Read Angguruk Yali 1 SAMUEL 28 Bible Online

1 SAMUEL 28 - Angguruk Yali bible

1 SAMUEL 28

¹Welatfagma Filistin inaben Israel inap men tog abuhuk ulug sehen seneg inap wol enepfagma luhal arik watfag. Watfagma Filistin inap onowe Akhis inowen Daud fam ele uruk lit, ”Hat hotsi an men tog abuhuk ulug ambiyeg lulen hindi anggat toho welamin,” ibag.

²Ibagma Dauren Akhis fam hebeloho uruk lit, ”Fano, an hamingminganggeyen tuhuk ane fobik hat holuk aruhu,” ibag. Ibagma Akhis inowen Daud fam, ”Ari halug an nuwabuhup tohon hat an niraham wereg lit fet nasugmen eneg welaruhun,” ibag.

³Weregman Samuel tam war atfagma Israel inap obog toho palu atfareg uba yatuk lit ibam o Rama pumbukmu salfag. Salfareg weregman Saulen ap warehon enehime wol turuk inap men teko lahu ane fahet fulu roho hiyag isaruk inap men Israel kinang famen yanggal eneptuk latfag.

⁴Ari roho weregma Filistin inap luhal atug watfareg o Sunem horogma o sabo wirigmu welatfag. Welatfagma Saulen Israel inap obog toho palu enepfareg o tom Gilboa fam o saboma libag.

⁵Libareg wereg lit Saulen Filistin inap sehen senehon luhaloho weregma yet isibareg akolen indi pong-pong angge turuk latfag.

⁶Pong-pong angge turuk lit Saulen, ”Ke roho timin?” ulug NINIKNI Allah kapal hibag angge famen Allahn hebeloho hiyag itfag fug. Nei fam oho, helep enehangge hik isarukon fam oho, Allah wene hiyag isaruk inap nabi feneyen oho hiyag itfag fug.

⁷Hiyag itfag fugmu Saulen amingmingangge hiyag isaruk lit, ”Ap warehon enehime wol turuk hiyap misig yami rik lalihipteg wereg halug hiyag nirik watlihipmu an ambeg laminteg, ’Anden tuhuk ane fano roho hiyag nimin,’ ulug heng timin,” ibag. Ibagma at amingmingangge arimanowen, ”Ap warehon enehime wol turuk hiyap misig o En-Dor wereg,” ulug hiyag itfag.

⁸Hiyag itfagma Saul inowen an fahet ap winon pukag ulug sum amuwon wan tibareg ap piren men ambiyeg libag. Larukmen hup atfagma hiyap ino ambeg kibareg Saulen ele uruk lit, ”Ap warehon ahime unuk anden hiyag hitminon wol timihin. Wol timihinmu watmisimu, ’Fobik teko lahu ane fahet hiyag nimin,’ ulug at ubam heng timihin,” ibag.

⁹Ibagma hiyap inowen te, ”Saulen ap warehon enehime wol turuk inap men teko laruk ane fahet fulu roho hiyag isaruk inap men Israel kinang famen yanggal eneptisi ane tem toho hat holuk peruk lahi. Nungge fahet an nuwabuhup ulug yebangge turuk lahen?” ibag.

¹⁰Ibagma Saulen, ”Ihi ane hikit toho timihin halug hat hubam alem umbuhup fug ulug NINIKNI Allah oluk werehon olohotma sali emberuk lahi,” ibag.

¹¹Ari ibagma hiyap inowen umung haruk lit, ”Anden sa wol timinmu hambeg watmisi?” ibag. Ibagma Saulen, ”Hun Samuel wol timihin,” ibag.

¹²Ibagma Samuel ino lahik waharukmu yet hibareg hiyap inowen ele hi roho, ”Yihi,” ulug Saul fam, ”Nungge fahet hele si ane an nubam ehen? Hat Saul ino aru welahen!” ibag.

