk lit Israel inap onowe welaruhun ulug lahap habuhu.

³¹Ari roho tuhumu haren nungge fahet ap ino saplangge ayeg waroho ware feserikik ulug hindi anggin toho wenggel hahun tohon! NINIKNI Allahn ari hag toho fano ane hubam turuk laruhu halug an hat hamingmingangge nubahet wenggel hahun,” ulug hiyag itfag.

³²Hiyag itfagma Daud inowen Abigail fam ele uruk lit, ”Israel ninap NINIKNI Allahn hat an nambeg mon habik wahama At wel turuk lamuhuk.

³³An ninggareg ninggik fam o yoho ap ino ayeg waroho watmin ulug ware feseruk lit alem angginon nubamap tele angge famen hat hindi anggat toho wereg lit ari tuk fug ulug sen nabehenon fahet hi haptuk lahi.

³⁴Hat hubam siyag ane timin pihi angge famen Israel ninap NINIKNI Allahn sen nabehek. At oluk werehon olohotma nele we tem toho uruk lahiyon tu: Hat an nambeg folo-folo walen fug halug sono o sakan tuk fugmu ap Nabal men werehon misig oho oluk welalep fug,” ulug hiyag itfag.

³⁵Ari hiyag itfareg Dauren fano-fano angge hiyap inowen walug watfahon arimano hilibareg hiyag utuk lit, ”Haren ehenon anden holihireg fano hiyag nerehek pihi angge re hindi fano roho hibam lamihin,” ibag.

³⁶Ibagma Abigail ibam libareg yet harukmen Nabal inowen ap suwon raja arimanowen seni humon esetuk hag toho esetfareg indi ahiyehen ik olokon anggolo roho nalug nenek turukmu yet hibag. Nenek turukmu yet haruk lit hup tu fam hiyag itmin fug ulug Abigail inowen Daud men enele ibahon il misig oho hiyag itfag fug.

³⁷Hiyag itfag fugmu likiyamon Nabal indi anggar atfagma uheyen Daud men enele ibahon obog toho hiyag itfag. Hiyag utukmu itano Nabal indi war atfagma ebe pik-pok teg angge welatfag.

³⁸Pik-pok teg angge weregman eneg hup sohowen atfagma NINIKNI Allahn war amag pibagma Nabal ino war atfag.

³⁹Nabal war atfag urukmu holfareg Daud inowen ele uruk lit, ”Nabal inowen an nindi siyahap naptisimu anden nolok ane ubam timin perikik angge famen NINIKNI Allahn siyag ane tuk fug ulug an At amingmingangge welahiyon sen naptisireg ili og naptuk lit Nabalen siyag ane tirisiyon fahet alem angginon ubam emberisimu anden At wel turuk lahi,” ibag. Ibareg otsi hiyag isaruk lit, ”Abigail ambeg lalihipteg anden at hilahuk peruk lahi ane hiyag itlihip,” ulug mon enepfag.

⁴⁰Mon enepfagma Daud otsi arimano Abigail o Karmel weregma libareg hiyag utuk lit, ”Dauren hat og habuhuk peruk ulug hiyag humulen mon nenebehekma hambeg wahe,” ibag.

⁴¹Ibagma Abigail in atfareg elenggen fam hur atlug orohole han kinangma sahung atfareg ele uruk lit, ”An at amingmingangge welahiyonen otsi unuyug ik umatuk laruhuken nindi haruk lahi,” ibag.

⁴²Ibareg Abigail folo-folo ambeg lamin ulug wam keledai fam lahalug laruk lit amingmingangge hiyap angge fuwaben men Daud otsi men Daud ambeg libagma aren hilibag.

⁴³Dauren atam o Yizreel hiyap unuk Ahinoam hilibareg Abigail fobik hilibag.

⁴⁴Saul ahaloho Mikhal hun Dauren uhe tamon hilibahon ino ikniyen uwag oko o Galim ahun Lais amloho Palti og itfag.