Read Angguruk Yali 1 SAMUEL 31 Bible Online

1 SAMUEL 31 - Angguruk Yali bible

1 SAMUEL 31

¹Filistin inaben Israel inap men tom Gilboa famen tog aptuk latfareg Israel inap enekolen larukmu Filistin inaben muko unusik libagma ap anggolo war atfag.

²Unusibareg Filistin inaben Saul umalikisi men mug eneplug laruk lit Saul umalikisi ununuk te Yonatan, Abinadab, Malkisua itano oho unusik libag.

³Libareg sehen seneg inaben Saul hiyahibareg wabul ulug tog tahan tibil laruk lit tog sinat watfag.

⁴Watfagma Saulen ot misig at asehen seneg latfahon fam ele uruk lit, ”Karog lisoho wamihinteg an kangguloho nuwarin! Ap enembilahap paleg eleg inaben an nele ying naptuk lit nuwabuhup tohon!” ibag. Ibagma amingmingangge inowen nakolen watmin fug ulug imbisibag. Imbisibagma Saulen karog inggarehen tohon ino wibareg kinangma lahabe fibareg inggarehen karog ambiyangma ilag atfag.

⁵Ilag atfagma ot at asehen seneg latfahon inowen yet harukmen Saul war atfagma yet hibareg itano ar oho inggarehen karog aren tohon ambiyangma ilag atfareg Saul men ambiyeg war atfag.

⁶Ari sambil Saul umalikisi hinahan itano men at amingmingangge men sehen seneg inap obog toho ambiyeg unusibagma war atfag.

⁷Israel inap sehen senehon arimano enekolen linggik-longgo urukmu Saul umalikisi men war atfagma Israel inap Yizreel tonggo fuma fil welatfahon men ik Yordan fuma fil welatfahon menen hol isibareg inibam embeselug ir oho linggik-longgo uruk latfagma Filistin inap kik watfareg Israel inap enengginang ilmig tibareg welatfag.

⁸Israel inap muko unusik libareg likiyamon Filistin inap watfareg ap unusibahon arimano enenggengge hilaruk lit Saul umalikisi hinahan itano men tom Gilboa fam waroho yinggigmu hiyag enepfag.

⁹Hiyag enepfareg Saul unggul pale feselug tog aptuk asum nonggoloho hilibag. Hilibareg, ”Nunumbasi niren wel eneptuk laheyon men nonori o Filistin pumbuk walinggoho werehon arimano men unubam Saul umalikisiyet war atusa ane hiyag isa lalihip,” ulug ap mon enepfag.

¹⁰Mon enepfareg tog aptuk asum Saulen tohon ino sabalhe Astoret ino foroho ibam imbik libareg Saul ebe wareg angge o Bet-Sean elehet walinggoho ohowon fam tele fisibag.

¹¹Filistin inaben Saul ubam tibag ane o Yabes-Gilead inaben hol hibareg

¹²enehako roho turuk inap obog toho wilip atug hup misig hunduko libareg Saul ebe warehon men umalikisi enebe warehon men arimano o Bet-Sean elehet fam telegman og enebik libag. Og eneplug o Yabes watfareg indokma yal enepfareg

¹³unuwag andog toho e sawe hahon ino alma salfag. Salfareg suburu na fug angge hiyang weregman eneg hup sabirenam atfag.