¹³Ibagma ap suwon Saulen te, ”Hakol ha fug! Haren nungge yet haruk lahen, hiyag nimin!” ibag. Ibagma hiyap inowen Saul fam, ”Ap warehon hime misig kinang undaman lahik waharukmu yet haruk lahi,” ibag.

¹⁴Ibagma Saulen hiyap ino fam hinog og haruk lit, ”Ebe ke rohon waharukmu yet haruk lahen?” ibag. Ibagma hiyap inowen, ”Ap sabalon sum yaron wan tohon waharukmu yet haruk lahi,” ibag. Ari ibagma Saulen Samuel fahet ehek ulug undaman oluk atfareg elenggen fam hur atuk lit orohole han kinangma kunuk toho welatfag.

¹⁵Welatfagma Samuelen Saul fam ele uruk lit, ”Nungge fahet haren an elel naptuk lit, ’Lahik ma!’ ulug wol nabehen?” ibag. Ibagma Saulen, ”Nindi anggin anggolo roho wereg lit wol habihi. Filistin inaben tog abul ulug an nambeg waharusama Allahn an ambol yig nitisireg an nele holtisi fug. Allah wene hiyag isaruk inap nabi feneyen oho nei fam oho we tot hiyag nitisi fug. Ari fahet anden tuhuk ane hiyag nitmisi ulug wol habihi,” ibag.

¹⁶Ibagma Samuelen, ”NINIKNI Allahn hat ambol yig hitisireg seliyap haptisi angge re nungge fahet haren an hinog og naptuk lahen?

¹⁷NINIKNI Allah ele an feneyen hiyag hitisi ane hikit toho hat hubam alem emberisi. Hat ap suwon wereg lit yabuk seneg lahenon ino taluk toho ap winon, Daud ino og itisi.

¹⁸NINIKNI Allahn ele hiyag hutuk lit, ’An nundama ahe laharukon ari indok ambulpul hahon Amalek inap unubam hik isahuken haren Amalek inap obog toho unusuhun,’ irisi ane hikit toho tirikin fug. Ari fahet NINIKNI Allahn yoho alem aru hat hubam embehek.

¹⁹Hat men humalikisi Israel inap men Filistin inap ininggikmu hik hisahumu sono hat hamlohoki men an nambeg wambik wamuhupmu an men welamuhuk. Israel inap sehen senehon obog toho NINIKNI Allahn Filistin inap ininggikmu umbusuhu,” ibag.

²⁰Samuelen ari urukmu hol hibareg itano Saul akol anggolo haruk lit kinangma fuk toho ying atfag. Saul ino unukoho misig hup misig suburu tor oho na fug angge weregman ine eleg atfareg fuk tibag.

²¹Fuk tibagma hiyap ino Saul horogma watfareg yet harukmen Saul ino fuk toho yinggibareg indi nonghong urukmu yet hibareg at ubam ele uruk lit, ”Haren heng nabehenon ino an hamingminganggeyen holihireg war atmin halug oho fano ulug tihi.

²²Ari tihiyon ino fahet anden hat hubam heng hapminon haren oho hol himin. Suburu roti kurig angge tot og hitminmu namihin. Namihinteg hat hine roho hibam lamihin,” ibag.

²³Ibagma Saulen, ”An suburu namin fug,” ibagma at otsi men hiyap ino menen namihin ulug enele ine roho uruk latfagma Saulen holfareg kinangman in atug nohoruk ambeg hur arik lahibag.

²⁴Hur arik lahibagma hiyap ino wam sapi umalik seiyon misig olma foroho latfahon ino folo-folo waroho esetfag. Esetfareg roti anggen wibareg suwap turuk angge wa fug angge tag toho wiratfag.

²⁵Roti wiratfahon ino men wam sapi men Saul otsi men enelukema imbik watfagma nibag. Nibareg hubanggo in atug libag.