Read Angguruk Yali 1 SAMUEL 3 Bible Online

1 SAMUEL 3 - Angguruk Yali bible

1 SAMUEL 3

¹Samuel kabinimu NINIKNI Allah amingmingangge weregma hun Eliyen foroho latfag. Foroho li itano NINIKNI Allah ele Israel inap unubam urukon holtuk eleg hag toho wereg lit fulu roho yet haruk ane oho enepeleg hag toho welatfag.

²Misihim sambil hun Eli ino il siyag atfagma yet isa fug teg lit ibalma nohorukmu

³Samuel ino peti e fam wirihon elma Allah Wene Numen haharehon kilabeg ambeg iraham nohoruk latfag. Allah ibam indok ambulpul turukon uwan war am fugmu

⁴NINIKNI Allahn Samuel wol tibagma aren te wo ibareg

⁵in atug Eli ambeg libareg kapal haruk lit, ”Nikni, haren wol nabehen?” ibagma Eliyen, ”Namloho, anden wol habihi fug. Lalug nohoruk lamin!” ibag. Ibagma libareg nohoruk latfag.

⁶Nohorukmen nin eke NINIKNI Allahn Samuel wol tibag. Wol tibagma Samuel in atug Eli ambeg libareg kapal haruk lit, ”Nikni, haren wol nabehen?” ibagma Eliyen, ”Namloho, anden wol habihi fug. Lalug nohoruk lamin!” ibag.

⁷NINIKNI Allah ele misihim oho Samuel fam ibag fugmu apeleg toho welatfag.

⁸Weregma nin eke inggik hinahaneg angge NINIKNI Allahn Samuel wol tibag. Wol tibagma in atug Eli ambeg libareg kapal haruk lit, ”Nikni, haren wol nabehen?” ibagma NINIKNI Allahn malik tu wol turuk ulug Eli undaman oluk atfag.

⁹Oluk atfagma Eli inowen Samuel fam, ”Lamihinteg nohoruk latmihinmu nin eke wol haptuk halug haren hele uruk lit, ’NIKNI, hele hiyag nimin. An hamingminganggeyen hele holeg lahi,’ imihin,” ibag. Ibagma Samuel libareg ibalma nohoruk latfag.

¹⁰Nohorukmen NINIKNI Allah watfareg Samuel horogma unduhuk lit atam wol tibag hag toho, ”Samuel, Samuel,” ulug wol tibag. Wol tibagma Samuelen, ”Nikni, hele hiyag nimin! An hamingminganggeyen hele holeg lahi,” ibag.

¹¹Ibagma NINIKNI Allahn Samuel fam ele uruk lit, ”Anden Israel inap enesehelimuwen alem siyahon tuhukmu ap obog tohowen holuhupteg inisanggo fuma-fuma tale nge ruhu ulug hat holuk toho welamin!

¹²Alem siyahon tuhuk sambil ino Anden atam Eli umalikisi men unubahet irikik ane hikit toho siyahap enebuhuk, ak tuhuk ambehen obog aruhumu eneg umbusuhuk.

¹³Anden Eli ubam uruk lit, ’Hat humalikisiyen An Allah nabug urukmu holtikin angge famen hele holok toho komo eneptikin fugmu Anden alem angginon hunubam emberukmen eneg mondabi welamuhup,’ ulug hiyag itikik.

¹⁴Siyag ane hiren turuk lahebon ino wam men suburu men An fahet emberukon ari fam mondabi eleg aruhu fug,’ ulug Eli men umalikisi men unubam sali emberikik,” ulug Allahn Samuel ino hiyag itfag.

¹⁵Hiyag itfagma Samuel nohorukmen sakan tibagma in atlug NINIKNI Allah ibam sok husibareg hubanggo yet hibag ane ino fahet akolen ikni Eli fag toho hiyag itfag fug.

¹⁶Hiyag itfag fugmu hun Eliyen, ”Samuel, namloho,” ulug wol tibagma Samuelen, ”Wo niyon,” ibag.

¹⁷Wo ibagma Eli inowen, ”Aren nungge ulug hiyag herehek? Hat hubam ehek ane an nubam hirahuk fug. Aren ehek ane ele tor angge oho an nubam hirahamihin halug Allahn alem angginon hat hubam umbuhu,” ibag.

¹⁸Ari ibagma Samuelen holfag ane tor angge oho hirahuk fug angge obog toho hiyag itfag. Hiyag itfagma Eliyen, ”Ari NINIKNI Allah famen. Aren alem angginon an nubam umbuhuk peruk halug fano nubam umbukag,” ibag.

¹⁹Ibareg weregma Samuel su atikim NINIKNI Allah Samuel men weregma Samuelen Israel inap hiyag isaruk latfag ane obog toho teko libag.

²⁰Samuel NINIKNI Allah wene hiyag isaruk ahun nabi wereg ulug Israel inap kinang atogman atogma werehon obog toho onoluk atfagma Samuelen ele hiyag isarukmu ap obog tohowen holtuk latfag.

²¹O Silowen NINIKNI Allah tam ebenam atuk latfag hag toho nin eke sambil eke sambil inam atuk lit Samuel ubam ele hiyag utuk latfag.