Read Angguruk Yali 1 SAMUEL 8 Bible Online

1 SAMUEL 8 - Angguruk Yali bible

1 SAMUEL 8

¹Welatfareg hun Samuel ino sabal atfareg amlohoki Israel inap fer enesug lamuhup ulug hakim lahap enepfag.

²Amloho wandabon unuk te Yoel, fobikon unuk te Abia. It piren itano o Bersyeba wereg lit unggum haltuk latfag.

³It inikniyen yabuk waruk latfag hag toho wa fug angge ininggareg fahet eneg wenggel haruk lit onggo og isarukon eneg inibil atuk lit unggum paltuk latfag.

⁴Ari turukon yet isibareg Israel inap onowesi obog toho Samuel ambeg o Rama luhal arik watfareg enele hiyag utuk lit,

⁵”Hat sabal atikinmu humalikisiyen haren turuk latikin hag toho turuk eleg. Ari fahet ketiya o pumbuk winama wereg hag toho welamuhuken ap suwon nit fet nenesug laruhuwon raja eke lahap nisahun,” ibag.

⁶Iren ibag ane fahet Samuelen siyahon ehesa ulug wenggel hibareg NINIKNI Allah fam sembahyang ibagma

⁷Allahn Samuel fam ele uruk lit, ”Enele hubam eheson hikit toho timihin. Iren eheson hat fahet ninirim ehesa fug. Iren Allah ap suwon raja welaruhu fug peruk lit An fahet ninirim ehesa.

⁸Indam o Mesiren ininggik lisoho wilip eneptik iyag sambil ino ak tibareg iren anggoloenam An enembol yig nutuk lit ap winonen nunumba ulug wel eneptuk angge unubam sembahyang uruk latusa hag toho ketiya har oho enembol yig hutuk.

⁹Ari fahet iren heng urukon hikit toho turuk lit ap suwon raja inowen alem eke hag eke hag unubam emberuk laruhu ane seleg toho hiyag isamihin,” ibag.

¹⁰NINIKNI Allahn ubam ibag ane Samuelen it ap suwon heng tibahon arimano unubam hiyag isaruk lit,

¹¹”Ap suwon hit fet henesug laruhuwon raja inowen tuk teg ane ari roho hit hunubam turuk laruhu: Aren hit hunumalikisi ap angge unubam uruk lit, ’Sehen seneg inap amuhupteg winon te kereta fam, winon te wam kuda fam, winon te kereta enelukema hunuyug fam laruk lamuhup,’ ulug mingming eneptuk laruhu.

¹²’Hit winonen ap sehen senehon teng-teng angge 1.000, winonen ap teng piren 50 milal eneptuk lamuhup,’ ulug in eneptuk laruhu. Iren at ubahet yabuk wituk lit ninikniyen anggen tahanoho naruk laruhu ulug yaho feruk lamuhup. At fahet minggin tog men kereta tog aptukon fahet wam kudan lisoho laruk angge men wituk lamuhuben hiyag isaruk laruhu.

¹³Hunumalikisi hiyap angge unubam, ’An fahet amben fano angge andog toho emberuk lit suburu esetuk lit roti wiratuk lit welamuhup,’ ulug mingming eneptuk laruhu.

¹⁴Nin eke hiniyabuk suburu, hom, anggur wereg ambeg fanoma ap suwon inowen ilmig tahureg at amingmingangge arimano hiyag isaruk laruhu.

¹⁵Yatuk lamuhup angge minggiroho sum sohowen eneg hininggikmu atukmu numenon arimano hilalug otsi ibam foroho inap men amingmingangge winon men og isaruk laruhu.

¹⁶An niyabuk wituk lamuhup ulug henemingmingangge ap angge hiyap angge hunumalikisi ap kabiniyon inine werehon men henembohom keledai men og enebik waharuk laruhu.

¹⁷Henembohom domba sohowen eneg hininggareg hininggikmu welamuhupmu numenon arimano ap suwon inowen hilarukmu henebe oho at amingmingangge roho welamuhup.

¹⁸Fobik ari turukmu yet hahupteg ap suwon lahabuhubon ino fahet henele anggolo uhupmu NINIKNI Allahn henele holuhu fug,” ibag.

¹⁹Ari ibagma ap arimanowen Samuel ele sobir isaruk lit, ”Fug, ap suwon misig nit fet nenesuhon welaruhu.

²⁰O pumbuk winama wereg hag toho nir oho welamuhuk. Nit fahet raja eke wereg lit alem haltuk lit tog aptuk ane milal neneptuk laruhu,” ibag.

²¹Iren ibag ane Samuelen hol hibareg NINIKNI Allah hiyag itfagma

²²Aren hebeloho Samuel fam uruk lit, ”Iren heng urukon holmihinteg ap suwon misig it fahet lahap isahun,” ibag. Ibagma Samuelen Israel inap unubam hinibam wal taneg lalihip ibag.