Read Angguruk Yali 1 SAMUEL 29 Bible Online

1 SAMUEL 29 - Angguruk Yali bible

1 SAMUEL 29

¹Welatfagma Filistin inap sehen senehon obog tohowen Israel inap men tog abuhuk ulug o Afek palu arik watfagma Israel inap o Yizreel horogma ik elerukmu o sabo wirik libag.

²Libagma Filistin inap onowesi fuwaben itano onotsi asan wal taneg enebe teng uhan men teng-teng angge 1.000 men hunuke laruk lit hun Akhis otsi men onombolim larukmu Daud otsi men Akhis iraham horog toho laruk latfag.

³Larukmu Filistin inap onowesi uhan itanowen yet hibareg Akhis fam enele uruk lit, ”Ibrani ahun aru nungge fahet nit men lul?” ulug kapal hibagma Akhis inowen hiyag isaruk lit, ”Ap aru Daud, at ino Israel inap onowe suwon Saul amingmingangge welatisi angge famen an nibil atisireg an men wereg. Mo ilig am wirig am turukmen an men wereg lit an nibil atisi sambilen tulug ketiya oho siyag ane misig oho turukmu yet harikik fug,” ulug hiyag isibag.

⁴Hiyag isibag ane ari fahet Filistin inap onowesi uhan itanowen onolok hibareg Akhis hiyag utuk lit, ”Hun aru suhuloho lamihinteg o hiyag hitikik ambeg welaruhun ulug hiyag itmihin. Nit men ambiyeg tog elma laruk lit ap seliyon inibil aruhu rohon! Ap inowen an nikni indi fanowap timinen Filistin inap ununggul paloho nikni olohotma imbik lamin peruk lit teg.

⁵Hun Daud ari fahet ap enehiyehen yunggultuk lit, ’Saulen ap teng numen unusirisimu Dauren ap teng obog sehelet obog unusirisi,’ ulug kelem sini fam yunggultuk latuson hapeleg atisi ano?” ibag.

⁶Ari ibagma Akhis inowen Daud wol tibareg hiyag utuk lit, ”NINIKNI Allah oluk werehonen holeg lit weregma tem toho iminon tu: Haren pikir ane eneg turuk lahenon an noluk. Hat an men wereg lit an nibil atikin sambilen tulug ketiya oho siyag ane misig oho turukmu yet hiyarikik fureg hat men an men ambiyeg tog abik lulen fano pihi angge famen Filistin ninap nonowesi uhan ariman hat fahet inirim peruk.

⁷Ari fahet hirim puk fug angge welahen ambeg suhuloho lamihin. Lamihinteg Filistin ninap nonowesiyen onolok hahup tohon ulug siyag ane turuk laruhun fug,” ulug hiyag itfag.

⁸Hiyag itfagma Dauren Akhis fam ele uruk lit, ”Anden alem nungge tirikikmu uruk lahen? An hat hamingmingangge atikik sambilen tulug ketiya oho siyag ane turukmu yet niyarikin ano? Nikni, siyag ane tirikik fugmu nungge fahet an hat men ambiyeg laruk lit hat men seli roho werehon men tog abik lul fuhen hiyag nerehen?” ibag.

⁹Ibagma Akhis inowen Daud hiyag utuk lit, ”Siyag ane tirikin fug ane an noluk. Hat hubabut fano reg lit Allahn monde ferukon hag toho welahenma anden yet hiyaruk lahi angge famen Filistin ninap nonowesiyen at men nit men ambiyeg tog abik lul fug ehesa.

¹⁰Ari ehesama hat hotsi Saul amingmingangge famen an nibil atikibon men sono likiyanet in amuhupteg o sakan turukmu welahep ambeg lahup,” ulug hiyag itfag.

¹¹Ari ulug hiyag itfagma likiyamon hubet Daud otsi men in atfareg enembeg Filistin kinangma larukmu Filistin inap arimano o Yizreel libag.