Read Angguruk Yali 1 SAMUEL 4 Bible Online

1 SAMUEL 4 - Angguruk Yali bible

1 SAMUEL 4

¹Welatfagma Israel inap wilip atfareg Filistin inap men tog abuhuk ulug libareg o pumbuk Eben-Haezer horogma o sabo wiroho weregma Filistin inap oho o Afek o sabo wiroho welatfag.

²Wereg lit Filistin inaben Israel inap onorohole fil luhal atfag. Luhal atfareg tog aptuk lit fuman-fuman pising hil laruk lit Filistin inaben Israel inap mul unusuruk lit tog elman unusibahon arimano ap teng-teng angge 4.000 war atfag.

³Tog apfareg suhuloho o saboma ino watfareg Israel inap onowesi arimanowen enele sahaltuk lit, ”Nungge fahet NINIKNI Allahn ambol yig nesehekma yoho Filistin inaben mulangge nunusehesa? O Silo NINIKNI Allah Wene Numen haharehon peti e fam wirihon elma kilabeg angge ino wak lulen maniyek! Ari feneyen NINIKNI Allah nit sehelimu waharuk lit ap seliyon ininggikmuwen windat nenebuhu,” ibag.

⁴Ari ibareg o Silo peti ino wak lalihip ulug ap mon enepfagma libareg peti ino walug watfag. Israel inaben peti ino fam ap poholmon kerub suwe aherabul hag angge wilibihon weregma NINIKNI Allah pohol ha kinang ha senehon ino emberimu heriyeg peruk latfag. Peti ino walug waharuk lit Eli umalikisi piren Hofni men Pinehas men ambiyeg watfag.

⁵Peti ino horogma walug waharikim Israel inap obog toho enele ngik-ngog urukmu kinang yuk turuk latfag.

⁶Enele ngik-ngog urukon Filistin inaben hol hibareg enele uruk lit, ”Ibrani inaben nungge fahet enele ngik-ngog uruk?” uruk latfag. Urukmu peti ino Israel inap iniraham walug watfagma Filistin inap onoluk atfareg

⁷enekol hibag. Enekol hibareg enele uruk lit, ”Unumba iren wel turukon ino it sehelimu wahareg siyahap nenepmisi,” il laruk lit, ”Indam oho ari hahon yet harukuk fug.

⁸Unumba mondabi ineyon inggikmuwen ap san windat nenebuhu? Indam at inowen Mesir inap anggenma unusibag urukmu holtukuk.

⁹Ari fahet hayen, Filistin hinap nori, hinindi wirik toho wereg lit aben turuk ane wal haruk lamek! Atam Ibrani inap arimano nit nenepma welatusa angge famen ketiya it enepma welamuhukon ari siyag. Ari fahet aben turuk ane wal haruk lit tog abul!” ibag.

¹⁰Ibareg tog aptuk lit Filistin inaben Israel inap mulangge unusibag. Unusurukmu Israel inap misig-misig linggik-longgo ibareg inibam wal taneg libag. Anggolo roho unusibagma Israel inap sehen senehon teng-teng angge 3.000 war atfag.

¹¹Unusuruk lit Filistin inaben Eli umalikisi piren Hofni men Pinehas men itano oho unusibareg peti ino hilibag.

¹²Peti Allahn tohon ino hilibagma ap misig unggul unuk Benyamin ahun tog aptuk ambeg embeselug indi siyahen fesi lahaboho asum kiririp teg angge o ino sambil o Silo libag.

¹³Larukmu Eli inowen peti ino fahet indi anggin toho wenggel haruk lit kalem ilanma hur atuk angge fam hur atfareg ap nangno isaruk latfag. Nangno isarukmen ap ino o pumbukmu kibareg unusibag ane hiyag isarukmu hol hibareg o pumbuk obog toho ap pok atfahon arimanowen enele ya nga uruk latfag.

¹⁴Ya nga urukmu hun Eliyen hol isibareg kapal isaruk lit, ”Nungge fahet enele ya nga uruk?” ibagma ap ino folo-folo Eli ambeg watfareg unusibag ane hiyag itfag.

¹⁵Hun Eli ino indag tibag sali mo ilig am wirig am turukmen teng hinahanen nubam hilag nanggolop fimahen 98 atfagma il homanggen teg lit yet isa fug teg latfagma

¹⁶ap inowen Eli ubam ele uruk lit, ”An yoho tog aptuk ambehen wilip ahireg wahi,” ibagma Eliyen, ”Namloho, ke roho tehep?” ulug kapal hibag.

¹⁷Kapal hibagma ap inowen hiyag utuk lit, ”Filistin inaben nunusehesama Israel ninap linggik-longgo ehe. Nit mulangge nunusuruk lit hat humalikisi piren itano Hofni men Pinehas men oho unusuruk lit peti ino oho helehesa,” ibag.

¹⁸Peti ino helehesa urukmu hol hibareg itano Eli ino elehet o pumbuk walinggoho ohowon sokolma heriyeg latfag ambeg inowen ambol han wambibareg sabal teg lit ebe angginen anduhun uwag kulug waroho war atfag. Eli oluk wereg lit Israel inap fet enesugmen eneg mo ilig am wirig am turukmu teng misig nubam hilag nuwalen 40 atfag.

¹⁹Pinehas hun Eli amloho uhe umalik indag atukon horog atfagma hol harukmen peti Allahn tohon ino hilaruk lit iyamal men ahun men war ahasa urukmu hol hibareg itano malik ahum naruken kunuk toho hur atfareg indag tibag.

²⁰Malik indag tibareg war am hag teg latfagma hiyap at iraham unduhuk latfahon itanowen hiyag utuk lit, ”Hakol ha fug, haren malik ap angge indag tehen,” ibag. Ari ulug hiyag itfag ane fahet wenggel hibag fureg ele ibag fug.

²¹Peti Allahn tohon ino hilaruk lit niyamal men nahun men war ahasama Allah umbagpag turukon nit Israel ninap fet nenesuhon eleg aha ulug malik ino unuk Ikabod suwalfag.[5]