Read Apatani METHU 10 Bible Online

METHU 10 - Apatani bible

METHU 10

¹ Ho Mo mohka alyañlenye henjeajiñ atañmi mohko gyoliitii ho kacho yajiyallo mi mompa ladopa otority bitii, ho kapane achih-ahe ho herumyanka mi miipya ladopa.

²Alyañlenye kiiniñkonii atañka armyañ hii hiila: kappyopa, Saimon, humina Pitar hiila myambii donii, ho mohka anu Andrew; Jems Zebedi ka oho, ho Jon mohka anu;

³Pilip la Bartolomiu; Tomas la biijokajo myanii Methu; Jems Alpayas ka oho, ho Tadayas;

⁴Kanan ka Saimon, ho Judas Iskariot, huna mohmi talubalobo tiinii.

⁵ Siika alyañlenye mi Jisu kiiniñtii, mohlumi luliibiido, Midomiyu ka apurho ilyayo, ho Samaritan atañka taunho ahlyayo,

⁶ hojalo Isrel ka ude hoka subuñ lyunii atañ koya ingelya.

⁷ Ho nunu ilyila tonsḛrkhenyo tolya, lubiidola, Dariiganda ka raddeganda hii alah ho dokuke.

⁸Achih mi miipya tolya, shiiniimi turdo miitolya, tahikoya giiniimi ase tolya, igii mi mompa tolya. Nunumi riimapa bitii, binyopa bitolya.

⁹ Rupu bagii lyayo, ayyiñ tiirḛ, bitie tiirḛ nunuka hupoho,

¹⁰ chiru bagiiyo nunuka myodi inko, tarii benye balyayo, nyotananii tiirḛ bayo; panyi tiirḛ; niimpalukoda miigo miiniibo diigomi diikiñdo.

¹¹Ho nii taun malo lemba ho ahchi, metolya hoka khiiniiñjami, ho nii dahepa nunu inte kuma ho dutolya.

¹²Ude ho ahdalyi lutolya, “Chimie nunuko dokiñcho.”

¹³Ho udeuru matiirḛ kariikatañ lyimilo, ho nunuka chimie mi ahta monke nento; hojalo hii matiirḛ kariikatañ malyi milo, nunuka chimie mi nunuko ahkur kiine tokulya.

¹⁴ Ho mi matiirḛ nunumi kariikatañ malyi milo malo nunuka luniiñ tama lyimilo, nunuka alih daka dimḛr mi lohe pipa siitolya nunuka hiika ude mi malo taun mika apatela ilyi kuho.

¹⁵ Jijeloda, Ngo nunumi lukoso, ayakacho kalyiku alloho Sodom la Gomora ganda nyitrḛ pigiilaya kendoke siika taun mi hentola.

¹⁶ Kato, Ngo nunumi subuñ hiilyañ pake siipya ka punkoho kiiniñ biilyinii; hopa tabu chitañ piibi tolya ho pakoo chitañ yanu tolya.

¹⁷ Miyu atañmi hendi nyatolya; niimpalukoda mohlu nunumi bulyañ ko lohepa tiilii bilyi diike, ho mohluka sinagog ho higor palyi diike,

¹⁸ ho ngiika piigopa nunumi govonor atañ la radde atañ nyiko hotiirḛ selii biilyi diike, mohluka hataho pyako kiine dupa ho Midomiyu atañmi mitrḛ.

¹⁹Niida nunumi tiipa liichi, hena yayo niihtañ payu luchinii malo nii hiilayu luchinii; niimpalukoda niihna nunu lukiñ donii hiika myoduho bikiñ doke;

²⁰ niimpalukoda hii nunu make ludonii, hojalo nunuka Aba ka Yajiyallo ke nunumi lugiñ nala lukiñ donii.

²¹ Anu abañ anya hii shiigo ubuho tiilii siikiñdo, ho aba hii mohka wiinga mi, ho wiinga atañ annii-aba mi chekho rikiñdo ho mohlumi siido pa miikiñdo;

²² ho nunu kone abilo kahu kokiñdo ngiika armyañ pa. Hojalo huna kami kalo lohepa pigii talyinii hii lyangur kokiñdo.

