Read Angguruk Yali 1 SAMUEL 9 Bible Online

1 SAMUEL 9 - Angguruk Yali bible

1 SAMUEL 9

¹Benyamin kinang fam ap misig unggul unuk oho Benyamin welatfag, unuk te Kis. Kis ikni Abiel, Abiel ikni Zeror, Zeror ikni Bekhorat, Bekhorat ikni Afiah welatfag. Hun Kis ino tung ahun welatfag.

²Hun ino amloho misig unuk te Saul ebe kabini reg lit ubabut oho fano welatfag. Israel inap enebe fanowon at hahon misig oho welatfag fug. It obog toho unuwag horog tegma Saul eneg uwag yaron welatfag. It men wirim harukmu Saul anggolop ke it ununggul paleg latfag.

³Misihim wam keledai heyon Kisen tohon longgo ibag. Longgo ibagma Kisen amloho Saul fam uruk lit, ”Namingmingangge misig hondohik lamihinteg wam keledai itano yami rik lalihip,” ibag.

⁴Ibagma tom Efraim walinggoho yami ril kinang Salisa fam yami rik libag angge famen hiyahibag fug. Hiyahibag fureg kinang Sahalim walinggoho libag angge famen wam keledai eleg latfag. Eleg latfagma Benyamin kinang fam libag angge famen hiyahibag fug.

⁵Eleg latfagma Zuf kinang fam libareg Saulen amingmingangge ambiyeg libahon ino fam ele uruk lit, ”Nare, ninibam luk ohon! Nikniyen wam keledai itano wenggel ha fug angge nit fahet indi anggin hahu rohon lulen ma!” ibag.

⁶Ibagma ap inowen ele uruk lit, ”Pok, o pumbuk tu fam Allah amingmingangge misig aben fano peruk ahun eke wereg. Aren te tu men ari men teko lahu ulug hiyag isarukon tem toho teko laruk. At ambeg lulmu wam keledai itano wereg ambeg hiyag nisamisi ano,” ibag.

⁷Ibagma Saulen, ”Nit ambeg lul halug nungge walug lul? Roti nit nenesum fam yunggatukukon eleg aha. Allah amingmingangge og utukon elehen nungge niren og umul?” ibag.

⁸Ibagma ap inowen Saul fam, ”Uang we tor angge anden foroho lahiyon Allah amingmingangge og itminmu aren wam keledai wereg ambeg hiyag nisamisi,” ibag.

⁹Ibagma Saulen, ”Fano ehenma ambeg lul,” ibareg o pumbuk Allah amingmingangge wereg ambeg ino libag. O pumbukmu lahul ulug larukmen hiyap tuhumon ik hinanggul ulug larukmu salkal ibag. Salkal ibareg hiyap itano fam, ”Fulu roho hiyag isaruk ahun ino tuma wereg ano?” ulug umung isibag. Allah wene hiyag isaruk ahun nabi fahet indam fulu roho hiyag isaruk ahun uruk latfag. Ari fahet indam ap eke Allahn peruk ane hinog og ha larukon inowen, ”Fulu roho hiyag isaruk ahun ambeg lul,” uruk latfag.

¹²Umung isibagma hiyap itanowen, ”Yu wereg, ketiya eneg hit henelukema laha, folo-folo aliyek! Yoho punu ino fam Allah olohotma seni esebul ulug ap anggolo luhal arik lahasama ar oho o pumbuk lendi fam laha.

¹³O pumbukmu lahalihipteg at suburu naruk ambeg punumu uwan lahuk fugmu hit tam ambeg lalihip. Aren Allah fahet umbul peheson fahet Allah fam sembahyang imisimu suburu nul ulug ap anggolo arimanowen at nangno ruruk lit wereg. Ari fahet at uwan lahuk fugmu folo ambeg lahiyek!” ibag.

