Read Angguruk Yali 1 SAMUEL 27 Bible Online

1 SAMUEL 27 - Angguruk Yali bible

1 SAMUEL 27

¹Libareg Dauren indimu wenggel haruk lit, ”Misihim sambil Saul inowen an nuwaruhu rohon! Ari fahet kinang tu embeselug Filistin inap enengginangma longgo uhukon fano peruk lahi. Longgo uhukmu Saul inowen an Israel kinang atogman atogma yami nabil larukon ino embeselug sen nabuhu fug,” pibag.

²Ari pibareg Daud otsi teng falfalik fiman 600 men Israel kinang embeselug o pumbuk Gat ap suwon Akhis hun Maokh amloho welatfag ambeg ino libag.

³Laruk lit unuhesiyet unumalikisiyet libareg o Gat ino welatfag. Wereg lit Daud uhesi piren o Yizreel hiyap Ahinoam ino men o Karmel hiyap hun Nabalen uhe lin isibahon Abigail ino men welatfag.

⁴Daud ino o Gat longgo irisi ulug hiyag itfagma Saul inowen Daud yami ril larukon imbisibag.

⁵Welatfagma Daud inowen hun Akhis fam ele uruk lit, ”Nungge fahet an hamingmingangge aru hat ap suwon hiraham o pumbuk suwon tu fam welaruhuk? Haren an hindi nasug lahen halug o pumbuk walinggoho werehon eke fam welaruhuken hiyag nimin!” ulug hiyag itfag.

⁶Hiyag itfag sambil ino hun Akhis inowen o Ziklag ngi roho welaruhun ulug Daud hiyag itfag. Hiyag itfag ambeg o Ziklag ino ketiya oho o Yehuda inap onowesiyen seneg lit wereg.

⁷Daud ino o Ziklag ino weregman eneg pikalem nisanggo fiman 16 atfag.

⁸Daud otsi men o Ziklag inowen kuk wilip am turuk lit o Gesur inap men Girzi inap men Amalek inap men indam oho o Syur lek famen tulug o Mesir kinang fam yug toho welatfahon men tog abik laruk latfag.

⁹Misihim-misihim tog abik laruk lit Daud inowen abet hiyabet unusil enembohom kambing, domba, sapi, keledai, unta men enesum men yoholiyangge hilil laruk lit suhuloho hun Akhis ambeg waharuk latfag.

¹⁰It waharukmu Akhis inowen subangge roho Daud fam ele uruk lit, ”O yoho hiren o kema tog abik lahepteg wahep?” ulug kapal harukmu Daud inowen hiyag utuk lit, ”O Yehuda kinang ik ambut filon lahereg nori Yehuda inap enembeg ano, Yerahmeel inap enembeg ano, Keni inap enembeg ano tog abik lahereg wahe,” uruk latfag.

¹¹Dauren indimu wenggel haruk lit, ”Anden o Gesur inap men Girzi inap men Amalek inap men tog abik laruk lahiyon fahet Filistin inap fag toho hiyag isahup tohon!” peruk lit ap misig oho inggik hele waroho o Gat hondog eneplug wam fug angge abet hiyabet obog toho unusuruk latfag. Daud ino Filistin inap enengginang fam wereg lit ari hag toho subangge roho turuk latfag.

¹²Ari turukmu Akhis inowen Dauren hiyag utuk latfahon fahet tem toho uruk pibareg, ”Daud inowen ori Israel inap unusil larukon fahet inirim atusama ori enembeg suhuloho la fug tehen an namingmingangge mondabi welaruhu,” ulug wenggel haruk latfag.