Read Apatani METHU 8 Bible Online

METHU 8 - Apatani bible

METHU 8

¹Mo putoo hokii toku kiile, hempḛr miyuabuje mohmi imbo montii;

² ho kato, tahikoya giinii kone mohko ahtii ho mohka hataho liibañ khangatii, lubiidola, “Attoh, no hendo koda, no ngiimi darii dopa miila kendo.”

³Ho mo mohka alah lyuliñ la ho mohmi tennetii, lubiidola, “Ngo hendo. Darii toku!” Hempḛr nyibya loda mohka tahikoya hii darii tiiku.

⁴ Ho Jisu mohmi lutii, “Tageto kone mitrḛ luko lyayo; hojalo ingela, no atohmi nyibumi kakiñ siinge, ho Mose nii hiila lune hii chulipa ahmiñayiñ binge, miyu mika kakiñ kengi naniiñpa.”

⁵ Mo Keparnam ho ahda kiile, sipahi sabii kone mohko ahtii, mohmi yarbiido

⁶ho lubiido, “Attoh, ngiika miira liikuñla ude ho giila dohe, hempḛr henga henkhala.”

⁷Ho mo mohmi lutii, “Ngo ahbiila mohmi miipya talyike.”

⁸Hojalo sipahi Sabii lusitii mohmi, “Attoh, nohlo ngiika ude ho ahko dopa ngo khiiniiñ pa lyimake; hojalo no aguñ pa kontii luda tope, ho ngiika miira hempyo dakiñ doke.

⁹Niimpalukoda ngotiirḛ ngiimika otority giinii yaka agiñho dadu, sipahi atañmi ngo dagiila; ho ngo kone mi ludo koda, ‘inge,’ ho mo indu, ho koneyami, ‘ahto,’ ho mo ahdu, ho ngiika miira mi, ‘Siimi miito,’ ho mo hiimi miidu.”

¹⁰Jisu siika luniiñmi mohkokii tapa lala, mo aluñtii, ho mohmika imbo monii atañmi lutii, “Jijeloda, ngo nunumi lukoso, sichuli henje ngo kone hetḛr kappa ma Isrel hotiirḛ.

¹¹ Ngo nunumi lukoso, abuje miyu ahkiñ do danyichaggo hokii ho danyiaggo dalyi hokii tiirḛ ho diibo nyakiñ do Abraham, Isak, ho Jakob ka agiñho dariiganda ka raddeganda ho,

¹² hojalo raddeganda ka oho atañmi agoho jopa linkiñdo kamo ramba dokoho, hiikoho khela ho mohluka aih nyensula dokiñdo.”

¹³Ho Sipahi sabii mi Jisu lutii, “Inge; hiila lyike nenchi niipa niihtañpa no henjeda.” Ho miira mi hiika myodu jaho miipyatii.

¹⁴ Ho Jisu Pitar ka ude ho ahbii kiile, mo mohka ayyobomi doli achihla giila dopa kappa biido;

¹⁵mo mohka alah mi tennetii, ho mohka doli achih hempyo tiiku, ho mo guri kula mohmi miiho tiiku.

¹⁶Hiika alyiñ ho mohlu abuje igii jarpiñ koniiñ mohko ahgii bitii; ho mo aguñlo igii atañmi mompa bitii, ho hikha achihnii atañmi miipya bitii.

¹⁷Siikasi nii hiila na nyibuhenii Aijaya lutiinii hiimi lyipe kiine dupa lyitii, “Mo ngunuka ajju mi ho achih-ahe mi bapa bitii.”

¹⁸ Siisi Jisu hempḛr miyuabuje mohka aruñho kappa lala, mo pache dalyiho bonge hiila lubiido.

¹⁹Ho Pagenii ako ahbiila mohmi lutii, “Tonsḛrbo, ngo imbo talyi no noh inchi inja lopa.”

²⁰Ho Jisu mohmi lutii, “Yali pa ubu dodu, ho piita patḛr asi; hojalo miyu ka Oho pa dinta dingi kotrḛ nyima.”

²¹Koneya mohmika imbomonii henjeajiñ mohmi lutii, “Attoh, kapyopa ngiimi ingke nengku rañpe ho ngiika aba mi alie kiine kurañpe.”

²² Hojalo Jisu mohmi lutii, “Ngiimi imboto, ho shiinii bomi atoh ka shiima mi alie siike nento.”

²³ Ho mo huluho chakele, mohka henjeajiñ atañ mohmi chabo montii.

²⁴Ho kato, hiiko hempḛr allyiaro uropa miiritii siimie ho, hopa hulu mi lando poniiñ hii puha biipa miitii; hojalo mo imila dotii.

²⁵Ho mohlu ila ho mohmi ahutii, lubiidola, “Lyangurpe, Attoh; Ngunu lyulyi ke!”

²⁶ Ho mo mohlumi lutii, “Niimpa nunu biisodu, nunu henje papo atañ?” Ho mo guritii ho allyiaro la siimie nyimi gatii; ho hempḛr chimie ritiiku.

²⁷Ho miyuatañ aluñ ritii, lubiido, “Niitañ jaka si miyu kuna, allyiaro la siimie nyi lohe paka mohka luniiñmi talii danii?”

²⁸ Ho mo pache ho bochi dakele, Gadarenes gandaho, igii jarpiñ konii miyu anye mohmi iriitii, byuhkhiiñ hokii lila, hiimkane biiso nyatii ho kone hetḛr hiika lembo ho impo biila ila matii.

²⁹Ho kato, mo anye gyuritii, “No ngunumi nii miipa, Pinii ka Oho? No so ngunumi myodu ahma rampa henga-henkha miipa hapa ahdunii?”

³⁰Siisi hempḛr alyee abuje ohho kola dotii mohluka dako hokii ichuche ingila.

³¹Ho igii atañ mohmi yartii, “No matiirḛ ngunumi mompa talyi milo, ngunumi inka alyee abuje dako ho mompa liipe.”

³²Ho mo mohlumi lutii, “Inge!” Hopa mohlu linkula alyee ko poha nyatii; ho kato, hikha alyee atañ siimie ka siilyo biilyo ho chuha nyatii, ho yasie ho lyuha nyatii.

³³Alyee mika kanii atañ hargiinyatii, ho citi ho harala mohlu hikha drih lyiniiñmi luko nyatii niihtañ pana hiika igii jarpiñ koniibo lyitiinii.

³⁴Ho kato, hikha citi daka dunii atañ Jisu mi kappa dupa linyatii; ho miyuatañ Jisu mi kappa lala, mohlu mohmi yarbii do mohluka ari-apii sokii inge kute hiila.