Read Apatani METHU 22 Bible Online

METHU 22 - Apatani bible

METHU 22

¹ Ho hiira Jisu mohlumi lutii lutiñnaniiñ lo, lubiidola,

²Dariiganda ka raddeganda mi khiitiñ nando koda radde ka mohka wiinga paka mihie lahbi lyiho hoka diigo honiiñ chitañdo,

³ ho mo mohka miira atañmi kiiniñtii hutii mina mihie lalyi hoka diigo diisa hiila gyotiinii hiimi gyobii hiila; hojalo mohlu ahnya matii.

⁴Hiira mo koneya miirami kiiniñ biido, lubiidola, Hutii mina gyotiinii hiimi lukohe, kato, ngo nunupa henju tiike alyiñapiñ dudupa, ngiika siihhiibo la ngiika siibuñ atu babu jami patiike, ho kapane henju tiike; ahto mihie lalyi hoka diigo diikoso.

⁵Hojalo mohlu hiimi tamkalo mapa ho inya tiiku, kone mohka aji ho, ho tange hii mohluka kiiri miiko ho,

⁶ho tange mohluka miira atañmi setu lala, hiinyañ mohi miipyutii, ho mohlumi mentii.

⁷Radde hadiitii, ho mo mohka sipahi atañmi kiiniñ lala ho hiika menii atañmi mensi biido ho mohluka citi mi yamu hompatii.

⁸Ho mo lutii mohka miira atañmi, Mihie lasa niisi henju tiike, hojalo hutii mina gyotonii hii khiiko dupa lyimake.

⁹Hopa inge lengobyagoho, ho mihie lalyi hoka diigo diidupa niimkane no gyola kendo kappa nii hemi gyobii.

¹⁰ Ho hiika miira atañ lembo ila ho humina mohlu kappa tiinii hikha gyotii, denki miilañ ho demma miilañmi; hopa mihie lalyi hoka diigo diikoho poteje nyibo ahtola dutii.

¹¹Hojalo ahto laka nyibo dunii atañmi radde kadi kiile, mo kappatii miyu kone mihie lalyi hoka giiju mi giimapa;

¹² ho mo mohmi lutii, Ajiñsi, niihtañpa no mihie lalyi hoka giiju mi giimapa so ahdu? Ho mo hang luko lamatii.

¹³ Ho radde lutii kalyañ laka danii atañmi, Mohka alih alah nyimi rato, ho kamoramba doko jopa liito; hiiko miyu khela ho mohluka aih nyensu la dokiñ doke.

¹⁴Niimpalukoda abuje gyoliitii, hojalo kahe konii chesu.

¹⁵ Ho Parisi atañ intiiku ho mohlu lusu nyatii niihtañ pape mohka luniiñso mohmi halii talyinii hiila.

¹⁶Ho mohlu mohluka henjeajiñ atañmi mohko kiiniñtii, Herod agiñho, lubiidola, “Tonsḛrbo, ngunu chindo no jije, ho Pinii ka lembo mi jije loda lukodo, ho miyu mi hang henama; niimpalukoda no miyu ka mingotamo mi hang henama.

¹⁷Lukope ngunumi, hokoda, no nii hiila hendo. Kesar mika biijokajo biniiñ si bidi kopeha, malo bikha dopeha?”

¹⁸Hojalo Jisu, mohlu nii lupa ludo hiimi chimbii tola, lutii, “Niimpa ngiimi tenkadu, nunu apukahi atañ?

¹⁹Ngiimi biijokajo bisanii tiicko mi kakiñpe.” Ho mohlu posapere biilii bitii.

²⁰Ho Jisu mohlumi lutii, “Hu chitañdo si, ho siika miichiniisi hupe?”

²¹ Mohlu lutii, Kesar kiicho. Ho mo mohlumi lutii, Hopa drih atañ Kesar kiimilo Kesar mi bito, ho Pinii ka drih atañmi Pinii mi bito.

²²Siimi mohlu tapa lala, mohlu aluñtii; ho mohlu mohmi apa tela ho intiiku.

²³ Hiika allo jaho Sadusi atañ mohko ahtii, huna ludanii turiturku nyima hiila; ho mohlu mohmi takatii,

²⁴lubiidola, Tonsḛrbo, Mose lutii, Miyu matiirḛ siido koda, mohkii himme oho nyima koda, mohka anu mihie biisi kendo loda, ho mohka abañpa himme oho sucha bikiñdo.

²⁵Siisi ngunuko anuabañ kanuhe dutii; kapyo jahii mihie latii, ho shiitii, ho himme oho nyimapa mohka mihie mi mohka anu mi apabitii.

²⁶Hii chulipa anyenii ho hingenii, hikha midiñkanu lohepa.

²⁷Miilañ ruka hiiba ho, annii akha shiitiiku.

²⁸Hiikohopa, turiturku lyiho, midiñkanuhe hokii huka mihie pa lyikiñdo? Niimpalukoda miilañru mohmi biitii.

²⁹Hojalo Jisu mohlumi lusitii, Nunu lukha doke, niimpalukoda nunu piniipota mitrḛ chima, ho Pinii ka harchichike mitrḛ.

³⁰Niimpalukoda turiturku lyikuho mohlu mihie lakiñma ho milo tiirḛ inkiñma, hojalo miidopopi chuli dariiganda ho dakiñdo.

³¹Ho shiinii atañka turiturku saniimi, nunu rika matopo nii hiilana Pinii nunumi lutola donii,

³²Ngo Abraham ka Pinii ke, ho Isak ka Pinii, ho Jakob ka Pinii? Mo shiinii atañka Pinii make, hojalo turnii atañ kiike.

³³ Ho miyuatañ siimi tapa lala, mohlu hemur nyatii mohka tonsḛr niimi.

³⁴ Hojalo Parisi atañ mo Sadusi atañmi adumadopa lulo biine hiila tapa lala, mohlu tongepa ahkuñ siitii.

³⁵ Ho mohluka apur hokii kone, dapochenii, mohmi gonge takatii, mohmi tenkala.

³⁶“Tonsḛrbo, nii bope dapo hoka kaheja lujubiniiñ?”

³⁷Ho mo mohmi lutii, “No Attoh niika Pinii mi hikha niika ahha lo hentolya, ho hikha niika yallolo, ho hikha niika punyulo.

³⁸Sike kaheja ho kapyoja lujubiniiñ.

³⁹ Ho anyenii hiila ke, Nunu atoh ariapii mi atoh mika henchañho hentolya.

⁴⁰Siika lujubiniiñ gonye so hikha dapo la nyibuhenii atañ hengiñ nandu.”

⁴¹ Siisi Parisi atañka ahkuñ apala doho, Jisu mohlumi gonge takatii,

⁴²lubiidola, “Nii hiila nunu hendo Kristo mi? Huka oho pe mo?” Mohlu mohmi lutii, “David ka oho.”

⁴³Mo mohlumi lutii, Niihtañ pa hokoda David, yajiyallo lo harolupa kotola, gyotii mohmi Attoh, lubiidola,

⁴⁴ Attoh lutii ngiika Attoh, ngiika lahbi alah duto nii dahepa Ngo niika ahha-banii mi niika liidi ho atii tama?

⁴⁵David matiirḛ mohmi Attoh hiila gyodo koda, niihtañpa mo mohka oho pa lyila kendo?

⁴⁶ Ho kone hetrḛ mohmi aguñ gonge tiirḛ lusi lamatii, ho hiika allo hokii kone hetrḛ haro nyaku matii mohmi taka latrḛ taka dupa.