²³ Niida nunumi taun koneho miihimiire talyi, kone yaho hargiitolya; niimpalukoda jijeloda, Ngo nunumi lukoso, nunu Isrel ka hikha taunho inja ladii make, miyu ka Oho ka ahma rampa.

²⁴ Henjeajiñ hii atohka tonsḛrbomi kaye yamake, hiichulipa miira hii mohka atohmi;

²⁵ siikasi khe doke henjeajiñ ka tonsḛrbo chuli lyiniiñsi, ho miira hii mohka atoh chuli. Mohlu matiirḛ ude atoh mi Biljebul hiila gyodo koda, siimi uro yapa mohlu niihiila nipatalyi hiika udeuru atañmi.

²⁶ Hopa mohlumi biiso lyayo; niimpalukoda hang kone tiirḛ lapiñ tola atii kemake kakiñ mapa, malo achuñ niimi chimapa miikiñ make.

²⁷Niihna Ngo nunumi kamo ho lukodonii, hiimi hutoh ho luliñto; ho chomyo paka tapa niimi, ude ayoh ho dala gyukoto.

²⁸ Ho huna apomi menkiñ donii hiimi biiso lyayo hojalo yallo mi mella kemma ke; hiilamapa hiimiya biiso tolya huna yallo la apo nyimi mella kendonii yamuganda ho.

²⁹Paripiita donye mi posa perepa pyuma siipeha? Ho hiiko hokii dore tiirḛ kiiddi ho huyi kema Aba ka chimapa.

³⁰Hojalo niika dinta hoka dimmu sohe lohepa hikha khiika tola doke.

³¹ Biisoyo, hopa; nunu abuje paripiita atañmi khiiniiñ yapa lyidoke.

³² Hopa kone abi huna ngiimi miyu ka hataho luko talyinii, Ngotiirḛ luko talyi dariiganda daka Aba ka hataho;

³³hojalo huna ngiimi miyu ka hataho chima luchinii. Ngotiirḛ chima luchi dariiganda daka Aba ka hataho.

³⁴ “Hiila heyo Ngo siika kiiddiso chimie ahgiipa ahdo hiila; Ngo chimie mi ahgii pamake, hojalo ilyo mike.

³⁵Niimpalukoda Ngiika ahniiñsi oho mi abami chekho kiine dupa, ho nyimii wiinga mi mohka annii mi, ho nyahii mi mohka ayyobomi;

³⁶ho nunu mika ahha baniihii nunuka atoh ude hokiisiike.

³⁷ Huna aba mijalo annii mijalo ngiimi uro yapa hendonii hii ngiipa khiiniiñpa lyima; ho huna hiiro mijalo malo hiimii mijalo ngiimi uro yapa hendonii hii ngiipa khiiniiñpa lyima;

³⁸ho huna atoh ka pogyañ mi jobiila ho ngiimi imbo tamanii hii ngiipa khiiniiñpa lyima.

³⁹Huna atohka sango kappa talyinii hii alyu siikiñdo hiimi, ho huna alyu siitiinii ngiipa hii sango kappa kendo.

⁴⁰ “Huna niimi kariidonii ngiimi ke kariidonii, ho huna ngiimi kariidonii ngiimika kiiniñ bomike kariidonii.

⁴¹Huna nyibuhenii mi nyibuhenii hiila kariidonii hii nyibuhenii ka ajunii juko kendo, ho huna miyu denkimi kariidonii niimpalukoda mo miyu denki hiila hii miyu denkika ajunii juko kendo.

⁴² Ho hujalopa siika atu kone mi yasie lakhii turejalo bichi niimpalukoda mo ngiika henjeajiñ hiila, jijeloda, Ngo nunumi lukoso, mo mohka ajunii jusa niimi alyu shiikiñma.”