Read Apatani METHU 13 Bible Online

METHU 13 - Apatani bible

METHU 13

¹Hiika allo ho Jisu ude hokii ago lintii ho siimie ka aruñho dutii.

² Ho hempḛr miyuabuje mohmi dakḛr pabiitii, hopa huluho mo chatii ho hiikaho dutii; ho hikha miyuatañ siilyo ho datii.

³Ho mo mohlumi lukotii abuje drih lutiñ naniilo, lubiidola: Lilonii kone lilotapa intii.

⁴Ho mo lilo kiile, kormo tange siiliñ ho chohitii, ho piita atañ gohatii ho hiimi padotii.

⁵Kormo tangehii yalañ ho chohatii, nohna kiiddi abu nyima tiinii, ho hii ohepada beko datii, kiiddi urañ paka nyima lyiniiñ,

⁶hojalo danyi chada kiile hiika hiimi bembiido, ho hii liima giima siilyinii hiimi bensiñ datii.

⁷Tangenii kormo hii tareapya ho chohatii, ho tare hii sanchatii ho hiika hiimi halotii.

⁸Tangenii kormo hii aya kiiddiho chohatii ho amoo giiliñtii, tange lange, tange alyañkhe, tange hikhañhe.

⁹Hukiina yaroo giidonii, mohmi take nento.

¹⁰Ho henjeajiñ atañ ahtii ho mohmi lutii, “Niimpa no mohlumi lutiñ naniilo luriidu?”

¹¹Ho mo mohlumi lusitii, Nunumi Pinii ka raddeganda ka khiibe chimma niimi chindopa bitola do, hojalo mohlumi siimi bima.

¹² Niimpalukoda hukiina donii hiimi abu yapa bikiñdo, ho mohko poteje dokiñdo; hojalo hukiina nyimanii, mohkoka doniimi lohepa lara biikiñdo.

¹³Siikasi hopa ngo mohlumi lutiñ naniilo luriidu, niimpalukoda mohlu kasu lala kala nyama, ho tasu lala mohlu tala nyama, malo mohlu tachiñ nyama.

¹⁴Mohluko lyipetii Aijaya ka nyibuhelaka luniiñ: Nunu tasuda hojalo tachiñ nyama, ho nunu kaniiñhii kasuda pema kachiñ nyama.

¹⁵Niimpalukoda mohluka ahha hii piicha nyada, ho mohluka yaroo si tana nanii potedo, ho mohluka amee mi mohlu miti nyagiida, hiilamakoda mohluka amee lo mohlu kala nyakiñdo, ho mohluka yaroo lo tapa kendo, ho mohluka ahha lo tachiñ kendo, ho ngiiko ahkiñdo mohlu miipya kodupa.

¹⁶ Hojalo nunuka amee lyanko niike, niimpalukoda hii kanyada, ho nunuka yaroo, niimpalukoda hii tapada.

¹⁷Jijeloda, Ngo nunumi lukoso, abuje nyibuhenii ho denki miyuatañ nunuka kaniiñmi kanañ nyatii, ho hiimi kappa nyamatii, ho nunuka taniiñmi tana nyatii, ho hiimi tapa nyamatii.

¹⁸“Tato lilo niimika lutiñnaniiñ mi.

¹⁹Hujalopa raddeganda ka aguñmi tapa lala ho hiimi tachiñ tama, hiimi igii ahla ho ahha hoka lilo niimi lara biikiñdo; siika sike siiliñ hoka lilonii hii.

²⁰Yalañ hoka lilo niisi hiilake, mohlu aguñmi tapa dalyi, mohlu hempḛr nyibya loda hempyo biidola larii biido;

²¹hojalo mohluko liima giimatii, hojalopa iche kontii pigii lala, ho hentḛrkanyi malo miihimiire ahdalyi aguñ ka piigo pa, ohe pada mohlu giiyi dadu.

²² Ho tareapya hoka lilonii hiilake; mohlu hiika aguñ mika taniibo, hojalo supuñ mika hena, ho mingo hembyo, ho yoheya drih pachi mika hembyo hii ahla ho aguñmi lara biikoda, ho hii hang ahee higiima.

²³Aya kiiddi ho lilo niisi hiilake: mohlu aguñmi tapa lala ho tala biido hiimi; ho mo ahee hido, ho Hiliñnyatii tange lange, tange alyañkhe, ho tange hikhañhe.”

²⁴ Koneya lutiñnaniiñ mohlumi lukotii, lubiidola, “Pinii ka raddeganda mi khiitiñ nantii miyu ka aya kormo, mo aji hoka lilo niimi

²⁵hojalo miyu atañka imi laka doho, mohmika ahha-banii ahbiila ho emmoka agiñho tagurenso miilañ lilo bitii, ho intiiku.

²⁶Hopa endi sancha kula ho elyañ giiliñtii, ho tagurenso hiitḛr sancha montii.

²⁷Ho ude atoh ka miira ahbiila ho mohmi lutii, ‘Tonsḛrbo, no aya kormo masuha niika aji ho lilotonii? Niitañpana tagurenso chadonii?’

²⁸Mo mohlumi lutii, ‘Ahha-banii ke si miitiinii.’ Miira atañ mohmi lutii, ‘Hokoda no ngunumi ila inka atañmi pikuñ kencho hiila henduha?’

²⁹Hojalo mo lutii, ‘Ma; tagurenso mi pihkoda endi miilañmi pita kendoke tagurenso agiñho.

