Read Apatani METHU 23 Bible Online

METHU 23 - Apatani bible

METHU 23

¹Ho Jisu miyuatañ mila ho mohka henjeajiñ atañmi lutii,

²Pagenii atañ la Parisi atañ Mose ka dukoho du;

³hopa mohlu nii hiila nunumi tonsḛrdo hiimi miito, hojalo mohluka miiniiñmi miiyo; niimpalukoda mohlu tonsḛr khenyo siida, hojalo miila miinya ma.

⁴ Mohlu hempḛr hiigii aie aba da, bala madopa, ho hiimi miyu ka dinta ho aba lala, hojalo mohlu hiimi lahchi ohe tiirḛ tenka moma

⁵Mohluka hikha mohluka miiniiñmi miyu atañmi miikiñla miida; niimpalukoda mohluka tiiriipappi miya peropa giitola ho jilya mitrḛ sobbe dopa giitola,

⁶ ho mohlu khiiniiñ duko dunañla lyidu butii apiñ diilyiho ho sinagog ho duko ayajaho dunañ la,

⁷ho biijḛr liipa ho khiiko nala, ho miyu atañlo tonsḛrbo hiila gyoko nala danyada.

⁸ Hojalo nunu tonsḛrbo hiila gyoko lyayo, niimpalukoda nunukii tonsḛrbo kone siike dusu dunii, ho nunu hikha anu barmiike.

⁹Ho kiiddiapiñ so miyu kone mitrḛ aba hiila gyolya yo, niimpalukoda nunukii Aba kone siike dunii, dariiganda daka duniibo.

¹⁰Atoh hiila tiirḛ gyolyayo, niimpalukoda nunukii atoh kone siike dunii, Kristo.

¹¹ Huna nunuka punkoho kaye japa dunii hii nunuka miirapa lyikiñdo;

¹² hujalopa atoh mi kaye miisu talyi hiimi atu miilo kendo, ho hujalopa atoh mi atu hensu talyi hiimi kahe miicha kendo.

¹³ Hojalo aiya la ludu nunumi, pagenii atañ la Parisi atañ, apukahi! Niimpalukoda nunu dariiganda ka raddeganda mi miyu atañmi miipiñ bibiido; niimpalukoda nunu tiirḛ ahma, malo huna ahpa miidonii hiimi tiirḛ ahke nema.

¹⁴Aiya hiila niimi hembido, pagenii atañ la Parisi atañ, apukahi! niimpalukoda nunu hiimie atañka ude mi diiluñ luluñda ho obyo pa kuniiñ mi kukiñ biidola; hopa nunu uroyapa halii kokiñdo.

¹⁵ Aiya la hembido nunumi! pagenii atañ la Parisi atañ, apukahi! niimpalukoda nunu miyu kone mi nunu ahiñpa miidupa kiiddi la yapuñ mi kone miida, ho hii nunu ahiñ paka lyilyi kuho, nunu mohmi nunu mitrḛ ronye uro yapa yamuganda ka oho pa miibiida.

¹⁶ Aiya la hembido nunumi, micha lembo pagiinii atañ, huna lunya danii, mi kone matiirḛ piniiude mi hemme hiita nando koda, hii hangma; hojalo kone matiirḛ piniiude daka ayyiñ mi hemme hiita nando koda, hii mohka hemme niimi miikiñdo loda.

¹⁷Nunu micha piicha atañ! Niihpe kaye yanii, ayyiñ peha malo piniiude peha ayyiñ mika darii giiniisi?

¹⁸Ho nunu luda, mi kone matiirḛ agyañ mi hemme hiita nando koda, hii hang ma; kone matiirḛ agyañ hoka ahmiñayiñ mi hemme hiita nando koda, hii mohka hemme niimi miikiñdo loda.

¹⁹Nunu micha miyuatañ! Niihpe kaye yanii, ahmiñayiñ siya peha malo agyañ siya peha ahmiñayiñ mika darii miiniiñsi?

