Read Apatani METHU 4 Bible Online

METHU 4 - Apatani bible

METHU 4

¹Hiika hiibaho Jisu mi yajiyallo hii zabyo ho ingiitii igii mi tenkalarka kiine dupa.

²Ho mo allo loalyañpiilye ho ayoh yoalyañpiilye nyotii, hiika hiiba ho mo haya ritii.

³Ho tenkalarka bo ahtii ho mohmi lutii, “No Pinii ka Oho milo, siika yalañ siimi luto yatañ pa lyito hiila.”

⁴Hojalo mo lusitii, Hiila ketola do, Miyu diigo diila kontii samake, hojalo kapane Pinii ka aguñ hoka goliñ niiloke.

⁵Hiika hiibaho igii mohmi darii citi ho ingiitii, ho mohmi piniiude mitu jaho chagiitii,

⁶ho mohmi lutii, No matiirḛ Pinii ka Oho milo, sokiila no huhi huka he; niimpalukoda hiila ketola do, Mo mohka miidopopi atañmi niipa lubi kendoke, ho Mohluka alah lo niimi mohlu jotu biilyi diike, hiilamakoda niika ludu mi yalañ ho tiilyido.

⁷Jisu mohmi lutii, “Hiira hiila ketola do, ‘Nunu tenkala miiyo Attoh niika Pinii mi.’”

⁸Hiira, igii mohmi hempḛr putoo ohoh ho chagiitii, ho hikha kiiddiapiñ daka raddeganda mi kakiñtii ho hiika halyiñ milyiñ kapyo mi;

⁹ho mo mohmi lutii, “Hikha siika atañmi niimi biso, no matiirḛ giihala ho ngiimi herii lyimi lo.”

¹⁰Ho Jisu mohmi lutii, “Dasato, Saitan! Niimpalukoda hiila ketola do, ‘Nunu niika Attoh Pinii mi kontii heriito ho mohmi kontii miihoto.’”

¹¹Ho igii mohmi apa tela intiiku, ho kato, miidopopi atañ ahbiila ho mohmi kalyañ tiiku.

¹²Siisi mo Jon mi patiibotii hiila tapa lala, mo Galili ho ingu giitii;

¹³ho Nazaret mi apatela mo intii ho Keparnam siimie aruñhopa ahla hiiko dutii, Zebulun la Naptali ka gandaho,

¹⁴niimpalukoda nii hiilana nyibuhenii Aijaya lutiinii hiimi lyipe kiine dupa:

¹⁵“Zebulun ka kiiddi ho, Naptali ka kiiddi ho, siimie dalyi pa ahbiila, Jordan mi impo biila, Midomiyu atañka Galili ho

¹⁶kamo hoka miyu dunii atañ hempḛr uro hutoh kappatii, ho hutiina hiika ganda siiko ho dutiinii ho hutiina shiigo ubuho dunya tiinii hutoh byohu bitii.”

¹⁷Hiika myodu hokii Jisu tonsḛrkhenyo ribiitii, lubiidola, “Henkur nyato, niimpalukoda dariiganda ka raddeganda hii tunii dokuke.”

¹⁸Mo Galili daka siimie aruñho ila dola, mo anuabañ anye kappatii, Saimon humina Pitar hiila lutiinii ho mohka anu Andrew, siimie ho pakhe biitola ngiiyyi ladupa miila dotii; niimpalukoda mo anye ngiiyyi laniitii.

¹⁹Ho mo moanye mi lutii, “Ngiika kiiliñho imboto, ho ngo niinyimi miyu atañmika gyoniipa miiso.”

²⁰Nyibyaloda mo anye pakhe mi apatela ho mohmi imbo montii.

²¹Ho hiiko hokii inku kiile mo koneya anuabañ anye, Jems Zebedi ka oho la mohka anu Jon nyimi kappatii, hulu ho mo anye ka aba Zebedi ka agiñho, pakhe mi miitila dutii, ho mo mohlumi gyotii.

²²Nyibyaloda mo anye hulu la mo anye ka aba mi apatela, ho mohmi imbo montii.

²³Ho mo hikha Galili ho intii patii, mohluka sinagog ho tonsḛrla ho miyu atañmi Pinii raddeganda ka ayapuyu mi tonsḛrkhenyo la ho kapane achih ho une mi miipya bitii.

²⁴Hopa mohka tatukatu mi hikha Sairia ho tapa tatii patii, ho mohlu hikha achih niimi mohko ahgii bitii, huna une giila ho achihnii, jarpiñ konii, tahisiitiñ nii, ho liikuñnii atañ, ho mo mohlumi miipya bitii.

²⁵Ho hempḛr miyu taro mohmi imbomontii Galili hokii, ho Lemba polyañhe hokii ho Jerusalem ho Judia ho Jordan ka kiiliñ dalyi hokii miilañ.