³⁰Anye rumi amoo pilyi lohepa sangiñ chake nento; ho amoo pidu myodu ho ngo pihnii atañmi luko talyike, Kapyo pa tagurenso atañmi pipyo to ho hiimi ngartola atiito rompa dupa, hojalo emmo atañmi ngiika nesu ho baliito.’”

³¹ Koneya lutiñnaniiñ mo mohlumi lukotii, lubiidola, “dariiganda ka raddeganda hii gihañ kormo chulido hiimi miyu labiila mohka baluho lilotii;

³²siikasi kormo atañ hopa koda penyo jaku, hojalo sika sancha lyiho hiisañ hiima hopa koda raro japa lyidu, ho sannii pa lyidu, niimpalukoda yapuñ hoka piita gonii tiirḛ asi puha ladu siika halloh ho.”

³³ Mo koneya lutiñnaniiñ mohlumi lukotii. “dariiganda ka raddeganda hii ipo chulido nii mina annii akha labiila ho hiimi hiira yatañ piiro rohiñ hemi kepu tola atiitii, hikha ipo lyimi menda hemi.”

³⁴ Hikha siika atañmi Jisu lutiñnambii dola lukotii miyu atañmi; lutiñnaniiñ luyo mapa mo hang ako tiirḛ lumatii.

³⁵Siikasi nyibuhenii ka luniiñmi lyipe kiine dupa miitii: “Ngo ngiika aguñmi lutiñnaniiñ luna naniiñpa gonko talyi, Ngo luliñ talyi niihna dohadolo mika pulyiho achuñ tiinii.”

³⁶Ho mo miyu atañmi apatela ho ude ura ho ahtiiku. Ho mohka henjeajiñ atañ mohko ahtii, lubiido, “Ngunumi aji daka tagurenso mika lutiñnaniiñ mi lukope.”

³⁷Mo lukotii, “Huna aya kormo lido nii hii miyu ka Oho ke;

³⁸ aji luniiñsi dohadolo ke, ho aya kormo luniiñsi raddeganda ka oho atañ; tagurenso luniiñsi diimmah ka oho atañ ke,

³⁹ho ahha-banii, hiimika lilobo igii ke; amoo pidu myodu luniiñsi nyantḛr anyañ ke, ho pihnii atañ miidopopi atañ ke.

⁴⁰Niihtañpa tagurenso atañmi pikuñ lala ho yamu hompa du, hii chulipa lyikiñdo anyañ nyantḛrho.

⁴¹ Miyu ka Oho mohka miidopopi atañmi kiiniñ kendo, ho mohlu mohka raddeganda hoka ingyamiigya dopaka miigiinii ho hikha ayamanii miinii atañmi gyokuñ kendo,

⁴² ho mohlumi yamu yala dokoho jopa liikiñdo; hiiko miyuatañ khela ho aih nyensula dokiñdo.

⁴³Ho denki atañ danyi chuli byokiñdo mohluka Aba ka raddeganda ho. Hukiina yaroo giidonii, hiimi take nento.

⁴⁴“Dariiganda ka raddeganda hii aji hoka alḛrdrih achuñ tola donii hiilyañdo, hiimi miyu kappa lala ho achuñtii; ho hempyo pa mo inkula hikha mohka drih doniimi pyula lala ho hiika aji mi riibiido.

⁴⁵“Hiira, dariiganda ka raddeganda hii kiiri miiniika tassañ mete donii hiilyañdo,

⁴⁶huna, hempḛr khiiniiñ tassañ pere kappa tela, inkula hikha mohka drih mi pyula lala ho hiimi riitii.

⁴⁷ “Hiira, dariiganda ka raddeganda hii pakhe chulido hiimi yasie siimie ho kulo lala kapane ngiiyyi kubii donii chuli;

⁴⁸hiika pote lyikuho, miyuatañ kiitiñ ho seliñ bukula ho aya hemi kahe lala yagiiho tulii lala hojalo ayamanii mi ripatii.

⁴⁹Hopa siika atañsi anyañ nyantḛr kupa miilyiho lyikiñdo. Miidopopi atañ ahkiñdo ho diimmah mi denki hokii kakhu linkiñdo,

⁵⁰ho mohlumi yamu yala dokoho jopa liikiñdo; hiiko miyuatañ khela ho mohluka aih mi nyensula dokiñdo.

⁵¹“Nunu hikha siika atañmi tala duha?” Mohlu mohmi lutii, “ḛh.”

⁵²Ho mo mohlumi lutii, “Hopa pagenii kone abi humina miikiñ tiinii dariiganda ka raddeganda pa hii si chulido ude atoh ka mohka alḛrdrih hokii niihna niti ho khu mika laliñnii chuli.

⁵³ Jisu siika lutiñnaniiñ mi luja lala, mo hokii intiiku,

⁵⁴ho mohka gandaho ahkula mo mohluka sinagog ho tonsḛrtii, hopa mohlu hemurtii, ho lutii, “siika miyu si nohkiiyu hiimkane chila ho siika miigo kahe atañmi chingiinii?

⁵⁵Si hiika bitie miiniika oho masu peha? Mohka annii Mary hiila masu peha? Ho mohka anu atañ Jems, Josep, Saimon ho Judas hiila masu peha?

⁵⁶Ho hikha mohka barmii atañ ngunu agiñho dama siipeha? Nohkiiyu hokoda siika miyu si siika atañmi chingiinii?”

⁵⁷ Ho mohlu mohmi khiipa ritii. Hojalo Jisu mohlumi lutii, “Nyibuhenii atañ khiiko mapa miimake atoh ganda la atoh ude mi opa lala.”

⁵⁸Ho hiiko mo abuje kahe miigo miila matii, mohluka henje nyama kopa.