²⁰Hopa huna agyañ mi hemme hiita nandonii, hii hoka hikha drih doniimi hemme hiita nando;

²¹ho huna piniiude mi hemme hiita nandonii, hii hiiko hoka dunii miilañmi hemme hiita nando;

²²ho huna dariiganda mi hemme nandonii, hii Pinii duta naniimi ho hoka duniimi hemme hiita nando.

²³ “Aiya hembido nunumi, pagenii atañ la Parisi atañ apukahi! niimpalukoda nunu hakhualyañ, taku tanyi, hamasanii ho nendu tiiniñ mi bisudo, ho khiiniiñya dapo miya khiipada, hensuniiñ ho aroh ho henje miya; siika atañ mitrḛ nunu miisuto, khiibe atañ mitrḛ khiipa mapa.

²⁴Nunu micha lembo pagiinii atañ, tamie yamiya niikhu lilala ho uth miya annii daniiñ!

²⁵ “Aiya la hembido nunumi, pagenii atañ ho Parisi atañ, apukahi! nunu turla pakoo nyika ago mi ase biisudo, hojalo hiika ura ho biiso kappa diiluñ luluñla chanchi dochi giidoke.

²⁶Nunu micha Parisi atañ! Kapyo pa turla la pakoo nyika ura miya ase torañ, ago mitrḛ darii siidopa

²⁷ “Aiya la hembido nunumi, pagenii atañ ho Parisi atañ, apukahi! niimpalukoda nunu byuh mika puloo nepunii chulido, ago ano kapyo siilala, hojalo uraho abuje miyu shiiniika lobulochi la kapane kacho taniiñ dokuñdo.

²⁸Hiichulipa nunu tiirḛ miyu kata agoho denki kappa siido, hojalo nunuka uraho poteje apukahi ho ingyamiigya giido.

²⁹ “Aiya la hembido, Pagenii atañ ho Parisi atañ, apukahi! niimpalukoda nunu nyibuheniiñ atañka byuh mi pubi siida ho denki miyu atañka drih mi miilyañ miidala atii siida,

³⁰lubiidola, ‘Ngunu matiirḛ ngunuka aba-apa atañ agiñho santii koda, ngunu mohluka nyibuhenii atañ mika melyi ho membo diima.’

³¹Hii chulipa nunu atoh atoh haki bisuda, hutiina nyibuhenii atañmi mentiinii nunu hiika oho hiila.

³²Miipe binge, hokoda, nunuka aba-apa ka miingomi.

³³ Nunu tabu, nunu lyolyichochi, niihtañpa nunu yamuganda hoka alii kosanii hokii hargiipa?

³⁴ Hopa Ngo nunumi nyibuhenii ho chilamiyu ho pagenii atañmi kiiniñ bito, nunu tange mi menkiñdo ho leda kendo, ho tangemi nunu sinagog ho higya pakiñdo ho miihimiire kendo ganda siiko kone abi,

³⁵ hopa nunuko ahkuñ kendo hikha kiiddiapiñ hoka denki miyuatañ mika menniiñ he, lugo giimanii Abel kokii khiiri biila Barakiah ka oho Zakariah ka shiiniiñ lohepa, humina nunu dariinenchañ la agyañ ka punkoho mentiinii

³⁶ Jijeloda, Ngo nunumi lukoso, hikha siika atañsi siika santuñ rongeso ahkiñ doke.

³⁷ “Jerusalem, Jerusalem ha, nunu nyibuhenii atañmi membiine ho humina kiiniñ tonii hiimi yalañ kuda! Rone ngo nunuka wiinga atañmi tongepa paro annii ka gugur guchañho gugur buchi, ho nunu miike nemata!

³⁸Kato, nunuka ude mi arapa apabikiñ doke.

³⁹Niimpalukoda Ngo nunumi lukoso, nunu hiira ngiimi kappa kemake, nii dahepa nunu lutema, Lyanko kendo hii huna Attoh ka armyañ pa ahdonii.”