Read Angguruk Yali 1 SAMUEL 30 Bible Online

1 SAMUEL 30 - Angguruk Yali bible

1 SAMUEL 30

¹Hup piren atfagma Daud otsi men inibam o Ziklag libareg yet harukmen Amalek inap arimanowen ap enenggengge yoholiyangge hulul ulug o Yehuda kinang ik ambut fil libareg o Ziklag pin kuruk lit harep pisako siyaha fisibag.

²Siyaha feseruk lit hiyap unumalikisi men o Ziklag welatfahon arimano unusuk fug angge it obog toho ininggik hele waroho og eneplug libag.

³Og eneplug libagma Daud otsi men o Ziklag libareg yet harukmen o ino harep pisako olunap tibibareg unuhesi unumalikisi men ininggik hele waroho og eneplug libagma yet hibag.

⁴Yet hibareg Daud otsi menen enele hi roho uba yatukmen eneg inine eleg atfagma uba yabuk fug teg latfag.

⁵Daud uhesi piren o Yizreel hiyap Ahinoam ino men o Karmel hiyap hun Nabal lin isibahon Abigail ino men oho Amalek inap arimanowen og eneplug libag.

⁶Ari roho tibagma Daud otsiyen unumalikisi og eneplug libahon fahet enehummu siyag atfareg Daud ino helep fam wabul urukmu akolen kumliyok ibag angge famen at IKNI Allah fam indi wirik toho wenggel harukmu Allahn ineyap tibag.

⁷Ineyap tibagma Daud inowen Allah amingmingangge imam Abyatar hun Ahimelekh amloho ino ubam ele uruk lit, ”Sum fanowon imam inaben wan turuk asum ino walug ma!” ibagma walug watfag.

⁸Walug watfagma Daud inowen NINIKNI Allah kapal haruk lit, ”Amalek inap arimano mug eneplug lamin ano? Laminteg sen enepmin ano?” ulug kapal hibagma Allahn, ”Mug eneplug lamihinteg sen eneptuk lit hunuhesi hunumalikisi men og eneplug laruson arimano it ininggikmuwen windat enepmihin,” ulug hiyag itfag.

⁹Hiyag itfagma Daud otsi teng falfalik fumahen 600 men o Ziklag inowen wilip atfareg Besor ikma sat toho laruk lit ap teng sabiren 200 inine eleg atfahon ik ino paloho nindig am fug tehen pok atukmu Daud otsi teng nuwal fumahen 400 men nindig atug Amalek inap mug eneplug libag.

¹¹Mug eneplug larukmen Mesir ahun eke anggenma weregma salkal ibareg Daud otsiyen ap ino Daud ambeg hondoholug watfag. Ap ino suburu men ik men na fug angge weregman eneg hup hinahan atfagma Daud otsiyen suburu roti men ik men sawe eke men kin altap hag angge piren men og itfagma nibareg nin hebeloho ine atfag.

¹³Ine atfagma Daud inowen ap ino fam, ”Hat hibam kema? Hikni sa?” ulug kapal hibagma ap inowen hiyag utuk lit, ”An Mesir nahun famen Amalek ahun eke amingmingangge welahi. An ouk nubam atisimu nikniyen numbahalug larisi sali yoho hinahaneg welahi.

¹⁴Niren ap enenggengge hulul ulug o Yehuda kinang ik ambut fil werehon Kreti inap arimano men hun Kaleben ondohowonen ondohowon men tog abil larukukteg o Ziklag ino harep pisako olunap feserukuk,” ibag.

¹⁵Ari ibagma Dauren, ”Haren Amalek inap enembeg hondog naplug lahen ha reg?” ulug kapal hibagma Mesir ahunen hiyag utuk lit, ”An nikni inggikmu numbahuk fug angge nuwatmihin fuhen Allah unuk fam hele tem toho imihin halug anden ap arimano enembeg hondog haplug lamin,” ibag.

