Read Angguruk Yali 1 SAMUEL 5 Bible Online

1 SAMUEL 5 - Angguruk Yali bible

1 SAMUEL 5

¹Peti Allahn tohon Filistin inaben hilibareg o pumbuk Eben-Haezeren inibam o Asdod hilalug libag.

²Hilalug libareg unumba iren wel turukon ap hag toho ilit tohon unuk Dagon wereg ambeg imbik libareg Dagon iraham imbibag.

³Noholug likiya o Asdod inap in atfareg yet harukmen Dagon tukum toho orohole han sahung teg lit peti ino olohotma kinangma yinggig lit weregma yet hibag. Yet hibareg Dagon ino hebeloho ibalma unduhuk fibag angge famen

⁴noholug likiya in atfareg yet harukmen Dagon ino tukum toho orohole han sahung teg lit peti ino olohotma kinangma yinggig lit weregma yet hibag. Yet harukmu Dagon unggul men inggik pirenet angge kong toho sok ambilikmu weregma Dagon ino ubahare eneg amumu welatfag.

⁵Ari fahet indamen tulug ketiya oho Dagon ngi inap imam arimano men o Asdod Dagon wereg ambeg kuruk inap obog toho menen sok ambilikmu nunuyug sobul fug ulug suhan halug kuruk.

⁶NINIKNI Allah inggiken o Asdod inap ine roho hondo enesug lit alem angginon unubam emberuk latfag. O Asdod men o pumbuk walinggoho werehon men unubam salukangge emberuk lit unusuruk latfag.

⁷Ari turukmu Asdod inaben yet hibareg enele sahaltuk lit, ”Israel inap unumba inggik ine reg lit nit men nunumba Dagon men hondo nenesuhen peti Israel inap unumban tohon aru nit sehelimu welaruhu fug!” ibag.

⁸Ari ibareg Filistin inap onowesi obog toho maniyek ulug wol enepfareg kapal isaruk lit, ”Peti aru ke roho tul?” ibagma, ”Peti aru o Gat imbik lalihip,” ibag. Ibareg peti ino o Gat Filistin kinangma welatfahon fam imbisik libag.

⁹Imbisik libagma NINIKNI Allah inggiken Gat inap oho hondo enesugmu war amuhuk ulug enekol toho welatfag. O pumbuk ino inap arimano ap suwonet malik toronet unubam yowil emberuk lit unusuruk latfag.

¹⁰Unusuruk latfagma peti ino o Ekron Filistin kinangma welatfahon fam walug libareg imbik kurukmen o Ekron inaben enele hi roho uruk lit, ”Peti aruwen nit obog toho nunusukag ulug nenembeg walug waharuk,” uruk latfag.

¹¹Ari ibareg Filistin inap onowesi obog toho wol enepfareg enele uruk lit, ”Nit nonori men obog toho nunusuhu rohon peti Israel inap unumban tohon aru suhuloho ibam imbisik aliyek!” ibag. Allah inggiken o Ekron inap obog toho ine roho hondo enesugmu war am hag ane turuk lit enekol anggolo haruk latfag.

¹²Winon war atikim winon salukangge unubam atuk latfagma nunumbasiyen let nenebukag ulug enele ya nga uruk ane pohol fil lahaptuk latfag.