Read Angguruk Yali 1 SAMUEL 6 Bible Online

1 SAMUEL 6 - Angguruk Yali bible

1 SAMUEL 6

¹Peti NINIKNI Allahn tohon ino pikalem sabiren Filistin kinang fam welatfagma

²Filistin inap arimanowen unumbasi foroho inap imam men fulu roho hiyag isaruk inap men wol enepfareg enele uruk lit, ”Peti aru ke roho tul? Nangginoho ibam imbik lulen hiren hiyag nesemek,” ulug kapal isaruk latfag.

³Kapal isibagma iren te, ”Peti aru walug laruk lit hininggikmu eleg angge imbisik lahup fug! Israel inap unumba ubam siyag ane turuk latikibon eleg amag ulug onggo umbuhupteg eneg imbisik lahup. Ari roho tuhup halug fano amuhupteg it unumban nungge fahet nunusuruk latisi ulug honoluk aruhu,” ibag.

⁴Ari ibagma iren te, ”Niren nungge angge og umul?” ulug kapal isibagma iren hebeloho uruk lit, ”Nit obog toho Filistin ninap nonowesi men alem misihon nunubam atisimu yet harikip. Ari fahet Filistin ninap nonowesi fuwaben werehon wirim toho salukangge hahon fuwaben men pak yeli hiniyabuk siyahap turukon hahon fuwaben men fano-fano angge emas fam laluhup. Emas fam laluhubon itano Israel inap unumba og utuk lit hi ruruk lamuhup. Onggo ari hahon og umuhup halug at inggiken nit men nunumbasi men kinang niren tohon obog toho hondo nenesug ane eleg aruhu ano.

⁶Indam Mesir inap onowe men inindi imbik wamburuk latfag hag toho nungge fahet hir oho hinindi imbik wamburuk lamuhup? Israel inaben nunumba ulug wel turukon inowen Mesir inap enele ying eneptuk latfagma Israel inap inibam lawag ulug ininggik kobog isibahon ino henepeleg?

⁷Ari fahet wam sapi piren unumalik ag mon eneptukon misihim oho kumbi ilil eneptusa fuhon wak lahupteg unumalikisi re inisinga onombolim lahup tohon wereg ambeg kila fusuhupteg wam inisinga pirenet lisoho laruk angge kereta keron fam ilili fuhup.

⁸Ilili fuhupteg peti aru kereta palimu umbuhupteg fano-fano angge emas fam laluhubon onggo it unumba og umuhup eheyon arimano obog toho peti aru iraham umbuhup. Umbuhupteg wam sapi itano umbusuhupmu kereta ino lisoho laruk lit enemu o Israel lahup.

⁹Larukmu yet teg lit welamuhup. At ibam o Bet-Semes Israel kinang fam werehon fil laruk halug Israel inap unumban nit nunubam alem angginon emberisiyon ino tem toho ulug nonoluk aruhu. Ibam Israel fil laruk eleg halug it unumban nunusuruk uruk latukukon nenele si uruk latukuk ulug nonoluk aruhu. Alem elegma ouk ino nunubam atisi puhuk,” ibag.

¹⁰Iren ibag ane hikit toho turuk lit wam sapi piren unumalik ag mondotukon wak libareg unumalikisi inibam imbisibareg wam inisinga piren itano kereta fam ilili fibag.

¹¹Ilili fibareg peti inowet pak yeli hahon men salukangge hahon men emas fam wirihon arimanowet kereta palimu imbibagma

¹²wam sapi itano we pikit o Bet-Semes fil libag. Kalem suwon ke ilan fil la fug angge enele nguk til we pikit libag. Wam sapi atam larukmu Filistin inap onowesi fuwaben itano onombolim laruk lit o Bet-Semes hili-hilimu libag.

¹³Wam sapi itano larukmu o Bet-Semes inap arimanowen tonggoma roti anggen paltuk lit yet harukmen peti ino onolohotma inam atukmu yet hibareg enehiyeg haruk latfag.

¹⁴Peti ino Yosua o Bet-Semes ahun ino iyabukmu libareg pok atfag. Pok atfag ambeg ino helep humon weregma Lewi inaben peti ino men fano-fano angge emas fam lalfahon arimano men wibareg helep humon ino fam imbik lahibagma o Bet-Semes inaben wam sapi itano NINIKNI Allah fahet umbul ulug ware fibareg kereta e fam wirihon ino halog toho sapi itanowet indokma yalfareg wam winon oho NINIKNI Allah olohotma esetfag.

¹⁶Esetukmu yet isibareg Filistin inap onowesi fuwaben itano o ino sambil suhuloho inibam o Ekron libag.

¹⁷Salukangge hahon emas fam witfahon Filistin inaben NINIKNI Allah onggo og itfahon tu: Asdod inaben misig, Gaza inaben misig, Askelon inaben misig, Gat inaben misig, Ekron inaben misig imbibag.

¹⁸Pak yeli hahon emas fam witfahon eke o Filistin pumbuk walinggoho elehet ohowon men elehon men wal tanehen imbibag. Helep humon Yosua o Bet-Semes ahun ino iyabukmu werehon peti ino palimu imbik lahibahon ino ketiya oho enehangge wereg.

¹⁹O Bet-Semes inaben peti ino undama inilen kilap hibagma NINIKNI Allahn Bet-Semes inap teng hinahan 70 unusibag. NINIKNI Allahn nunusuruk lit alem angginon nunubam emberisi ulug inindimu siyag toho wereg lit,

²⁰”Ap sa NINIKNI Allah ebe usa fulu ahun olohotma ine roho welam teg? Peti Allahn tohon aru nit welahe ambehen ap sa ambeg hondoko imbisik la reg?” uruk latfag.

²¹Ari uruk lit o Kiryat-Yearim lalihip ulug ap mon enepfag. Mon enepfahon arimano libareg hiyag isaruk lit, ”Filistin inaben peti NINIKNI Allahn tohon ino suhuloho imbisik waharusama hilak watlihip,” ibag.