Read Apatani METHU 16 Bible Online

METHU 16 - Apatani bible

METHU 16

¹ Ho Parisi atañ la Sadusi atañ ahtii, ho mohmi tenkadupa mohlu dariiganda hokii kagiñnanii kakiñpe lubiido.

²Mo mohlumi lusitii, “Alyiñdalyi lyikuho, nunu ludu, Miidoyasie si aya nedo; niimpalukoda yapuñsi lanchañ do.

³Ho aro konchiho, ‘Siilo miido hunedo, niimpalukoda yapuñsi lanchañ do ho kamo ramba doniiñ.’ Nunu lulado yapuñ mi kala la nii lyikiñdo, hojalo nunu lula ma myodu ka kagiñnanii mi.

⁴ Diimmah ho ipfyodiipyo santuñ atañsi kagiñnanii medo, hojalo hang kagiñnanii kakiñ kema Jona mika kagiñnanii mi apa lala.” Ho mohlumi apatela ho intiiku.

⁵ Henjeajiñ atañ pache dalyiho bochi tiiku, mohlu yatañ bagii saniiñmi ahha ahiitii.

⁶ Jisu mohlumi lutii, “Hendi nyato ho hendi latiika Parisi atañ la Herod ka ipo nyi hokii.”

⁷Ho mohluka punkoho taka siinyatii, lubiidola, “ngunu hang yatañ bagiima.”

⁸ Hojalopa Jisu, siimi hempa biitola, lutii, “Nunu henje papo atañ, niimpa nunu taka siinyada jije nunuko yatañ nyimaja?

⁹ Nunu siisi lohepa tala nyama rampo? Nunu yatañ pengo hela harje jarngo hemika honiiñmi hendḛr mapo, ho yagii giine nunu tukuñ toku?

¹⁰ Malo yatañ pekkanuhemi ka harje jarpe mika honiiñ, ho yagii giine nunu tukuñ toku?

¹¹Niihtañpa nunu siimi tala nyama Ngo yatañ ka piigo mi luma hiila? Hendi nyatiika Parisi atañ la Sadusi atañka ipo hokii.”

¹²Ho mohlu tala nyatii mo mohlumi ipo miiyo nii yatañ hokii hendito hiila mapa, hojalo Parisi atañ la Sadusi atañka tonsḛr niihokii ludo hiila.

¹³ Siisi Jisu Kaesarea Pilipi gandachie ho ahtii, mo tahiitii mohka henjeajiñ atañmi, Miyu ka Oho mi miyuatañ nii luda?

¹⁴ Ho mohlu lutii, “Tange ludo Jon Baptisma biniibo, tange ludo Elija, ho tange Jeremiah malo nyibuhenii kone.”

¹⁵Mo mohlumi lutii, “Hojalo nunu Ngiimi hu hiila ludu?”

¹⁶ Saimon Pitar lusitii, “No Kristo, turnii Pinii ka Oho.”

¹⁷ Ho Jisu lukotii mohmi, “Lyanko niike nunu, Saimon Bar-Jona! Asiialyo la ai nyi siika simi kakiñ make niimi, hojalo ngiika Aba ke huna dariiganda ho dunii.

¹⁸ Ho Ngo niimi lukoso, no Pitar ke, ho siika yalañ so Ngo ngiika gyoliñkonii mi penchi, ho shiigo ka harchichike hiitḛr siimi lutiñ lakiñ make.

¹⁹ Ngo niimi dariiganda ka raddeganda mika hekko naniimi biso, ho niijalo nunu kiiddiapiñ so ahnga siichi hii dariiganda ho ahnga kendoke, ho niijalo nunu kiiddiapiñ so ahnga siitema hii dariiganda hotiirḛ ahnga siikiñma.”

²⁰ Ho hempḛr uropa henjeajiñ atañmi lutiñ biido mo Kristo ke hiila mihmi lukoyo hiila.

²¹ Hiika myodu jaho hokii Jisu henjeajiñ atañmi kakiñtii mo Jerusalem ho inkiñdo lodake ho abuje heru henkiñdo amiabañ ho nyibu burii ho pagenii atañ kokii, ho menko kendo, ho allo lohiñ niika hiiba turikendo.

²²Ho Pitar mohmi sebiila ho mohmi gatii, lubiidola, “Pinii nyike neyo siimi, Attoh! Siimi pema niiko lyike nente make.”

²³ Hojalo mo mokur biila ho Pitar mi lutii, “Ngiiko hokii insato, Saitan! No ngiimi lutiñluko papo; niimpalukoda no Pinii kii dalyi damake, hojalo miyu kii dalyike.”

²⁴ Ho Jisu henjeajiñ atañmi lukotii, Hujalo matiirḛ ngiika kiiliñho ahbo nando koda, mohmi atoh mi hempa siike nento ho mohka sangya mi jobiila ho ngiimi imbo monke nento.

²⁵ Niimpalukoda hujalopa atoh ka sango mi lyangur siichi hiimi alyu siikiñ doke, ho hujalopa mohka sango mi ngiipa alyu siichi hiimi pakiñ doke.

²⁶Niimpalukoda niihpe miyu pa aya donii, mo matiirḛ hikha supuñ mi biisu dojalo ho mohka sango mi alyu siido koda? Malo niihpe miyu si mohka sango pa bisi siila kendo nii?

²⁷ Niimpalukoda Miyu ka Oho ahkiñdo mohka miidopopi agiñho mohka Aba ka tatukatu lyiho, ho mo hikha miyu atañmi bikiñdo niihna mohlu miitiinii.

²⁸Jijeloda, Ngo nunumi lukoso, so tange danyada mohlu miyu ka Oho mi mohka raddeganda ho ahma rampa mohlu shiinii mi hempa kempa ke.