Read Apatani METHU 11 Bible Online

METHU 11 - Apatani bible

METHU 11

¹ Ho Jisu alyañlenye henjeajiñ atañmi hiila miitolya hiila luko luja tela, mo hokii iri tiiku tonsḛrdupa ho tonsḛrkhenyo tadupa hiila mohluka citi atañho.

² Siisi Jon pattiih ude hokiila Kristo ka miiniiñluniiñ mi tapa lala, mo mohka henjeajiñ atañmi kiiniñtii luliilala

³ ho mohmi lutii, “No hiika ahsanii bopeha, malo ngunu koneyami kalya talyipeha?”

⁴Ho Jisu mohlumi lusitii, “Inge ho Jon mi lukohe nunu nii tapatii ho nii kappatii:

⁵ micha kapa nyadaku ho liicha indaku, tahikoya giiniihii darii nyadoku ho rubi tapa nyado, ho shiinii turidoku, ho arro atañmi ayapuyu tonsḛr khenyo biido.

⁶Ho mo lyanko kendo huna ngiimi chekho manii.”

⁷Mohluka inne kuho, Jisu Jon ka piigorago mi luko ritii miyuabuje danii atañmi: Nunu niihmi katela zabyo ho intehe? Pemu mika allyi heku niimiha?

⁸Hokoda niimpa nunu agoho innyate? Khiiniiñ pulye giito laka miyu danii mi kadupa hiila? Kato, huna Khiiniiñ pulye hokii giidunii hii radde ude atañ hoke dudunii.

⁹ Hokoda niimpa nunu intehe? Nyibuhenii mi kadupa ha? Ḛh, Ngo nunumi lukoso, ho Nyibuhenii mitrḛ abuyapa.

¹⁰ Si hiike humina siikasi ketiinii, Kato, Ngo ngiika puyu bakobomi niimi kapyo yapa kiiniñ biilyi ke, hii niika lembo mi niipa miimyo bikiñdo.

¹¹Jijeloda, Ngo nunumi lukoso, nyimii loka bukonii hokii Jon Baptisma binii bomi kaye yapa kone hetrḛ sari kemake, hojalo huna dariiganda ka raddeganda ho khiima japa lyidonii hii mohmi kaye yado.

¹² Jon Baptisma binii boka allo hokii khiiri biila siisilohepa dariiganda ka raddeganda ho herugiila do payagaya siiniiñmi, ho payagayanii miyuatañ hiimi chechepa chenya biido.

¹³Niimpalukoda hikha nyibuhenii atañ la dapo nyi Jon lohe pa nyibuhentii;

¹⁴ ho siimi matiirḛ nunu taje talyikoda, mo Elija ke hiika ahsabo.

¹⁵ Hukiina yaroo tana naniipa giidonii, hiimi take nento.

¹⁶ Hojalopa siika santuñ mi Ngo nii mipe khiitiñ nanchinii? Siikasi himme atañka biijḛr lengo hoka dunii chikañdo ho mohluka sohiñ atañ mika gyoniiñ chikañdo,

¹⁷Ngunu niipa ellu benda, ho nunu nasu soma; ngunu shiima khedu, ho nunu heru nyama.

¹⁸Niimpalukoda Jon ahbiila diima tamatii, ho mohlu ludo, Mohko igii giidoke,

¹⁹miyu ka Oho ahbiila diido-tando, ho mohlu ludo, Kato, diiretanche ho owtanga nii, biijokajo myaniiatañ la ingyamiigya atañka ajiñ! Hojalo helananiisi kala giikiñ doke mohka miiniiñ atañlo.

²⁰ Ho mo hadii biidola lukoritii citi atañ ho nohna mohka abuya kaye miigo atañmi miitiinii, niimpalukoda mohlu henkur nyamatii.

²¹“Nunupa aiya hiila hembido, Korajin! Nunupa aiya hiila hembido, Betsaida! Niimpalukoda nunukoka kahe miigo miiniiñmi Tayer la Sidon nyiho miitii kodalya, mohlu bilo henkur tiikudo niirepulye la mubu nyiho.

²²Hojalo Ngo nunumi lukoso, ayakacho kalyi alloho Tayer la Sidon nyitrḛ pigiilaya kendoke nunumi hentola.

²³Ho nunu, Keparnam, nunumi dariiganda ho nencha lyido hendoha? Nunumi nelimyoko hoya nelo kendo. Niimpalukoda nunukoka kaye miigo miiniiñmi Sodom hoya miitii koda, hii siilo lohe dotii rando.

²⁴ Hojalo Ngo nunumi lukoso ayakacho kalyi alloho Sodom kiiddiya pigiilaya kendoke nunumi hentola.”

²⁵ Hiika myodu ho Jisu lutii, “Ngo niimi payapacho ludu, Aba, dariiganda la kiiddi nyika Attoh, no siika drih siimi chinnii la tala miyu kokii achuñ lala ho chimanii atañ miya kakiñtii;

²⁶Ḛh, Aba, niimpalukoda hii niika aroh-aya laka henju.

²⁷ Kapane drih atañhii Aba ka ngiimi biniiñke, ho kone hetḛr chima Oho mi Aba kontiisii, ho kone hetḛr chima Aba mi Oho kontiisii ho humina Oho kahetiinii hiimi mo kakiñ du.

²⁸Ngiiko ahto, hutiina khelanyola ho hiigii aie badonii, ho Ngo nunumi hemmoko bichike.

²⁹ Ngiika halemi nunu bagiito, ho ngiiko hokii chingiihe; niimpalukoda Ngo chimeeñ ho yanu ahha giiduke, ho nunu nunuka yalloka hemmo komi kappa kendoke.

³⁰Ngiika halesi bapyo doke, ho ngiika hiigiisi haju doke.”