Read Apatani METHU 15 Bible Online

METHU 15 - Apatani bible

METHU 15

¹ Ho Parisi atañ la pagenii atañ Jisu ko ahtii Jerusalem hokii ho lutii,

²“Niimpa niika henjeajiñ atañ miigyanyada amiabañ atañka ayu muju-lujumi? Niimpalukoda mohlu mohluka alah mi yasii nyama mohluka diilyiho.”

³Mo mohlumi lusitii, Ho niimpa nunu miigyanyadanii Pinii ka lujubiniiñmi, nunuka ayu miiju-lujju miya atiidupa?

⁴Niimpalukoda Pinii lutii, khiitolya nunuka annii-aba mi, ho Huna ayamapa luchinii annii-aba mi, hiimi siike nento loda.

⁵Hojalo nunu luda, Mi kone matiirḛ atohka annii-aba mi ludo koda, No nii ngiiko hokii labiikenne hiimi Pinii mi bito kuke, hii chulipa mo atoh aba mi khiima.

⁶Hopa, nunuka ayu miiju-lujju piigopa, nunu Pinii ka aguñ miya khiima miipa biido.

⁷Nunu apukahi! Aijaya mihu kadi ko katii nunumi, mo hiila lutii:

⁸Siika miyuatañ ngiimi mohluka nyachu lasu herii siidonii, hojalo mohluka ahha hii ngiiko hokii hempḛr adho ho do;

⁹piigo ama pasu mohlu ngiimi herii siidonii, tonsḛr nyada miyu ka khenyo niimi Pinii ka tonjuke hiila.

¹⁰Ho mo miyu atañmi mohko gyoliitii ho mohlumi lutii, “Tato ho talanyato:

¹¹ ura hoka diilii giinii miyu mi kacho miipa make, hojalo niihna aguñhokii lindonii, hiike miyu mi kacho miipa donii.”

¹²Ho henjeajiñ atañ ahbiila ho mohmi lutii, “No chinduha Parisi atañ chekho nyane siika luniiñ siimi tapa lala?”

¹³ Mo lusitii, “Sannii buhe abi ngiika dariiganda daka Aba ka ali manii mi bupa kendoke.

¹⁴Mohlumi kapa siito, mohlu micha lembo pagii niike. Ho micha kone matiirḛ micha mi ingii dokoda, anyeru paka ho chupa hikiñdo.”

¹⁵Hojalo Pitar mohmi lutii, “Lukoludḛrpe ngunumi lutiñnaniiñmi.”

¹⁶Ho mo lutii, “Nunu tiirḛ siisilohepa tachiñ nyama rampo?

¹⁷Nunu kapama aguñ hoka diilii giinii erre hosu ahsu donii, ho limpa siido?

¹⁸ Hojalo nii aguñhokii luliñdo hii ahha hokii lindo, ho hiikahii miyumi kacho miipa giido.

¹⁹ Niimpalukoda ahha hokiisii diimmah heniiñ hii linsu donii, mensuniiñ, ipfyonii, datuapu, diipyoniiñ, amuhpaka haki duniiñ, nipasiiniiñ.

²⁰siika atañ sinya miyu mi miibḛr donii; hojalo alah yasii mapa ka diiniihii miyu mi miibḛr make.”

²¹ Ho Jisu hokii intiiku ho Tayer la Sidon nyika gandachie ho intii.

²²Ho kato, Kanan hoka annii akha kone hiika ganda hokii ahtii ho gyutii, “ngiimi arohpe, O Attoh, David ka Oho; ngiika nyimii wiinga si hempḛr uropa igii lo jarpiñ kobiitola doke.”

²³Hojalo mo hang aguñ lusimatii mohmi. Ho mohka henjeajiñ atañ ahtii ho mohmi lyartii, lubiidola, Mohmi kiiniñ toku, niimpalukoda mo ngunuka kiiliñ khejo mola doke.

²⁴ Mo lusitii, “Ngiimi Isrel ude daka subuñ lyunii atañ kosu kiiniñ siitiinii.”

²⁵ Hojalo nyimii ahtii ho mohka hataho liibañ khangala, lubiido, “Attoh, ngiimi hembyuñpe.”

²⁶Ho mo lusitii, “Hiila ka miiniiñsi ayama, himme ka yatañmi labiila ho akie atañ mika kubi niisi.”

²⁷Nyimii lutii, “ḛh, Attoh, hojalo akie tiirḛ diitananii hokiika mohluka attoh ka diibi loniiñmi dusudu.”

²⁸ Ho Jisu lusitii mohmi, “Annii akha, niika henje hempḛr kahe doke! Niipa lyibi kiine talyike no hiila hendo.” Ho mohka nyimii wiinga ohepada hempyo datii.

²⁹ Ho Jisu hokii intiiku ho Galili siimi aruñhopa impo biitii. Ho mo putoo ho chatii, ho hiiko duhatii.

³⁰Ho hempḛr miyuabuje mohko ahtii, mohluka agiñho liicha, liikuñnii, micha, luha mi ahgiila, ho hiika atañmi mohka alih aruñho atiibitii, ho mo mohlumi miipya bitii,

³¹hopa miyuatañ hemur nyatii, mohlu luha ka luniiñmi kapalala, liikuñnii mi aya dopa kapalala, liicha mi indokupa kapalala, ho micha kapatiiku; ho mohlu Isrel ka Pinii mi assañtii.

³² Ho Jisu mohka henjeajiñ atañmi mohko gyolii lala ho lutii, “Ngo miyu atañmi kala la arohdo, niimpalukoda mohlu siilo lohiñ duku ngiika agiñho dabo monii, ho hang diisa nyima; ho ngo mohlumi haya dopa kiiniñ nangkuma, kiiniñ koda mohlu lembo ho haya nyanedo.”

³³Ho henjeajiñ atañ mohmi lutii, “Nohkii ngunu hiimkane yatañ siika zabyo so lahchi hiimkane miyu taropa?”

³⁴Ho Jisu mohlumi lutii, “Nunuko Yatañ penne do?” Mohlu lutii, “Pekkanuhe, ho ngiiyyi sonyo sonye sohiñhe.”

³⁵Ho miyu atañmi kiiddi ho duha tote hiila lutii,

³⁶mo yatañ pekkanuhemi la ngiiyyi mi tulala, ho payapacho lulala mo petutii ho henjeajiñ atañmi bitii, ho henjeajiñ atañ miyu atañmi bitii.

³⁷Ho miilañru diitii ho diide giitii; ho mohlu yagii giikkanuhe petu pepo nii diingo tango mi tukuñ tiiku.

³⁸Hoka diiniihe milobo jarpe diitii, nyimii la himme nyimi khiita mapa.

³⁹Ho miyu atañmi kiiniñ kulala, mo huluho chatiiku ho Magadan gandaho intii.