¹⁶Ibareg Daud otsi hondog eneplug libagma yet harukmen Amalek inap arimano anggenma fibit-fabar atug libareg enemu-enemu wereg lit Filistin inap men Yehuda inap men enenggengge anggolo hilibahon fahet enehiyehen sini yunggultuk lit ik men suburu men narukmu yet isibag.

¹⁷Yet isibareg likiyamon o sakan tirikim ak tibareg Daud otsiyen Amalek inap arimano unusurukmen eneg hup atfagma we ap kabiniyon enebe teng nuwal fumahen 400 wilip atuk lit wam unta fam lahalug linggik-longgo ibag.

¹⁸Linggik-longgo ibagma Daud inowen Amalek inaben yoholiyangge wibag angge obog toho hebeloho hilaruk lit uhesi piren itano oho windat enepfag.

¹⁹Ari roho turuk lit Amalek inaben hilibag angge suwon toron men Daud otsi unumalikisi og eneplug libahon men misig oho longgo ibag fugmu Dauren obog toho hebeloho andog eneptuk latfag.

²⁰Obog toho andog enepfareg Amalek inap enembohom kambing domba sapi men hilibahon arimano Daud otsiyen hondog eneplug laruk lit Dauren inggareg fahet helehek ambohom ulug wam winon onolohotma hondog eneplug libag.

²¹Libareg Daud ino ik Besor horogma larukmu otsi enebe teng sabiren inine elehen ik ayegma pok atfahon itano Daud otsi men onolohotma watfagma Daud it iniraham laruk lit hi enepfag.

²²Hi eneptukmu yet hibareg Daud men libahon sehelimuwon unubabut siyag teg lit onolok ane wenggeltukon arimanowen enele sahaltuk lit, ”Nonori arima nit men ambiyeg larusa fugmu Amalek inaben huhulangge warusa angge niren hebeloho hilarukukon arimano niren minggiroho og usul fug. Og usul fugmu iren unuhesi unumalikisi men eneg og eneptug lalusa,” ibag.

²³Ari urukmu Dauren holfareg ele uruk lit, ”Nori, walug wahe angge aruma NINIKNI Allahn og nisarisi angge re hiren minggiroho og usul fug ulug henele uk fug. NINIKNI Allahn ili og neneptuk lit ap nunusul ulug waharuson arimano nit nininggikmu emberisi.

²⁴Ap misihen oho hiren uruk lahebon fahet fano pemisi fug. Huhulangge walug waheyon aruma pul ke minggiroho hit tog elma larikibon men it nenenggengge foroho latuson menen fibir amag,” ulug hiyag isibag.

²⁵Hiyag isibag ane ari hikit toho tibagma Dauren fobik oho ari hag toho turuk lamuhup ulug kong toho imbibag ane ari ketiya oho Israel inaben seneg lit wereg.

²⁶Daud suhuloho o Ziklag watfareg aren tog aptuk lit inggikmu atfag angge minggiroho winon ori Yehuda inap onowesi og isa lalihip ulug ap mon enepfag. Mon eneptuk lit, ”NINIKNI Allah men seli roho wereg inaben seneg angge huhulangge walug waharukukon minggiroho winon aruma hit ngi amuhuben og hisaruk lahi ehek ilihip,” ulug hiyag isibag ane hikit toho og isa libag.

²⁷Og isa laruk lit o Betel men, o Ramot Yehuda kinang atogma ik ambut fil werehon ino men, o Yatir,

²⁸Aroer, Sifmot, Estemoa,

²⁹Rakhal, o pumbuk Yerahmeel inap inibam arimano men, Keni inap inibam men,

³⁰o Horma, Bor-Asan, Atakh,

³¹Hebron men o pumbuk Daud otsi men hirag arik laruk latfag ambeg arimano obog toho men libareg onowesi o pumbuk arimano wal taneg seneg latfahon Dauren og isa lalihip ulug hiyag isibag angge arimano og isil libag.