¹⁴Ari ibagma Saul amingmingangge men lahibareg o pumbukmu kibagma Samuel ino punumu lahamin ulug larukmen it men salkal ibag.

¹⁵Saul Samuel ambeg uwan wam fugmu NINIKNI Allahn tam Samuel fam hiyag utuk lit,

¹⁶”Sono likiya mo tiya haham Anden Benyamin ahun misig hat hambeg monde fik waruhuk. Monde fik waruhukmu haren ahaluwe amben fanowon unggulmu hilili feruk lit Israel inap fet enesug laruhun ulug ap suwon raja unduhuk fuhun. Aren An numalikisi arimano Filistin inap ininggikmuwen windat enebuhu. Nit asengseng toho welahe ulug ya nga urukon Anden hol harikikteg let enebuhuk peruk lahi,” ibag.

¹⁷Ari ibag ane hikit toho Samuelen Saul yet hibagma NINIKNI Allahn Samuel fam ele uruk lit, ”Ap Anden irikikon ino tu. Aren An numalikisi Israel inap sen enesug laruhu,” ibag.

¹⁸Ari urukmu itano Saul ino elehet oko kilabeg ambeg sokolma watfareg Samuel iraham unduhuk lit, ”Nare, fulu roho hiyag isaruk ahun ibam kema wereg?” ulug kapal hibagma

¹⁹Samuelen Saul fam ele uruk lit, ”Fulu roho hiyag isaruk nahun tu welahi. Hat tam punumu lahamihin. Yoho an men suburu ambiyeg nulteg sono likiya hat hindimu wenggel haruk lahen ane fahet anden hiyag huruhukmu hibam lahun.

²⁰Wam keledai haren tohon longgo urusama hup hinahanam yami eneptikinon itano hiyaharusa angge re hakol ha fug! Mun angge man angge fanowon Israel kinang fam werehon hat men hori menen ngi reg lamuhuben hindi anggin toho welam fug,” ibag.[6]

²¹Ari ibagma Saulen hebeloho uruk lit, ”Israel inap ununggul unuk winon palimu weregma nit nununggul unuk Benyamin ninap mondabi apma welahe. Nit nununggul unuk Benyamin misig famen nori winonen an numba Bekhorat inowen indag nenesuhon nunubahet siyag peruk ninap welahe angge re nungge fahet haren an nubam ari uruk lahen?” ibag.

²²Ibagma Samuelen Saul amingmingangge men o humon ino hondog eneplug kibareg ap teng misig welatfahon onorohole fil lehoma hur amek ulug hiyag isibag.

²³Hiyag isibareg Samuelen suburu esetfag ahun fam hiyag utuk lit, ”Wam unu an fahet embemihin ulug og hirihiyon ino ketiya og nirik ma!” ibag.

²⁴Ibag ane hikit toho suburu esetfag ahun inowen wam uyug men tot sebe roho Saul olohotma imbik watfag. Imbik watfagma Samuelen Saul fam ele uruk lit, ”We tor angge holohotma imbik wahayon aru namihin! Ap winon men yoho nalihiben wam uyug aru hat fahet imbihi,” ulug hiyag itfag. Ari ibareg Saul men Samuel men suburu ambiyeg naruk latfag.

²⁵Suburu nibareg punumuwen o pumbukmu wambibareg Samuel men Saul men hinawimu nohoruk lit enele uruk latfag.

²⁶Nohibareg o ket sakan tirikim Samuel in atfareg Saul hinawi weregma wol turuk lit, ”In amin! An funggalma monde hubahik laminen luk!” ibag. Ibagma Saul in atfagma Samuel men ambiyeg wilip atug libag.

²⁷Libareg o pumbuk atogma wambibareg Samuelen Saul fam hiyag utuk lit, ”Hat hamingmingangge fam tam laruk lamin ulug hiyag itmihin. Hat te Allahn peruk ane hiyag hitminmu lamihinen welamin,” ibagma amingmingangge ino tam libag.