Read Angguruk Yali 1 SAMUEL 7 Bible Online

1 SAMUEL 7 - Angguruk Yali bible

1 SAMUEL 7

¹Ari ibagma o Kiryat-Yearim inap libareg peti ino walug watfareg hun Abinadab wereg ambeg punu ino fam imbik libag. Imbik libareg Abinadab amloho unuk te Eleazar peti NINIKNI Allahn tohon aru foroho laruhun ulug unduhuk fibag.

²Peti Allahn tohon ino o Kiryat-Yearim amusun toho weregman mo ilig am wirig am turukmu likin fuman 20 atfag. Atfagma Israel inap obog tohowen NINIKNI Allah fam let nenebin ulug enele hi roho uruk latfag.

³Uruk latfagma Samuelen Israel inap obog toho unubam ele uruk lit, ”Hit NINIKNI Allah olohotma hebeloho wamul ulug hinindimu we tem toho peruk lahep halug ap winon unumbasi men sabalhe Astoret men hiren wel eneptuk lahebon arimano umbusuhupteg hinindi NINIKNI Allah ubam emberuk lit At eneg wel turuk lamuhup. Wel turuk lamuhup halug Aren oho hit Filistin inap ininggikmuwen windat henebuhu,” ibag.

⁴Ibagma Israel inap arimanowen ap winonen nunumba ulug wel eneptuk angge Baal men Astoret men arimano imbisibareg we NINIKNI Allah eneg wel turuk latfag.

⁵Ari tibagma Samuelen ele uruk lit, ”Israel hinap obog toho o Mizpa luhal amuhupmu anden hit fahet NINIKNI Allah fam sembahyang uhuk,” ibag.

⁶Ibagma Israel inap o Mizpa luhal atfareg ik hinanggoho NINIKNI Allah olohotma hilil isibag. Ino sambil ik suburu na fug angge wereg lit, ”NINIKNI Allah fam siyag ane turuk latukuk,” ulug fag tibag. Fag tibagma o Mizpa inowen Samuelen Israel inap unubam alem welatfahon haloho emberuk latfag.

⁷Ari turukmen Israel inap o Mizpa palu arik wahasa urukmu hol hibareg Filistin inap onowesi arimanowen unusuhuk ulug onotsi sehen senehon men Israel inap wereg ambeg watfag. Watfagma Israel inaben hol hibareg Filistin inap fahet enekol toho welatfag.

⁸Enekol toho wereg lit Israel inaben Samuel fam enele uruk lit, ”Filistin inap ininggikmuwen nit windat nenepmisiyen hele umbusuk fug angge NINIKNI Allah fam hele ine roho heng turuk lamin!” ibag.

⁹Ibagma Samuelen wam domba ag narukon misig wibareg NINIKNI Allah fahet abirangge yalfag. Yalfareg Samuelen sembahyang uruk lit, ”Yoho Israel ninap let nenepmihin,” ibagma NINIKNI Allahn ele holfag.

¹⁰Samuelen wam domba ino yaltukmen Filistin inaben unusul ulug Israel inap horogma watfag. Horogma waharukmu itano NINIKNI Allahn pohol filen ululu aplohok humon monde fibagma Filistin inap enekolen linggik-longgo urukmu itano Israel inap o Mizpan wilip atfareg Filistin inap muko unusuruk lit o Bet-Kar ahamu fil imbisik libag.

¹²Ari tibagma Samuel inowen helep eke wibareg o Mizpa men Sen men honggolegma enehangge unduhuk fibag. Unduhuk fibareg, ”NINIKNI Allahn let nenebil waharisireg tiyan oho let neneptisi,” ulug helep ino unuk Eben-Haezer suwalfag.

¹³Ari roho turuk lit Filistin inap apmayap enepfagma Samuel oluk wereg li Filistin inap NINIKNI Allah inggiken hondo enesugmu Israel inap enengginang fam kik watfag fug.

¹⁴Kik watfag fugmu o pumbuk Filistin inaben ilmig eneptuk latfahon arimano o Ekron famen tulug o Gat oho suhuloho Israel inap ininggikmu atfagma kinang o pumbuk walinggoho werehon oho Filistin inap ininggikmuwen windatfag. Windatfareg Israel inap men Amori inap o Israel kinang fam welatfahon arimano men mangno roho wereg lit inindi yuwag toho welatfag.

¹⁵Samuelen Israel inap unubam unggum welatfahon haltuk lit weregman eneg war atfag.

¹⁶Mo ilig am wirig am turukmu o Betel men Gilgal men Mizpa men walinggoho pen isaruk lit Israel inap unubam alem welatfahon haltuk latfag.

¹⁷Haltuk latfareg ibam o Rama suhuloho waharuk latfareg wereg lit Israel inap unubam alem welatfahon haloho emberuk latfag. O Rama ino Samuelen NINIKNI Allah fahet hubu lahaptuk ambeg eke witfag.